అమెరికాకు షాకిచ్చిన రష్యా.. కీలక ఒప్పందం రద్దు

రష్యా- ఉక్రెయిన్ యుద్ధాన్ని ఆపాలని అమెరికా చేస్తున్న ప్రయత్నాలు సఫలం అయ్యేలా కనిపించడం లేదు. యుద్ధం విషయంలో రష్యా అధ్యక్షుడు పుతిన్‌ వ్యవహరిస్తోన్న తీరుపై అమెరికా గుర్రుగా ఉంది. ఈ నేపథ్యంలో అమెరికాకు ఆగ్రహం తెప్పించే మరో పని చేశారు పుతిన్. అమెరికా, రష్యా మధ్య ఉన్న ప్లుటోనియం ఒప్పందాన్ని రద్దు చేశారు. దీనికి సంబంధించిన చట్టంపై రష్యా అధ్యక్షుడు తాజాగా సంతకం చేశారు. పుతిన్ నిర్ణయంతో ప్లుటోనియంపై ఉన్న పరిమితులు తొలగిపోయినట్ల అయింది. అణ్వాయుధాలు ఇష్టారీతిన అభివృద్ధి చేయాడానికి మార్గం సుగమం అయింది. దీంతో ఇరు దేశాల మధ్య మళ్లీ న్యూక్లియర్ టెన్షన్ మొదలైంది.

ఈ ప్లుటోనియం ఒప్పందానికి సంబంధించిన బిల్లుకు.. ఈ నెల ప్రారంభంలోనే రష్యా పార్లమెంట్ దిగువ సభ ఆమోదం తెలిపింది. గత బుధవారం ఫెడరల్ కౌన్సిల్ ఆమోద ముద్ర వేసింది. పుతిన్ సంతకంతో చట్టం అమలులోకి వచ్చింది. అయితే ఈ ప్లుటోనియం ఒప్పందం అమెరికా, రష్యా మధ్య 2000 సంవత్సరంలో జరిగింది. 2010లో ఈ ఒప్పందానికి కొన్ని సవరణలు చేశారు. దీని ప్రకారం.. అమెరికా, సోవియెట్ యూనియన్ కోల్డ్ వార్ తర్వాత.. ఇరు దేశాలు తమ వద్ద నిల్వ ఉన్న 34 మెట్రిక్‌ టన్నుల ప్లుటోనియంను.. అణ్వాయుధాల తయారీకి కాకుండా.. పౌర అణు విద్యుత్‌ కోసం ఉపయోగించేలా ఒప్పందం కుదిరింది. దీని వల్ల దాదాపు 17,000 అణ్వాయుధాలు తయారు కాకుండా అడ్డుకున్నట్లు అవుతుందని యూఎస్ అప్పట్లో చెప్పింది.

ఈ క్రమంలోనే 2016లో అప్పటి అమెరికా అధ్యక్షుడు బరాక్‌ ఒబామా సమయంలో.. ఇరు దేశాల సంబంధాలకు బీటలు వారాయి. దీంతో ఈ డీల్ అమలును రష్యా నిలిపివేసింది. తాజాగా ఈ అగ్రిమెంట్‌ను పూర్తిగా రద్దు చేస్తూ పుతిన్ నిర్ణయం తీసుకున్నారు. ఉక్రెయిన్‌తో బీకర యుద్ధం జరుగుతున్న వేళ.. రష్యా మళ్లీ అణ్వాయుధాలను భారీగా పెంచుకునే అవకాశాలు ఉన్నట్లు నిపుణులు ఆందోళన వ్యక్తం చేస్తున్నారు.

ఇటీవల రష్యా అణుశక్తితో నడిచే ‘బురెవెస్ట్‌నిక్‌’ క్రూజ్‌ మిస్సైల్‌ను టెస్ట్ చేసింది. దీనిపై ట్రంప్‌ ఆగ్రహం వ్యక్తం చేశారు. తమతో ఆటలొద్దు అని.. తమ సబ్‌మెరైన్‌లు రష్యాకు దగ్గర్లోనే ఉన్నాయని హెచ్చరించారు. అంతేకాకుండా వారంలో ముగించాల్సిన యుద్ధాన్ని నాలుగేళ్లకు తీసుకొచ్చారని విమర్శించారు. ఇప్పటికైనా ఇలాంటి రెచ్చగొట్టే క్షిపణి పరీక్షలు ఆపి.. ఉక్రెయిన్‌తో యుద్ధం ముగించేలా చర్యలు తీసుకోవాలని హితవు పలికారు. ఇదిలా ఉండగా.. బురెవెస్ట్‌నిక్‌ క్రూజ్‌ క్షిపణిని మోహరింపుకు అవసరమైన మౌలిక సదుపాయాలను సిద్ధం చేయాలని.. సైనికాధికారులను పుతిన్ కోరడం గమనార్హం.