శ్రీలంక ప్రతిపక్ష పార్టీ నేత దారుణ హత్య.. ఆఫీసులోనే కాల్చిచంపిన దుండుగులు

శ్రీలంక ప్రతిపక్ష నేత లసంత విక్రమశేఖర దారుణ హత్యకు గురయ్యారు. ఆఫీసులోనే ఆయనపై గుర్తుతెలియని వ్యక్తులు కాల్పులు జరిపినట్టు పోలీసులు వెల్లడించారు. తీరప్రాంత నగరం వెలిగామాకు చెందిన కౌన్సిల్ చైర్మన్ విక్రమశేఖర నియోజకవర్గ ప్రజలతో అక్టోబరు 22న బుధవారం సమావేశం నిర్వహించారు. ఈ సమయంలో దుండగుడు తుపాకీతో లోపలికి చొరబడి పలు రౌండ్లు కాల్పులు జరిపి పారిపోయాడు. ఈ ఘటనలో లసంత తప్ప ఎవరికీ ఎటువంటి గాయాలు కాలేదని పోలీసులు తెలిపారు. ఘటనపై కేసు నమోదుచేసి దర్యాప్తు చేపట్టామని, హంతకుడి కోసం గాలిస్తున్నామని చెప్పారు. ఈ హత్యకు గల కారణం ఏంటి? అనేది స్పష్టతలేదని పోలీసులు పేర్కొన్నారు.

వెలిగమా కౌన్సిల్‌లో అధికార పార్టీతో పోరాడుతున్న సమగి జన బలవేగయ పార్టీకి చెందిన సభ్యుడు విక్రమశేఖర. కాగా, మీడియా నివేదికల ప్రకారం డ్రగ్ ముఠాలు, గ్యాంగ్‌స్టర్ల‌తో సంబంధాలున్న ఘటనల సహా ద్వీపదేశం శ్రీలంకలో ఈ ఏడాది హింస భారీగా పెరిగింది. అధికారిక లెక్కల ప్రకారం 100కిపైగా కాల్పుల ఘటనల్లో 50 మంది ప్రాణాలు కోల్పోయారు. ఈ ఏడాది ఫిబ్రవరిలో రాజధాని కొలంబో కోర్టు హాలులో హత్య షాక్‌కు గురిచేసింది. లాయర్ వేషంలో వచ్చిన దుండుగుడు తుపాకీతో కాల్పులు జరిపడంతో ఉలిక్కిపడ్డారు.

 ఇక, గతేడాది శ్రీలంక అధ్యక్షుడిగా అనురా కుమార్ దిసనాయకే బాధ్యతలు చేపట్టిన తర్వాత జరిగిన మొట్టమొదటి రాజకీయ హత్య విక్రమశేఖరదే కావడం గమనార్హం. దేశంలో శాంతి భద్రతలను గాడిలో పెడతానని పదవి చేపట్టిన తర్వాత దిసనాయకే హామీ ఇచ్చారు. కానీ, ఆయన వాగ్దానం నీటిమీద రాతగానే మిగిలిపోయిందని, అంతకు ముందుతో పోల్చితే ప్రస్తుతం దేశంలో హింసాత్మక ఘటనలు పెరిగిపోయాయని ప్రతిపక్షాలు విమర్శిస్తున్నారు. మూడేళ్ల కిందట తీవ్ర ఆర్థిక సంక్షోభంలో చిక్కుకున్న శ్రీలంక ప్రజాందోళనలతో అట్టుడికిపోయింది. గతేడాది డిసెంబరులో ఎన్నికలు జరిగి.. అనురా కుమార దిసనాయకే అధ్యక్షుడిగా విజయం సాధించారు. అప్పటి నుంచి క్రమంగా లంకలో పరిస్థితుల చక్కబడుతున్నాయి. ఈ నేపథ్యంలో ప్రతిపక్ష పార్టీకి చెందిన నేత హత్యకు గురికావడం సంచలనంగా మారింది.