వాల్‌మార్ట్‌లో నగదు దొంగిలించినట్టు ఆరోపణలు,,,అమెరికాలో భారత సంతతి యువకుడు అరెస్ట్

సాధారణంగా అమెరికాలో భారతీయ యువత ఐటీ ఉద్యోగాలు చేస్తూ లేదా చదువుకుంటూ కనిపిస్తారు. కానీ, ఓ 18 ఏళ్ల భారత సంతతి యువకుడు రుద్ర రాజు పటేల్ చేసిన పని ఇప్పుడు వార్తల్లో నిలిచింది. పెన్సిల్వేనియాలోని వారింగ్టన్‌లో ఉన్న వాల్‌మార్ట్ స్టోర్‌లో అతను దొంగతనానికి పాల్పడ్డాడు. చాలా రోజులుగా అతడికి ఇదే పని.. దాదాపు 960 డాలర్లు (భారత కరెన్సీలో దాదాపు రూ.80,000) నగదును కొట్టేసినట్లు పోలీసులు ఆరోపించారు. ముఖ్యంగా అక్టోబర్ 4న ఏకంగా 750 డాలర్లు దొంగిలించినట్లు తెలుస్తోంది.

అక్టోబర్ 4న స్టోర్‌లోని క్యాష్‌బాక్స్‌లో డబ్బులు లేవని వాల్‌మార్ట్ అలర్ట్ చేయడంతో, వారింగ్టన్ పోలీసులు వెంటనే రంగంలోకి దిగారు. దొంగతనం జరిగినట్టు నిర్ధారించుకున్న తరువాత, అధికారులు రుద్ర రాజు పటేల్‌ను అరెస్ట్ చేసి పోలీస్ స్టేషన్‌కు తరలించారు. విచారణ పూర్తైన తర్వాత, అతన్ని విడుదల చేశారు. అయినప్పటికీ, అతడు ‘చట్టవిరుద్ధంగా తీసుకోవడం ద్వారా దొంగతనం’ అనే అభియోగాలను ఎదుర్కొంటున్నాడు. చట్ట ప్రకారం, అతను నేరం చేశాడని నిరూపితమయ్యే వరకు నిరపరాధిగానే పరిగణిస్తామని అధికారులు స్పష్టం చేశారు.

రుద్ర పటేల్ దొంగగా మారడానికి గల కారణం ఏమై ఉంటుందనే ప్రస్తుతం చర్చ నడుస్తోంది. కొన్ని నివేదికల ప్రకారం... యువకుడు రుద్ర రాజు పటేల్ తీవ్రమైన ఆర్థిక ఇబ్బందులను ఎదుర్కొని ఉండొచ్చు. అందుకే ఇలాంటి నిర్ణయం తీసుకుని ఉంటాడని ఊహాగానాలు వినిపిస్తున్నాయి. అయితే, పోలీసులు మాత్రం ఈ ఉద్దేశాన్ని అధికారికంగా ధ్రువీకరించలేదు. ఈ కేసు ఇంకా దర్యాప్తులో ఉంది కాబట్టి, పూర్తి వివరాలు బయటకు వచ్చేవరకు వేచి చూడాల్సిందే.

భారతీయ సంతతికి చెందిన యువకుడు ఇలాంటి దొంగతనానికి పాల్పడటం అనేది అమెరికాలోని భారతీయ సమాజంలో ఆందోళన రేకెత్తించింది. ‘ఇలాంటి ఘటనలు మొత్తం భారతీయ సమాజంపై తప్పుడు ప్రభావాన్ని చూపుతాయి, మన పరువుకు భంగం కలిగిస్తాయి’ అని చాలా మంది తమ ఆవేదన వ్యక్తం చేశారు. అయితే, మరికొందరు... కేసు వివరాలు పూర్తిగా బయటికి వచ్చే వరకు తీర్పు చెప్పవద్దని, నిగ్రహంతో ఉండాలని కోరుతున్నారు.

ఈ సంఘటన నేపథ్యంలో భారతీయ కమ్యూనిటీ నాయకులు ముఖ్యమైన విజ్ఞప్తి చేశారు. ప్రతి ఒక్కరూ సానుభూతితో వ్యవహరించాలని, న్యాయ ప్రక్రియను గౌరవించాలని వారు కోరారు. ఎలాంటి అంచనాలు లేదా ఊహాగానాలకు తావులేకుండా చట్టం తన పని తాను చేసుకునేలా అనుమతించాలని వారు పిలుపునిచ్చారు. ఈ కేసులో రుద్ర రాజు పటేల్‌కు ఎలాంటి శిక్ష పడుతుందో, దొంగతనం వెనుక అసలు ఉద్దేశం ఏమిటో తెలియాలంటే.. మరికొన్ని రోజులు వేచి చూడక తప్పదు.