టీనేజ్ యువత తెగ వాడుతున్న పదం ఇదే.. ఆగ్రహం వ్యక్తం చేస్తున్న పెద్దలు

మిలీనియల్స్, జనరేషన్ జడ్ యువత.. టీనేజీలో ఉన్న సమయంలో.. కామిక్స్ బుక్స్, కొన్ని కార్టూన్ షోల ట్రెండ్ నడిచేది. కానీ జనరేషన్ ఆల్ఫాకి వచ్చేసరికి పూర్తిగా మారిపోయింది. అసలు ట్రెండ్ ఎందుకు నడుస్తుందో.. దానర్థం ఏంటో కూడా చాలా మందికి తెలియట్లేదు. తాజాగా టీనేజర్లు ఎక్కువగా ఏ పదం వాడుతున్నారో తెలిసిపోయింది. ఈ మేరకు ప్రముఖ ఆన్‌లైన్ డిక్షనరీ వెబ్‌సైట్‌ ‘డిక్షనరీ.కామ్‌’.. 67 నంబర్‌ను 2025కి వర్డ్ ఆఫ్ ది ఇయర్‌గా ప్రకటించింది. ఈ నంబర్ టీనేజీ యువకులకు.. టీనేజ్‌లోకి అడుగుపెట్టబోతున్న నోళ్లలో తెగనానుతోందట.

పెద్దల ఆగ్రహం..

కాగా, 30 ఏళ్లు పైబడిన జనరేషన్ వై, జెన్‌జీ.. అసలు దీని అర్థం ఏమిటని ఆశ్చర్యపోతున్నారు. 67 నంబర్‌ను డిక్షనరీలో చేర్చడం ఏంటని మరికొందరు ప్రశ్నిస్తున్నారు. ఈ కాలం పిల్లలు ఇంటర్నెట్‌లో వేసే జోకులు.. ఇంగ్లీష్‌ భాషనే నాశనం చేస్తున్నాయని ఆగ్రహం వ్యక్తం చేస్తుండటం గమనార్హం. ఇక్కడ ఇంకో ట్విస్ట్, 67ను.. కలిపి చదవకూడదట. ‘సిక్స్‌సెవెన్’ అని చదవాలట. వింతగా అనిపిస్తోంది కదూ!

జెనరేషన్ ఆల్ఫా అంటే 2010 నుంచి 2025 మధ్య జన్మించినవారు. ఈ జెన్ ఆల్ఫా.. 67 పదాన్ని ఎందుకు విపరీతంగా వాడుతున్నారో అర్థంకాక పెద్దలు తలపట్టుకుంటున్నారు. ఎందుకిలా చేస్తున్నారో క్లారిటీ లేదు. అయితే కొందరు మాత్రం దీనికి ఏ అర్థం లేదని.. ఏదో ఊరికే అలా వాడేపదం అని అంటున్నారు. కాగా, దీనిని నిర్వచించడం కష్టమని అని చెప్పిన డిక్షనరీ.కామ్.. ఇది రెండు చేతులతో చేసే సంజ్ఞ అని తెలిపింది. అమెరికా ర్యాపర్ స్క్రిల్లా పాడిన డ్రిల్ సాంగ్‌ డూట్ డూట్ నుంచి నుంచి ఈ పదం పుట్టినట్లు చెప్పింది.

స్క్రిల్లా పాడిన డ్రిల్ పాటలో 67 నంబర్.. హుక్ వర్డ్‌గా వినిపిస్తుంది. బహుశా అప్పటి నుంచే ఈ నంబర్‌ను ఎక్కువగా ఉపయోగిస్తోందనే అభిప్రాయం వ్యక్తమవుతోంది. కాగా, టీనేజీ యువత 67ను విపరీతంగా ఉపయోగిస్తుండటంతో.. దీన్ని ఎలా ఆపాలి అంటూ ఉపాధ్యాయులు నెట్టింట్లో పోస్టులు పెడుతుండటం గమనార్హం. పలువురు స్పందిస్తూ.. టిప్స్ కూడా చెబుతున్నారు.

కాగా, 67 నంబర్ మాత్రమే కాకుండా ఆరాఫార్మింగ్‌ , బ్రోలిగార్కీ, ట్రాడ్‌వైఫ్, క్లాంకర్, జెన్ జీ, కిస్‌కామ్, డైనమైట్ ఎమోజీ , ఓవర్‌టూరిజం వంటి పదాలతో పాటు ట్రంప్ ఆడుతున్న టారిఫ్ గేమ్ లోంచి టారిఫ్ కూడా.. 2025కి వర్డ్ ఆఫ్ ది ఇయర్‌గా పోటీ పడ్డాయి. కానీ 67 నంబర్‌ ముందు నిలబడలేకపోయాయి. ఈసారి నంబర్.. వచ్చే ఏడాది ఎమోజీలను కూడా వర్డ్ ఆఫ్ ది ఇయర్‌గా ప్రకటిస్తారేమో అని నెటిజన్లు సెటైర్లు పేలుస్తున్నారు.