షెహబాజ్ షరీఫ్ పరువు తీసిన పాక్ మాజీ దౌత్యవేత్త

సమయం దొరికితే చాలు.. అగ్రరాజ్యం అమెరికా అధ్యక్షుడు డొనాల్డ్ ట్రంప్‌పై ప్రశంసల వర్షం కురిపించడం పాకిస్థాన్ ప్రధాన మంత్రి షెహబాజ్ షరీఫ్‌కు అలవాటుగా మారింది. ఈ అతి పొగడ్తల వ్యవహారంపై పాకిస్థాన్ మాజీ దౌత్యవేత్త, అమెరికాలో మాజీ రాయబారిగా పని చేసిన హుస్సేన్ హక్కానీ తీవ్రంగా స్పందించారు. అంతర్జాతీయ వ్యాప్తంగా ఆయన పరువు తీసే ప్రయత్నం చేశారు. ముఖ్యంగా ట్రంప్‌ను ప్రశంసించే వారికోసం ప్రపంచ స్థాయిలో ఒలింపిక్స్ పోటీలు ఏర్పాటు చేస్తే.. అందులో పాక్ ప్రధాని షెహబాజ్ షరీఫ్‌కు స్వర్ణ పతకం రావడం ఖాయమని అన్నారు.

ఇటీవల ఇజ్రాయెల్, హమాస్‌ల మధ్య జరిగిన ఘర్షణకు సంబంధించి ఈజిప్ట్‌లోని షర్మ్-ఎల్‌-షేక్‌లో జరిగిన శాంతి ఒప్పందం కార్యక్రమంలో షెహబాజ్ షరీఫ్ పాల్గొన్నారు. ఈ వేదికను సైతం ట్రంప్‌ను ఆకాశానికెత్తడానికి ఆయన ఉపయోగించుకున్నారు. గాజాలో శాంతి నెలకొనడానికి ట్రంప్ చేసిన అవిశ్రాంత ప్రయత్నాలే కారణమని షరీఫ్ పేర్కొన్నారు. ట్రంప్ తన అపారమైన కృషి ద్వారా ప్రపంచం శాంతి, శ్రేయస్సుతో జీవించేలా చేశారని ప్రశంసించారు. ఆయన చేసిన కృషిని గౌరవిస్తూ.. ట్రంప్‌కు నోబెల్ శాంతి బహుమతి ఇవ్వడానికి ఆయన సంపూర్ణంగా అర్హుడని తెలిపారు.

అంతేకాకుండా గతంలో భారత్-పాకిస్థాన్‌ల మధ్య ఉద్రిక్తతలుచోటుచేసుకున్నప్పుడు.. ఆ ఘర్షణను ఆపడానికి కూడా ట్రంప్ కృషి చేశారంటూ షరీఫ్ క్రెడిట్ ఇచ్చారు. ఇటీవల కుదిరిన థాయ్‌లాండ్‌-కంబోడియాల కాల్పుల విరమణ ఒప్పందం వెనుక కూడా అమెరికా పాత్ర ఉందని ఆయన ప్రశంసించడం గమనార్హం. అయితే ప్రధాని షెహబాజ్ షరీఫ్ పదేపదే అమెరికా అధ్యక్షుడిని ఇలా పొగడడంపై స్వదేశంలోనే పెద్ద ఎత్తున విమర్శలు ఎదుర్కొన్నారు. పాకిస్థాన్ ప్రజలు, విశ్లేషకులు ఈ వైఖరిని తీవ్రంగా వ్యతిరేకిస్తున్నారు. ట్రంప్ చేతిలో షరీఫ్ ఒక కీలుబొమ్మలా మారారని.. దేశ ప్రయోజనాలను పణంగా పెట్టి అమ్మేశారని ఆరోపిస్తూ అక్కడి ప్రజలు ఆగ్రహం వ్యక్తం చేశారు.

ఒక విదేశీ మాజీ అధ్యక్షుడిని ఇంతగా పొగడాల్సిన అవసరం పాకిస్థాన్ ప్రధానికి ఏముందని నిలదీశారు. పాకిస్థాన్‌కు చెందిన ప్రముఖ చరిత్రకారుడు అమర్ అలీ జాన్ సైతం ఈ విషయంపై స్పందిస్తూ.. షరీఫ్ సమయం దొరికినప్పుడల్లా అనవసరంగా ట్రంప్‌ను ప్రశంసిస్తుండడం పాకిస్థానీయులకు ఇబ్బందికరంగా ఉందంటూ సోషల్ మీడియా వేదికగా వ్యాఖ్యానించారు. ఈ క్రమంలోనే హక్కానీ ఈ వ్యాఖ్యలు చేయడంతో.. అంతర్జాతీయ వ్యాప్తంగా ఈ కామెంట్లు వైరల్ అయ్యాయి.