సముద్రంలో భీకర ఆపరేషన్.. సబ్‌మెరైన్ ముంచేసిన అమెరికా.. 25,000 మంది ప్రాణాలు సేఫ్

డ్రగ్స్ విషయంలో కఠినంగా వ్యవహరిస్తున్నామని చెప్పుకుంటున్న అమెరికా అధ్యక్షుడు డొనాల్డ్ ట్రంప్ కీలక ప్రకటన చేశారు. భారీ డ్రగ్స్ నిల్వలతో.. అమెరికా వైపు వస్తున్న సబ్‌మెరైన్ (జలంతర్గామి)ను కరేబియన్ సముద్రంలో ముంచేశామని తెలిపారు. ఒకవేళ ఆ సబ్‌మెరైన్ అమెరికాకు చేరి ఉంటే.. దాదాపు 25, 000 మంది అమెరికన్లు ప్రాణాలు కోల్పోయేవారని అన్నారు. అమెరికా భద్రతా దళాలు చేపట్టిన ఈ ఆపరేషన్‌లో ఇద్దరు మాదకద్రవ్యాల అక్రమ సరఫరాదారులు మృతి చెందినట్లు తెలిపారు. మరో ఇద్దరిని వారి స్వదేశాలైన ఈక్వెడార్, కొలంబియాకు తిరిగి పంపుతున్నట్లు ట్రంప్ ప్రకటించారు. ఈ మేరకు వైట్‌హౌజ్ ఒక వీడియో విడుదల చేసింది.

ఈ ఆపరేషన్‌పై తన ట్రూత్ సోషల్‌లో డొనాల్డ్ ట్రంప్ పోస్టు పెట్టారు. "ఎక్కువగా ఉపయోగించే నార్కోట్రాఫికింగ్ ట్రాన్సిట్ మార్గంలో అమెరికా వైపు ప్రయాణిస్తున్న.. చాలా పెద్ద మొత్తంలో డ్రగ్స్ ఉన్న జలాంతర్గామిని ధ్వంసం చేయడం నేను చాలా గౌరవంగా భావిస్తున్నాను. ఆ నౌకలో ఫెంటానిల్ వంటి ఇతర మాదకద్రవ్యాలు నిండి ఉన్నాయి. ఈ దాడిలో ఇద్దరు ఉగ్రవాదులు హతమయ్యారు. ఆ సబ్‌మెరైన్ అమెరికాకి వచ్చి ఉంటే.. దాదాపు 25 వేల మంది అమెరికన్లు ప్రాణాలు కోల్పోయేవారు. మరో ఇద్దరు ఉగ్రవాదులను ప్రాణాలతో పట్టుకున్నాం. వారిని వారి స్వదేశాలైన ఈక్వెడార్, కొలంబియాకు తిరిగి పంపుతున్నాం. ఈ ఆపరేషన్‌లో అమెరికా సైనికులకు ఎలాంటి గాయాలు కాలేదు. నా హయాంలో.. భూమి, ఆకాశం, సముద్ర మార్గాల్లో ఎలాంటి మాదకద్రవ్యాల అక్రమ రవాణ జరిగినా.. అమెరికా సహించదు" అని ట్రంప్ వెల్లడించారు.

మరోవైపు, డ్రగ్స్ సరఫరాదారుడిగా అనుమానిస్తున్న ఓ వ్యక్తిని కొలంబియాకు అమెరికా పంపించిందని ఆ దేశ అధ్యక్షుడు గుస్తావో పెట్రో ధృవీకరించారు. అతడు బతికి ఉండటం సంతోషకరమైన విషయమని.. అతడిపై చట్ట ప్రకారం చర్యలు తీసుకుంటామని ఎక్స్‌లో పోస్టు పెట్టారు.

లాటిన్‌ అమెరికా దేశాల నుంచి డ్రగ్స్‌ను తమ వైపు రానీయకుండా అమెరికా భారీగా భద్రతా బలగాలను మోహరిస్తోంది. సెప్టెంబర్‌ నుంచి ఇప్పటి వరకు సుమారు ఆరు పడవలను.. ముఖ్యంగా స్పీడ్‌ బోట్‌లపై దాడులు చేసింది. వీటిలో కొన్ని వెనెజువెలా నుంచి వస్తున్నాయని అమెరికా భద్రతా అధికారులు భావిస్తున్నారు.

అక్రమ మదకద్రవ్యాల రవాణాకు జలాంతర్గాములను వాడటం ఇదే మొదటిసారి కాదు. 1990ల నుంచి అక్కడి స్మగ్లర్లు అమెరికా భద్రతా దళాల గస్తీలను తప్పించుకోవడానికి వీటిని ఉపయోగిస్తున్నారు. ఆడవుల్లోని రహస్య షిప్ యార్డుల్లో వీటిని నిర్మిస్తున్నారు. అనంతరం దక్షిణ అమెరికా దేశాల నుంచి ముఖ్యంగా కొలంబియా నుంచి.. పసిఫిక్ మహాసముద్రం ద్వారా అమెరికా, మెక్సికోకు డ్రగ్స్ అక్రమ రవాణా చేస్తున్నారు.