హెచ్1బీ వీసా ఫీజు పెంపు అమెరికాకే నష్టం.. నిర్ణయం వెనక్కి తీసుకోవాలని చట్టసభ్యుల డిమాండ్

హెచ్1బీ వీసా ఫీజు ను లక్ష డాలర్లకు పెంచుతూ అమెరికా అధ్యక్షుడు తీసుకున్న నిర్ణయంపై స్వదేశంలోనే వ్యతిరేకత వ్యక్తమవుతోంది. ఇది అమెరికా ఆర్థిక వ్యవస్థపై ప్రతికూల ప్రభావం చూపిస్తుందనే అభిప్రాయం వ్యక్తం చేస్తున్నారు. ఈ నేపథ్యంలో ఫీజు పెంపు నిర్ణయం వెనక్కి తీసుకోవాలని ఏడుగురు అమెరికా కాంగ్రెస్ సభ్యులు.. ట్రంప్‌, కామర్స్ సెక్రటరీ హవర్డ్ లత్నిక్‌కు లేఖ రాశారు. అందులో, అమెరికాది ఇన్నోవేషన్‌ ఆర్థిక వ్యవస్థ అని.. స్వదేశంతో పాటు విదేశీ ట్యాలెంట్‌పై ఆధారపడి ఉందని అభిప్రాయపడ్డారు. అందుకే హెచ్1బీ వీసా ఫీజు పెంపు నిర్ణయాన్ని మరోసారి పరిశీలించాలని పేర్కొన్నారు. లేఖ రాసిన కాంగ్రెస్ సభ్యుల్లో ప్రతిపక్ష డెమోక్రాట్లతో పాటు అధికార రిపబ్లికన్లు కూడా ఉండటం గమనార్హం. కాగా ఇప్పటికే ట్రంప్ నిర్ణయంపై పలువురు కోర్టును కూడా ఆశ్రయించారు.

హెచ్‌1బీ వీసాపై విధించిన రుసుము.. హెచ్1బీ వ్యవస్థ దుర్వినియోగాన్ని అరికట్టదని.. దానికి బదులుగా స్టార్టప్‌లను మూసివేయాల్సిన పరిస్థితి తలెత్తుతుందని లేఖలో పేర్కొన్నారు. అంతేకాకుండా ఆవిష్కరణలు నెమ్మదిస్తాయని చెప్పారు. భారత్ వంటి దేశాల నిపుణులు అమెరికాకు పోటీ వస్తున్న దేశాలకు వెళ్తారని ఆందోళన వ్యక్తం చేశారు. అయితే హెచ్1బీ వీసా ప్రోగ్రాంలో సంస్కరణలు అవసరమేనని.. కానీ లక్ష డాలర్ల ఫీజు విధించడం చాలా ఖరీదైన వ్యవహారమని, అది అమెరికాపై ప్రతికూల ప్రభావం చూపుతుందని అభిప్రాయపడ్డారు. ఈ మేరకు భారత్ సంతతికి చెందిన సుహాస్ సుబ్రమణ్యంతో పాటు సామ్ టి లికార్డో, జే ఒబెర్నోల్ట్, ఎల్విరా సలజార్, డాన్ బేకన్, గ్రెగ్ స్టాంటన్ లేఖపై సంతకం చేశారు.

విదేశీ ఇంజనీర్లు, శాస్త్రవేత్తలపై ఎక్కువగా ఆధారపడిన చిన్న టెక్నాలజీ కంపెనీలు, పరిశోధన-ఆధారిత కంపెనీలు హెచ్1బీ వీసా పెంపును భరించలేవని చట్టసభ్యులు లేఖలో పేర్కొన్నారు. పెద్ద టెక్ కంపెనీలు ఈ మొత్తాన్ని భరించగలవని.. కానీ చిన్న సంస్థలు కొత్త ఉద్యోగులను తీసుకునే పరిస్థితి ఉండదని చెప్పారు. తద్వారా చిన్న కంపెనీల మనుగడ ప్రశ్నార్థకమై.. అమెరికన్లకు కూడా ఉద్యోగాలు ఇవ్వలేని పరిస్థితి తలెత్తుతుందని పేర్కొన్నారు.

ఇదిలా ఉండగా, హెచ్1బీ వీసా ఉన్న సందేహాలను ఇటీవల USCIS తొలగించింది. అమెరికాలో ఉన్నత విద్య పూర్తి చేసి.. ఉద్యోగాల కోసం హెచ్‌-1బీ వీసా దరఖాస్తు చేసుకునే విదేశీ విద్యార్థుల కోసం.. కంపెనీలు లక్ష డాలర్లు చెల్లించాల్సిన అవసరం లేదని స్పష్టం చేసింది. ఒకవేళ.. బయట దేశాల నుంచి వచ్చే వారికి కంపెనీలు హెచ్1బీ వీసా స్పాన్సర్ చేయాలనుకుంటే.. ఈ మొత్తం చెల్లించాల్సి ఉంటుందని USCIS క్లారిటీ ఇచ్చింది. అంటే అమెరికాలో ఉద్యోగం చేయాలనుకుంటే.. ముందుగా అక్కడ కొన్నేళ్లు చదువుకోవాల్సి ఉంటుంది. అంతేకాకుండా ఛేంజ్ ఆఫ్ స్టేటస్‌కు కూడా పెంచిన వీసా ఫీజు వర్తించదని USCIS స్పష్టం చేసింది