ఇన్‌స్టాలో బిగ్‌బాస్ నటి గ్లామర్ ఫోటోలు రీపోస్ట్,,,,,చిక్కుల్లో పడ్డ డిప్యూటీ సీఎం

రాజకీయ, సినీ, వ్యాపార, ఇతర ప్రముఖులు సోషల్ మీడియాలో చాలా జాగ్రత్తగా ఉండాలి. లేకుంటే నెటిజన్ల చేతిలో ట్రోల్స్, మీమ్స్‌కు గురయ్యే ప్రమాదం ఉంటుంది. వాళ్లు చేసే పోస్ట్‌లు, పెట్టే ఫోటోలు, షేర్లు, కామెంట్ల విషయంలో.. ఇలా ప్రతీ ఒక్కటి ఆచితూచి వ్యవహరించాల్సి ఉంటుంది. ఏ చిన్న పొరపాటు చేసి దొరికిపోయినా.. ఆ తర్వాత పర్యవసానాలు తీవ్రంగా ఉంటాయి. అలాంటి ఘటనే ఇప్పుడు జరిగింది. తమిళనాడు ఉప ముఖ్యమంత్రి, నటుడు ఉదయనిధి స్టాలిన్ .. మరోసారి వార్తల్లోకి ఎక్కారు. బిగ్‌బాస్ కంటెస్టెంట్ నివాషిని కృష్ణన్ గ్లామరస్ ఫోటోలను తన ఇన్‌స్టాగ్రామ్‌లో పొరపాటున రీపోస్ట్ చేయడంతో నెటిజన్లకు చిక్కి ట్రోల్స్‌కు గురవుతున్నారు.

అయితే ఆ రీపోస్ట్‌ను ఉదయనిధి స్టాలిన్ వెంటనే డిలీట్ చేసినా.. ఈ స్క్రీన్‌షాట్లు మాత్రం నెట్టింట తెగ వైరల్ అవుతున్నాయి. తమిళ బిగ్‌బాస్ 6 ద్వారా గుర్తింపు పొందిన నటి, మోడల్.. నివాషిని కృష్ణన్.. తనకు సంబంధించిన కొన్ని గ్లామరస్ ఫోటోలను ఇటీవల ఇన్‌స్టాగ్రామ్‌లో పోస్ట్ చేయగా.. ఉదయనిధి స్టాలిన్ వాటిని రీపోస్ట్ చేశారు. దీంతో ఈ వ్యవహారం.. సోషల్ మీడియాలో ప్రముఖులు పాటించాల్సిన అప్రమత్తతను మరోసారి గుర్తు చేసింది.

ఇక ఈ రీపోస్ట్‌ను వెంటనే గుర్తించిన నెటిజన్లు.. స్క్రీన్‌షాట్లు తీసి వైరల్ చేశారు. దీంతో తాను చేసిన పొరపాటును గుర్తించిన ఉదయనిధి స్టాలిన్.. వెంటనే ఆ పోస్ట్‌ను డిలీట్ చేసినా.. అప్పటికే అది సోషల్ మీడియా మొత్తం చక్కర్లు కొట్టింది. దీంతో నెటిజన్లు మీమ్స్, జోకులతో ఉదయనిధి స్టాలిన్‌ను ట్రోల్స్ చేయడం మొదలుపెట్టారు.

నివాషిని కృష్ణన్‌కు డీఎంకే పార్టీలోకి స్వాగతం పలుకుతూ కొందరు నెటిజన్లు కామెంట్లు చేశారు. ఈ దెబ్బకు నివాషిని కృష్ణన్.. తన పోస్ట్‌కు కామెంట్లను ఆఫ్ చేశారు. అయినప్పటికీ ఈ వివాదంపై ట్రోలింగ్ మాత్రం ఆగలేదు. వచ్చే ఏడాది తమిళనాడులో అసెంబ్లీ ఎన్నికలు జరగనున్న వేళ.. అక్కడి రాజకీయాలు ఇప్పటికే హీటెక్కగా.. ఈ పరిణామం ప్రాధాన్యం సంతరించుకుంది.

మరోవైపు.. ఉదయనిధి స్టాలిన్‌కు డీఎంకే కార్యకర్తలు, అభిమానులు మద్దతుగా నిలిచారు. అది కేవలం పొరపాటున చేసిన రీపోస్ట్ మాత్రమేనని.. ఎలాంటి ఉద్దేశం లేదని వారు వివరణ ఇచ్చే ప్రయత్నం చేసినా అది అంత వర్కవుట్ కాలేదు. తమిళనాడు మూలాలు ఉన్నప్పటికీ.. నివాషిని కృష్ణన్ సింగపూర్‌లో మోడల్‌గా పనిచేస్తున్నారు. అక్కడ అసిస్టెంట్ డైరెక్టర్‌గా కూడా పనిచేశారు. ఆమె తమిళ బిగ్‌బాస్ ఆరో సీజన్‌లో కామనర్ (సాధారణ వ్యక్తి) గా పాల్గొన్నారు. అంతే కాకుండా ఓహో ఎంతన్ బేబీ అనే సినిమాలోనూ నివాషిని కృష్ణ్ నటించారు.