'ప్రతీ భారతీయుడిని బహిష్కరించాలి': అమెరికా నేత సంచలన కామెంట్లు

అమెరికాకు చెందిన ఓ రాజకీయ నేత చేసిన సంచలన వ్యాఖ్యలు తీవ్ర దుమారం రేపాయి. చాండ్లర్ లాంగేవిన్ అనే ఫ్లోరిడా రాజకీయ నాయకుడు సామాజిక మాధ్యమాలలో వరుసగా భారత వ్యతిరేక పోస్టులు పెడుతూ.. భారీ బహిష్కరణలు చేపట్టాలని డిమాండ్ చేశారు. అమెరికాలో ఉన్న ప్రతీ భారతీయుడిని వెంటనే బహిష్కరించాలని కోరారు. దీంతో ఆయనపై పెద్ద ఎత్తున వ్యతిరేకత వ్యక్తం అయింది. ఈక్రమంలోనే పామ్ బే నగర కౌన్సిల్ ఆయనపై చర్యలు చేపట్టింది.

చాండ్లర్ లాంగేవిన్ ఫ్లోరిడాలోని పామ్ బే సిటీ కౌన్సిల్‌కు చెందిన యూఎస్ కన్జర్వేటిక్ నాయకుడు. అయితే ఆయన చేసిన వ్యాఖ్యల్లో.. భారతదేశానికి చెందిన ఒక్క వ్యక్తి కూడా యునైటెడ్ స్టేట్స్ గురించి పట్టించుకోడు అని నిస్సిగ్గుగా ఆరోపించారు. భారతీయులు అమెరికాను కేవలం దోచుకోవడానికి మాత్రమే వస్తున్నారని పేర్కొన్నారు. అంతేకాకుండా డొనాల్డ్ ట్రంప్‌ను ఉద్దేశించి.. తన పుట్టినరోజు బహుమతిగా భారతీయ పౌరుల వీసాలు అన్నింటినీ రద్దు చేయాలని డిమాండ్ చేశారు. ఓ భారతీయ ట్రక్ డ్రైవర్ చేసిన ప్రమాదంలో ఓ మహిళ ప్రాణాలు కోల్పోయిందనే వార్తను లాంగేవిన్ పంచుకున్నారు. ఇందుకోసమే అమెరికాలోని భారతీయ పౌరులు అందరినీ వెంటనే బహిష్కరించాలని చెప్పారు.

ఈ వివాదాస్పద వ్యాఖ్యలతో అగ్రరాజ్యం అమెరికాలో ఒక్కసారిగా ఉద్రిక్త పరిస్థితులు ఏర్పడ్డాయి. లాంగేవిన్ వ్యాఖ్యలపై పామ్ బే మేయర్ మదీనా వెంటనే స్పందించారు. ప్రజా ఆగ్రహానికి.. ఈ తీవ్రమైన వ్యాఖ్యలకు ప్రతిస్పందనగా సిటీ కౌన్సిల్ లాంగేవిన్‌పై తీవ్రమైన వేటు వేశారు. అలాగే కిమిటీల్లోని అతని పదవులన్నింటినీ రద్దు చేయడంతో పాటు ఎజెండా నిర్ణయాధికారం, కమీషనర్ వ్యాఖ్యల అధికారాలను కూడా పూర్తిగా తొలగిస్తూ అతడిని సెన్సార్ చేశారు. అంతేకాకుండా ఇతరులను కించపరిచేలా, విలువలు తగ్గించేలా మన మాటలు ఉండకూడదని చెప్పారు. ఇలాంటి వారికి ఇక్కడ అస్సలే చోటు లేదని ఘాటుగా వివరించారు.

ప్రజల నుంచి తీవ్ర వ్యతిరేకత వచ్చినప్పటికీ.. లాంగేవిన్ తన వ్యాఖ్యలను సమర్థించుకోవడం గమనార్హం. తాను ఈ వ్యాఖ్యలు చేసింది కేవలం తాత్కాలిక వీసా హోల్డర్లపైనే తప్ప.. భారతీయ అమెరికన్లపై కాదని సర్ది చెప్పుకున్నారు. ఇంతటితో ఆగకుండా ఇటీవల మరొక పోస్ట్‌లో.. వలస విధానాలపై ఆందోళన చెందుతున్న ఫ్లోరిడాలోని కొన్ని కన్జర్వేటివ్ హిందూ గ్రూపుల మద్దతు తనకు ఉందని ఆయన ప్రకటించారు. అయితే అమెరికా వ్యాప్తంగా ఉన్న భారతీయ అమెరికన్ సంస్థలు లాంగేవిన్ చేసిన వ్యాఖ్యలను తీవ్రంగా ఖండించాయి. ఆయన వెంటనే తన పదవికి రాజీనామా చేయాలని డిమాండ్ చేశాయి. అయినప్పటికీ లాంగేవిన్ కౌన్సిల్ చర్యలను విమర్శిస్తూ.. తనపై వేటు వేయడాన్ని తప్పుబట్టారు.