పిల్లలు అదేపనిగా దగ్గుతున్నారని సిరప్ తాగిస్తున్నారా

ప్రతి వంటింట్లోనూ పోపుల పెట్టె ఉన్నట్టు ప్రస్తుతం ప్రతి ఇంట్లోనూ ఒక మందుల పెట్టె కూడా ఉంటోంది. ఆ పెట్టెలో ఓ జ్వరం మాత్ర, పెయిన్ కిల్లర్స్, జలుబుకి వేసుకునే మాత్రలు, దగ్గుకి వేసే సిరప్, ఎప్పుడో ఆరునెలల క్రితం బాగా జలుబు, జ్వరం వచ్చినప్పుడు డాక్టర్ ప్రిస్క్రైబ్ చేసిన యాంటీబయాటిక్స్ స్ట్రిప్‌లో మిగిలిపోయిన రెండో మూడో మాత్రలు.. ఇలా ఈ లిస్ట్ పెద్దగానే ఉంటోంది. పిల్లలు పొద్దున్న లేవగానే తుమ్మారంటే ఒక మాత్ర, ఒళ్ళు వెచ్చగా ఉంటే మరో మాత్ర, దగ్గితే ఒక సిరప్, నీరసంగా ఉంది అన్నారంటే ఇంకో టానిక్.. ఇలా మనమే రకరకాల మందులు మనం వేసుకుంటున్నాం, స్కూల్ పోతుందేమో అనే భయంతో పిల్లలకి కూడా ఎలా పడితే అలా వేసేస్తూనే ఉన్నాం. వీటిని డాక్టర్ ప్రిస్క్రిప్షన్ లేకుండా వాడితే వచ్చే సైడ్ ఎఫెక్ట్స్ చాలా ఎక్కువగా ఉంటాయి.

పిల్లల విషయంలో

అసలు నిజానికి పిల్లలకి సంబంధించి జలుబు, దగ్గు మందులు పెద్దగా పనిచేయవట. పైగా అందులో ఉండే కొన్ని ఇంగ్రీడియెంట్స్‌కి సీరియస్ సైడ్ ఎఫెక్ట్స్ కూడా ఉండొచ్చు. ఎందుకంటే ఏ మందులో ఏ ఇంగ్రీడియెంట్ ఉందో మనకి తెలియదు. అదే ఇంగ్రీడియెంట్ జలుబు మందులోనూ ఉండచ్చు, దగ్గు మందులోనూ ఉండొచ్చు. మనం రెండూ కలిపి వేశామంటే అది ఓవర్ డోస్ అయిపోతుంది. అలాగే, ఈ మందులు రకరకాల లక్షణాలని తగ్గించే విధంగా ఉంటాయి. మన పిల్లలకి ఆ లక్షణం లేకపోతే ఆ మందు అనవసరమేగా. ఇంకో విషయం ఏమిటంటే ఈ మందులు లక్షణాలని తగ్గిస్తాయి తప్ప, అసలు ఆ దగ్గో, జలుబో ఎందుకొచ్చిందో ఆ మూల కారణాన్ని మాత్రం తగ్గించవు. మనం ముందూ వెనకా చూడకుండా వేసే ఈ మందులు ఒకోసారి ఎంతో సీరియస్ కాంప్లికేషన్స్‌ని కలిగిస్తాయి.

అనవసరంగా మందులు వాడితే

పిల్లలతో మందులు ఎక్కువగా వాడితే కొన్ని సమస్యలు వచ్చే అవకాశం ఉంది. అందులో

మసకగా కనిపించడం

కళ్ళు తిరిగినట్లుగా ఉండడం

కన్‌ఫ్యూజన్

విపరీతంగా చెమట పోయడం

వికారంగా ఉండడం

వాంతులు అవ్వడం

కడుపునొప్పి

బీపి ఎక్కువ కావడం

హార్ట్‌బీట్ ఇర్రెగ్యులర్‌గా ఉండడం

ముఖం ఎర్రగా మారడం

కూర్చోలేక నుంచోలేక రెస్ట్‌లెస్‌గా ఫీల్ అవ్వడం

ఏం చేయాలి

మనం ఒకప్పుడు ఇంట్లో పాటించే చిట్కాలన్నీ బాగానే పని చేస్తాయి. అలాంటి చిట్కాలని ఫాలో అవ్వొచ్చు.

1. వెచ్చగా ఏమైనా తాగించాలి. సూప్, జావ వంటివి మంచివి. తాగితే టీ కూడా ఇవ్వొచ్చు. దీని వల్ల కఫం పల్చబడి బయటకు వచ్చేస్తుంది.2. నీరు ఎక్కువగా తాగించడం. 3. కూల్ మిస్ట్ హ్యుమిడిఫైయర్ వాడడం. దీని వల్ల ముక్కు, గొంతు ఎండిపోయినట్లుగా అవ్వకుండా ఉంటుంది. ఈ హ్యుమిడిఫైయర్ మీ పిల్లల పక్కకి దగ్గరగా ఉంచండి. అయితే వాడిన ప్రతిసారీ దీన్ని క్లీన్ చేయడం మాత్రం మర్చిపోకండి.

ముందు జాగ్రత్త

జలుబు, దగ్గు వచ్చాక ఏం చేయాలో సరే అది చేస్తాం. కానీ అసలు రాకుండా కూడా మనం కొన్ని విధాలుగా ట్రై చేయవచ్చు.

1. బయటకి వెళ్ళి వచ్చాక సబ్బు, నీరుతో చేతులు వాష్ చేసుకోవడం2. డైనింగ్ టేబుల్, టీవీ రిమోట్, ఫ్రిజ్ డోర్ లాంటి వాటిని రోజుకి రెండు సార్లు క్లీన్ చేయడం. దీని వల్ల వైరస్ స్ప్రెడ్ అవకుండా ఉంటుంది.3. తుమ్ము వచ్చినప్పుడు చెయ్యి అడ్డం పెట్టుకుని తుమ్మడం, వెంటనే ఆ చేతిని సబ్బుతో వాష్ చేసుకోవడం.4. మాటిమాటికీ ముక్కు నలుపుకోవడం, కంటి దగ్గరగా చేతులు పెట్టుకోవడం వంటి అలవాట్లు ఉంటే వాటిని వెంటనే మాన్పించడం5. ఎక్కువ మంది ఉండే ప్రదేశాలకి వెళ్ళేట్లైతే మాస్క్ పెట్టుకుని వెళ్ళడం.

డోస్ ముఖ్యం

ఆఫ్ట్రాల్, జలుబు, దగ్గే కదా దీనికి ఇంత చేయాలా, ఒక చెంచా దగ్గు మందుకి ఏమవ్వదులే అని మాత్రం అనుకోకండి. డాక్టర్ ఒక టీ స్పూన్ సిరప్ అని చెప్పారనుకుందాం. మన ఇంట్లో రకరకాల సైజుల్లో స్పూన్లు ఉంటాయి. ఈ పూట వేసిన స్పూన్ తో ఇంకో పూట మందు వెయ్యం. ఏదో స్పూన్‌తో ఎంతో కొంత మందు పిల్లల నోట్లొ పోసేస్తూ ఉంటాం. ఒక్క విషయం గుర్తు పెట్టుకోండి. మనం సరైన మందు సరైన డోస్ లో వేయకపోతే పిల్లల ప్రాణాలకే ప్రమాదం. కాబట్టి, డోస్ మర్చిపోవద్దు.