భారతీయ యువతిపై అత్యాచార ఘటన.. పోలీసులకు చిక్కిన ఆ జాత్యహంకారి

భారత సంతతి మహిళపై అత్యాచారానికి పాల్పడిన జాత్యంహకారిని యూకే పోలీసులు అరెస్ట్ చేశారు. ఉత్తర ఇంగ్లాండ్‌లోని వాల్సల్‌లో స్థానిక కాలమానం ప్రకారం అక్టోబరు 25న శనివారం రాత్రి భారత సంతతి యువతిపై నిందితుడు అత్యాచారానికి తెగబడిన విషయం తెలిసిందే. సీసీటీవీ ఫుటేజ్ ఆధారంగా నిందితుడి కోసం గాలించి, అరెస్ట్ చేశామని బ్రిటన్ పోలీసులు తెలిపారు. ఈ కేసును పర్యవేక్షిస్తున్న డిటెక్టివ్ సూపరింటిండింట్ రోమన్ టైర్ మాట్లాడుతూ.. గత నెల వాల్సాల్‌కు 20 కిలోమీటర్ల దూరంలో ఉన్న ఓల్డ్‌బరీలో భారత సంతతి బ్రిటన్ మహిళపై అత్యాచార ఘటనలో ఈ అరెస్టు కీలక పరిణామంగా భావిస్తున్నామని తెలిపారు. ఆ ఘటనలో ఇద్దరు అనుమానితులను అరెస్టు చేశాము కానీ తరువాత బెయిల్‌పై విడుదలయ్యారని బీబీసీ గత వారం తెలిపింది.

‘మా దర్యాప్తు కొనసాగుతోంటుంది.. దాడికి గురైన బాధితురాలికి మా మద్దతు ఉంటుంది.. ఆమెకు ఈ అరెస్టు గురించి సమాచారం ఇచ్చాం... ప్రత్యేక శిక్షణ పొందిన అధికారుల నుంచి పూర్తి సహాయాన్ని ఆమెకు నిరంతరం అందిస్తూనే ఉంటాం’ అని టైర్ పేర్కొన్నారు. ఈ దశలో దాడిని ఇతర దాడులతో ముడిపెట్టాలనుకోవడం లేదు" అని ఆయన తెలిపారు.

యూకే సిక్కు సమాజం ప్రకారం.. బాధితురాలు పంజాబ్‌ సంతతి మహిళ. బాధితురాలు ఇంటి తలుపు బద్దలుకొట్టి మరీ నిందితుడు అత్యాచారానికి పాల్పడ్డాడని తెలిపాయి. గత నెల ఓల్డ్‌బరీ ప్రాంతంలోనూ ఓ సిక్కు యువతిపై ఇదే తరహాలో లైంగిక దాడి చోటుచేసుకుంది. వరుస ఈ ఘటనలపై పశ్చిమ మిడ్‌లాండ్స్ ప్రాంతానికి చెందిన సిక్కు మహిళ, బ్రిటిష్ లేబర్, కో-ఆపరేటివ్ ఎంపీ ప్రీత్ కౌర్ గిల్ తీవ్రంగా స్పందించారు. వాల్సాల్ అత్యాచార ఘటన తన షాక్‌కు గురిచేసిందని ఆమె అన్నారు. ‘మన ప్రాంతంలో మహిళలపై జరుగుతున్న హింస, దానికి ద్వేషం, జాతి వివక్షత వంటివి తోడవడం కలవరపెడుతోంది’ అని ఆమె ఎక్స్ ( ట్విట్టర్)లో పోస్ట్ పెట్టారు.

వాల్సాల్ పోలీస్ చీఫ్ ఫిల్ డోల్బీ మాట్లాడుతూ.. ‘మా బృందం దృష్టి దాడిచేసిన వ్యక్తిని గుర్తించి అరెస్టు చేయడంపై కేంద్రీకృతమై ఉంది’ అని అన్నారు. ‘వాల్సాల్ ఒక విభిన్న సామాజిక నిర్మాణం కలిగిన ప్రాంతం. ఈ దారుణమై దాడి మన సమాజాల్లో భయాన్నీ ఆందోళననూ కలిగిస్తుందని మాకు తెలుసు. ప్రజలతో మాట్లాడి వారి ఆందోళనలను విన్నాం, అర్థం చేసుకున్నాం. రాబోయే రోజుల్లో పోలీసుల భద్రత మరింత పెరుగుతుంది’ అని ఆయన తెలిపారు