ట్రంప్‌‌ కాదు ‘సైరస్ ది గ్రేట్’.. అమెరికా అధ్యక్షుడికి ఇజ్రాయెల్ పార్లమెంట్ వంగి సలాం

గాజా యుద్ధం ముగిసి, శాంతి పవనాలు వెల్లివిరియడంలో అమెరికా అధ్యక్షుడు డొనాల్డ్ ట్రంప్ చేసిన కృషి గురించి ఎంతచెప్పినా తక్కువేనని ఇజ్రాయెల్ ప్రజాప్రతినిధులు పొగడ్తల్లో ముంచెత్తారు. ప్రపంచానికి మరింత మంది ట్రంప్‌లు అవసరం ఉందని వారు అభిప్రాయపడ్డారు. ఇజ్రాయెల్ పార్లమెంట్‌ను ఉద్దేశించి ట్రంప్ ప్రసంగానికి ముందు ఆ దేశ ఎంపీలు పైవిధంగా స్పందించారు. గాజాలో కాల్పులు విరమణ ఒప్పందం అమల్లోకి రావడంతో 20 మంది బందీలను హమాస్ విడుదల చేసిన సంగతి తెలిసిందే.

పశ్చిమాసియా పర్యటన కోసం వచ్చిన అమెరికా అధ్యక్షుడు.. సోమవారం ఉదయం ఇజ్రాయెల్‌కు చేరుకున్నారు. ఎయిర్ ఫోర్స్ వన్‌లో టెల్ అవీవ్‌ చేరుకున్న ట్రంప్‌కి అక్కడ ఘనస్వాగతం లభించింది. జెరూసలెంలోని ఇజ్రాయెల్ పార్లమెంట్‌లో పశ్చిమాసియా శాంతి ప్రణాళికపై ట్రంప్ ప్రసంగించిన అనంతరం కాల్పుల విరమణ ప్రణాళికను రూపొందించే కార్యక్రమానికి ఆయన ఈజిప్టుకు వెళతారు.

పార్లమెంట్‌లో ట్రంప్‌కు ప్రశంసిస్తూ చాలా నిమిషాల పాటు చప్పట్లు, హర్షధ్వానాలు మార్మోగాయి. ఈ సమయంలో ట్రంప్‌తో పాటు ఆయన ప్రత్యేక రాయబారి స్టీవ్ విట్కాఫ్, అల్లుడు జారెడ్ కుష్నర్, కుమార్తె ఇవాంకా కూడా ఉన్నారు. అంతకు ముందు ఇజ్రాయెల్ పార్లమెంట్‌ వద్ద ట్రంప్‌ను స్పీకర్ అమిర్ ఒహానా ఆత్మీయంగా ఆహ్వానించారు. ‘‘జెరూసలేంకి స్వాగతం. క్నెసెట్‌కు స్వాగతం. ఈ రోజు కోసం మేము ఎప్పటినుంచో ఎదురుచూస్తున్నాం’ అని అన్నారు. దీనిపై స్పందించిన ట్రంప్ ‘ఇది నాకు దక్కిన గొప్ప గౌరవం’ అని వ్యాఖ్యానించారు. అనంతరం ఆయన అతిథుల పుస్తకంలో సంతకం చేశారు

స్పీకర్ ఒహానా మాట్లాడుతూ.. ‘‘ట్రంప్ కేవలం అమెరికా అధ్యక్షుడు మాత్రమే కాదు యూదుల చరిత్రలో ఒక మహానుభావుడు.. ఆయనకు సమానమైన వ్యక్తిని చూడాలంటే మనం 2500 ఏళ్లు వెనక్కి వెళ్లి సైరస్ ది గ్రేట్ కాలానికి చేరుకోవాలి’’ అని అన్నారు. క్రీస్తుపూర్వం ఆరో శతాబ్దంలో నాటి సైరస్ ది గ్రేట్.. యూదులు ఇజ్రాయెల్‌కు వచ్చి జెరూసలెంలోని రెండో ఆలయాన్ని పునర్నిర్మించుకునేందకు అనుమతిచ్చారు.

‘‘ప్రపంచానికి ఇప్పుడు కావల్సింది మొసళ్లకు చివర్లో తినిపించుకుంటామని వాటి పెంచే సమాధానవాదులు కాదు.. ఐక్యరాజ్యసమితి సాధారణ సభలో మనం చూశాం కదా ధైర్యమైన, దృఢమైన, శక్తివంతమైన, ధృఢనిశ్చయమైన నాయకులు కావాలి.. ప్రపంచానికి మరిందరు ట్రంప్‌లు అవసరం’’ అని అన్నారు.