'చివరి దశలో మా నాన్న రాజకీయ జీవితం': కుమారుడి వ్యాఖ్యలపై స్పందించిన సిద్ధూ

 కర్ణాటక ముఖ్యమంత్రి సిద్ధరామయ్య కుమారుడు ఇటీవలే సంచలన కామెంట్లు చేసిన విషయం అందరికీ తెలిసిందే. ముఖ్యంగా తన తండ్రి రాజకీయ జీవితం చివరి దశలో ఉందని చెప్పారు. అలాగే ఇకపై ఆయన తన కేబినట్ సహచరుడు సతీష్ జార్కిహోళికి 'మార్గదర్శి'గా మారాలని సిద్ధరామయ్యకు సూచించారు. ఈ వ్యాఖ్యలతో కర్ణాటక ముఖ్యమంత్రి మార్పు ఊహాగానాలపై మరోసారి చర్చ మొదలైంది. దీంతో సీఎం సిద్ధరామయ్య దీనిపై స్పందించారు. తమ కుమారుడు చేసిన వ్యాఖ్యలు విని.. వెంటనే తన కుమారుడిని ప్రశ్నించినట్లు చెప్పారు. అతడు ఏ ఉద్దేశంతో అన్నాడో కూడా వివరించారు.

గత బుధవారం రోజు బెళగావిలో జరిగిన ఒక కార్యక్రమంలో యతీంద్ర సిద్ధరామయ్య మాట్లాడుతూ.. తన తండ్రి సిద్ధరామయ్య సుదీర్ఘ రాజకీయ ప్రస్థానం ఇప్పుడు చివరి అంకానికి చేరుకుందని అన్నారు. అలాగే ఈ సమయంలో బలమైన భావజాలం, ప్రగతిశీల దృక్పథం కలిగిన నాయకుడు పార్టీని నడిపించాల్సిన అవసరం ఉందని అభిప్రాయపడ్డారు. ముఖ్యంగా ప్రస్తుత మంత్రి సతీశ్ జార్కిహోళికి ఆ లక్షణాలు పుష్కలంగా ఉన్నాయని.. కాబట్టి కాంగ్రెస్ పార్టీ నాయకత్వ బాధ్యతలను ఆయన స్వీకరించడానికి సిద్ధంగా ఉండాలని సూచించారు.

జార్కిహోళి వేదికపై ఉండగానే యతీంద్ర ఈ వ్యాఖ్యలు చేయడం రాజకీయంగా అత్యంత ప్రాధాన్యత సంతరించుకుంది. ముఖ్యంగా కాంగ్రెస్ పార్టీ సిద్ధాంతాలను సమర్థించగలిగే, సమర్థవంతంగా ముందుకు నడిపించగలిగే సత్తా ఉన్న నాయకుడిని యతీంద్ర చెప్పగా.. తదుపరి సీఎం ఆయనే అంటూ ఊహాగానాలు వచ్చాయి. ముఖ్యమంత్రి పీఠం మార్పుకు సంకేతంగానే యతీంద్ర ఇలా మాట్లాడారని అంతా భావించారు. ముఖ్యంగా కర్ణాటక ముఖ్యమంత్రి పదవి మారుతుందని, డీకే శివకుమార్ పగ్గాలు చేపడతారని విస్తృత ప్రచారం జరుగుతున్న సమయంలోనే ఈ కామెంట్లు రావడంతో.. మరోసారి చర్చ మొదలైంది.

దీంతో ముఖ్యమంత్రి సిద్ధ రామయ్యనే తాజాగా స్పందించారు. తన కుమారుడి వ్యాఖ్యలను పత్రికలు, రాజకీయ వర్గాలు వక్రీకరించాయని ఖండించారు. తాను యతీంద్రతో మాట్లాడినట్లు చెప్పారు. అసలే ఉద్దేశంతో ఈ కామెంట్లు చేశావని అడగ్గా.. కాంగ్రెస్ పార్టీ అనుసరించే సిద్ధాంతాలు, ప్రగతిశీల భావజాలం గురించి మాత్రమే మాట్లాడాలని ఉద్దేశించినట్లు తెలిపారని వివరించారు. “ఫలానా వ్యక్తి ముఖ్యమంత్రి కావాలని యతీంద్ర ఏనాడూ అనలేదు” అని సిద్ధరామయ్య తేల్చి చెప్పారు. ఈ వివరణ ద్వారా కుమారుడి ప్రకటన కారణంగా పార్టీలో తలెత్తిన గందరగోళానికి, ముఖ్యంగా డీకే శివకుమార్ వర్గానికి వచ్చిన ఇబ్బందికి తెర దించే ప్రయత్నం చేశారు.