ప్రైవేటు బస్సులో మంటలు.. 15 మంది సజీవ దహనం

రాజస్థాన్‌లో ఓ ప్రైవేటు బస్సు.. మంటల్లో కాలి బూడిదైంది. జైసల్మేర్ నుంచి జోధ్‌పూర్ వెళ్తున్న ఒక ప్రైవేట్ బస్సులో మంగళవారం మధ్యాహ్నం అకస్మాత్తుగా మంటలు చెలరేగి ఘోర ప్రమాదం చోటు చేసుకుంది. ఇక ప్రమాద సమయంలో బస్సులో 57 మంది ప్రయాణిస్తున్నట్లు ప్రత్యక్ష సాక్షులు వెల్లడించారు. ఇక ఈ ప్రమాదంలో ముగ్గురు చిన్న పిల్లలు, నలుగురు మహిళలు సహా ఇప్పటివరకు మొత్తం 15 మంది సజీవ దహనం అయ్యారు. బస్సులో మంటలు వేగంగా వ్యాపించడంతో ప్రయాణికులు తీవ్ర భయాందోళనలు నెలకొన్నాయి. గాయపడిన వారిని దగ్గర్లోని ఆస్పత్రికి తరలించారు. అగ్ని ప్రమాదానికి గల కారణాలు తెలియాల్సి ఉంది.

జైసల్మేర్ నుంచి జోధ్‌పూర్ వెళ్తున్న ఆ బస్సులో తాహయట్ గ్రామం సమీపంలో మధ్యాహ్నం 3:30 గంటల ప్రాంతంలో ఈ ఘోర ప్రమాదం జరిగింది. ప్రమాద సమయంలో ఆ ప్రైవేట్ బస్సులో మొత్తం 57 మంది ప్రయాణికులు ఉన్నారు. జైసల్మేర్ నుంచి మధ్యాహ్నం 3 గంటలకు బస్సు బయలుదేరగా.. సుమారు 20 కిలోమీటర్లు ప్రయాణించిన తర్వాత.. తాహయట్ గ్రామం వద్ద బస్సు వెనుక భాగం నుంచి పొగ రావడాన్ని బస్సులోని ప్రయాణికులు గమనించారు.

అయితే చూస్తుండగానే.. క్షణాల్లోనే మంటలు మొత్తం బస్సును చుట్టుముట్టాయి.ప్రమాదం గురించి తెలియగానే.. సమీపంలోని గ్రామస్తులు, వాహనదారులు ఆ బస్సు వద్దకు చేరుకుని.. సహాయక చర్యలు చేపట్టారు. వెంటనే పోలీసులు, ఫైర్ సిబ్బందికి సమాచారం అందించారు. గాయపడిన వారిని 3 అంబులెన్స్‌ల్లో జైసల్మేర్‌లోని జవహీర్ ఆస్పత్రికి తరలించారు.

మృతుల సంఖ్య భారీగా పెరిగే అవకాశాలు ఉన్నట్లు అధికార వర్గాలు అంచనా వేస్తున్నాయి. ఇక బస్సు మంటల్లో కాలిపోతున్న దృశ్యాలను స్థానికులు వీడియోలు తీసి సోషల్ మీడియాలో పోస్ట్ చేయడంతో తెగ వైరల్ అవుతున్నాయి. అందులో మంటలు భారీ ఎత్తున ఎగిసిపడుతుండగా.. దట్టమైన పొగతో ఆ ప్రాంతం మొత్తం నల్లగా అలుముకుపోయింది.

గాయపడిన వారికి మెరుగైన చికిత్స అందించాలని అధికారులు ఆదేశాలు జారీ చేశారు. అయితే బస్సులో ఒక్కసారిగా ఈ అగ్నిప్రమాదం చోటు చేసుకోవడానికి గల కారణాల ఏంటి అనేది ఇంకా తెలియరాలేదు. దీనిపై కేసు నమోదు చేసుకున్న పోలీసులు దర్యాప్తు చేస్తున్నారు.