లాటరీలో రూ.12.50 కోట్లు గెలిచిన వృద్ధుడు.., విడాకుల కేసు పెట్టిన భార్య

లాటరీలో డబ్బు గెలిస్తే.. కలిగే ఆనందం మాటల్లో చెప్పలేం. రాత్రికి రాత్రే కోటీశ్వరులైన వారు చాలా మంది ఉన్నారు. ఏళ్ల నాటి కటిక దరిద్రం కాస్తా పారిపోయి.. ధనవంతులు అవుతారు. అప్పులన్నీ తీర్చేసి.. ఆస్తులు కొనుగోలు చేస్తూ ఉంటారు. కానీ లాటరీ సొమ్మును సరిగ్గా ఉపయోగించుకోలేకపోతే మాత్రం.. పరిస్థితి మొత్తం తారుమారు అవుతుంది. కష్టాలు పోవడం సంగతి పక్కన పెడితే.. లేని ఇబ్బందులు వచ్చి పడతాయి. అచ్చం అలాంటి సంఘటనే ఇప్పుడు చైనాలో జరిగింది. ఓ వృద్ధుడికి ఏకంగా రూ.12.50 కోట్ల లాటరీ తగిలింది. అదే అతడి సంసారాన్ని నాశనం చేసింది.

చైనాకు చెందిన ఒక వ్యక్తి 10 మిలియన్ యువాన్ల (సుమారు $1.4 మిలియన్లు) లాటరీ గెలుచుకున్న తర్వాత తన భార్య యువాన్‌ను మోసం చేశాడు. గెలిచిన డబ్బు మొత్తాన్ని ఒక మహిళా లైవ్-స్ట్రీమర్‌పై తగలేశాడు, ఆమెకు 1.2 మిలియన్ యువాన్‌ల టిప్ కూడా ఇచ్చాడు. అతను తన భార్యకు ఇచ్చిన బ్యాంక్ కార్డులో డబ్బు లేదని తర్వాత తేలింది. లాటరీ డబ్బుతో తన పాత వయసును దాచే ప్రయత్నంలో, అతను లైవ్-స్ట్రీమర్‌తో అక్రమ సంబంధం కొనసాగించాడు. దీనిపై మనస్తాపం చెందిన భార్య యువాన్ విడాకుల కోసం కోర్టును ఆశ్రయించింది. ఈ ఘటన సోషల్ మీడియాలో వైరల్‌గా మారింది.

తూర్పు చైనాకు చెందిన ఒక వృద్ధుడికి లాటరీలో 10 మిలియన్ యువాన్‌లు అంటే మన భారత కరెన్సీలో సుమారు రూ.12.5 కోట్ల జాక్‌పాట్ తగిలింది. గెలిచిన డబ్బుతో విలాసవంతమైన జీవితాన్ని తన భార్య, పిల్లలతో గడపాల్సింది పోయి.. ఆ డబ్బు మొత్తాన్ని ఒక మహిళా లైవ్ స్ట్రీమర్‌పై తగలేశాడు. దీంతో అతని భార్య విడాకుల కోసం కోర్టుకెక్కింది. షాండోంగ్ ప్రావిన్స్‌లోని దేజౌలో నివసిస్తున్న ఈ జంట 2016లో పెళ్లి చేసుకుంది. అయితే 2024 డిసెంబర్ 17వ తేదీన అతడికి ఈ లాటరీ తగలడంతో వారి సంతోషానికి అవధుల్లేకుండా పోయింది. ప్రభుత్వానికి చెల్లించే పన్నులు అన్నీ పోను అతనికి 8.14 మిలియన్ యువాన్‌లు అంటే భారత కరెన్సీలో రూ.10 కోట్లకు పైనే చేతికి వచ్చాయి.

భర్త ఉత్సాహంగా తన భార్యకు అప్పటికప్పుడు 3 మిలియన్ యువాన్‌లు అంటే రూ.3.70 కోట్లు ఉన్నాయని చెప్పి ఒక బ్యాంక్ కార్డును ఇచ్చాడు. భర్తను నమ్మిన ఆమె.. ఆ కార్డులో బ్యాలెన్స్ చెక్ చేయకుండా భద్రంగా దాచిపెట్టింది. అయితే లాటరీ గెలిచిన కొద్ది రోజులకే తన భర్త ప్రవర్తనలో మార్పు వచ్చిందని ఆమె తెలిపింది. ఆ తర్వాత అతడు తన భార్యకు డబ్బు ఇవ్వడం మానేసి.. రాత్రంతా మేల్కొని మహిళా లైవ్ స్ట్రీమర్‌ల నగ్న వీడియోలు చూడటం, జూదం ఆడటం మొదలుపెట్టాడు. ఈ క్రమంలోనే ఆన్‌లైన్‌లో వారికి భారీగా డబ్బులు పంపుతూ.. కేవలం ఒక మహిళకే ఏకంగా 1.2 మిలియన్ యువాన్‌లు అంటే రూ.1.50 కోట్లు టిప్‌గా ఇచ్చేశాడు.

ఇక ఈ ఏడాది జూలైలో తన భర్త ట్రిప్ కోసం ఆ లైవ్ స్ట్రీమర్‌తో కలిసి వెళ్తుండగా ఆ భార్య రెడ్ హ్యాండెడ్‌గా పట్టుకుంది. వారి మధ్య చాట్‌లను చూసిన ఆమె షాక్ అయింది. అనంతరం మొత్తం విషయం తెలుసుకున్న భార్య.. తనకు భర్త ఇచ్చిన బ్యాంక్ అకౌంట్‌ను చెక్ చేయగా అందులో ఒక్క రూపాయి కూడా లేదని గుర్తించింది. దీంతో తన భర్త తనకు అన్యాయం చేశాడని.. గుర్తించి అతడిని ప్రశ్నించింది. ఆ లాటరీ తగలకుండా ఉంటే బాగుండేదని.. తన భర్తతో తాను జీవితాంతం గడపాలని అనుకున్నానని పేర్కొంది. కానీ అతడు తనను పూర్తిగా మోసం చేశాడని ఆవేదన వ్యక్తం చేసింది. అంతేకాకుండా ఆ లైవ్ స్ట్రీమర్‌తో బిడ్డను కూడా కనాలని ఆ వృద్ధుడు కోరుకున్నట్లు అతని భార్య వెల్లడించింది.

మరోవైపు.. విడాకుల కోసం భర్తపై ఆ భార్య కోర్టులో దావా వేసింది. ఈ సందర్భంగా మీడియాతో మాట్లాడిన భర్త.. తాను డబ్బు మొత్తం ఖర్చు చేశానని.. తన భార్య విడాకుల కోసం తనపై కేసు వేసిందని పేర్కొన్నాడు. అన్ని నిర్ణయాలు కోర్టు తీసుకుంటుందని వెల్లడించాడు. లాటరీలో వచ్చిన డబ్బు ఒక సాధారణ కుటుంబ జీవితాన్ని ఎలా నాశనం చేసిందో ఈ ఘటన స్పష్టం చేస్తోంది.