'భారత బార్డర్ల వరకు పాక్‌ను పరిగెత్తిస్తాం': సీజ్‌ఫైర్ ఒప్పందం వేళ అఫ్గాన్ మంత్రి వార్నింగ్

కాల్పుల విరమణ ఒప్పందాన్ని ఉల్లంఘించి పాకిస్థాన్ అఫ్గాన్‌పై వైమానిక దాడులు చేసి తీవ్ర ఉద్రిక్తతలకు దారి తీసిన సంగతి తెలిసిందే. ఒకవైపు ఇరు దేశాల మధ్య శాంతి చర్చలు జరుగుతున్న సమయంలోనే అఫ్గాన్ మంత్రి పాకిస్థాన్‌కు తీవ్ర హెచ్చరికలు జారీ చేశారు. అఫ్గాన్ అంతర్గత వ్యవహారాల శాఖ డిప్యూటీ మంత్రి మహమ్మద్ నబి ఒమారి స్ట్రాంగ్ వార్నింగ్ ఇచ్చారు. పాకిస్థాన్ ఎలాంటి ఆక్రమణకు పాల్పడ్డా.. అఫ్గాన్ దళాలు వారిని భారత సరిహద్దుల వరకూ పరిగెత్తిస్తాయని వ్యాఖ్యానించారు.

పాక్టికా ప్రావిన్స్‌పై పాకిస్థాన్ వైమానిక దాడులు జరిపి పౌరుల ప్రాణాలను బలిగొనడాన్ని ఆయన తీవ్రంగా ఖండించారు. ఈ దాడులు ముగ్గురు యువ క్రికెటర్లతో సహా పది మంది ప్రాణాలు కోల్పోవడానికి దారితీశాయి. ఒక ప్రముఖ వార్తా సంస్థతో మాట్లాడుతూ ఒమారి ఈ ఘాటు వ్యాఖ్యలు చేశారు. పాకిస్థాన్ సైనిక నాయకత్వంపై ఆయన నిప్పులు చెరిగారు. ఆ దేశ సైనిక పాలన ఇతరుల ఇష్టాలపై ఆధారపడి ఉంటుందని విమర్శించారు. ఇటీవల పాక్ ప్రధానమంత్రి షెహబాజ్ షరీఫ్ అమెరికా అధ్యక్షుడు డొనాల్డ్ ట్రంప్‌ను ఉద్దేశించి సానుభూతితో మాట్లాడిన వీడియోలను కూడా ఈ సందర్భంగా ఒమారి ప్రస్తావించారు. పాకిస్థాన్ తన సొంత నిర్ణయాల మేరకు కాకుండా, 'ఇతరుల ప్రోద్బలం'తో దాడులు చేస్తోందని ఆయన ఆరోపించారు.

కొన్ని రోజులుగా అఫ్గాన్-పాక్ సరిహద్దుల్లో ఉద్రిక్త పరిస్థితులు నెలకొన్నాయి. ఇరు పక్షాల మధ్య కుదిరిన 48 గంటల తాత్కాలిక కాల్పుల విరమణ ముగిసిన వెంటనే, పాకిస్థాన్ అఫ్గాన్‌పై వైమానిక దాడులకు తెగబడింది. ఈ దాడులను అఫ్గానిస్థాన్ తీవ్రంగా ఖండించింది. మృతిచెందిన ముగ్గురు క్రికెటర్లకు గౌరవంగా, అఫ్గానిస్థాన్ క్రికెట్ బోర్డు త్వరలో పాకిస్థాన్‌లో జరగాల్సిన త్రైపాక్షిక టీ20 సిరీస్ నుంచి వైదొలుగుతున్నట్లు ప్రకటించింది.

మరోవైపు అఫ్గాన్-పాక్ మధ్య ఉద్రిక్తతలను తగ్గించడానికి ఖతార్ రాజధాని దోహాలో ఇరు దేశాల ప్రతినిధుల మధ్య శాంతి చర్చలు జరిగాయి. ఖతార్, టర్కీ మధ్యవర్తిత్వంతో జరిగిన ఈ చర్చల్లో ఇరుపక్షాలు తక్షణ కాల్పుల విరమణకు అంగీకరించినట్లు ఖతార్ విదేశాంగ శాఖ ప్రకటించింది. అఫ్గానిస్థాన్ రక్షణ మంత్రి మౌల్వి మహమ్మద్ యాకూబ్, పాకిస్థాన్ రక్షణ మంత్రి ఖవాజా ముహమ్మద్ ఆసిఫ్ నేతృత్వంలో ఈ చర్చలు జరిగాయి. ఈ ఒప్పందం సరిహద్దుల్లో శాంతి, సుస్థిరతకు పునాది వేస్తుందని ఖతార్ ఆశాభావం వ్యక్తం చేసింది.