దొంగతనాలు చేస్తూ పట్టుబడ్డ టీవీ నటి.. 3 ఏళ్లలో రెండోసారి అరెస్ట్

ఒకప్పుడు బుల్లి తెరపై సీరియల్ ద్వారా అభిమానులను సంపాదించుకున్న టీవీ నటి రూప దత్తా మరోసారి దొంగతనం ఆరోపణలతో వార్తల్లో నిలిచింది. ప్రముఖ హిందీ సీరియల్ 'జై మా వైష్ణో దేవి'లో నటించిన టీవీ నటి రూప దత్తా మరోసారి దొంగతనం ఆరోపణల కేసులో కోల్‌కతా పోలీసులకు పట్టుబడింది. జేబు దొంగతనాలకు పాల్పడినందుకు 2022లో అరెస్ట్ అయిన రూప దత్తా.. మూడేళ్ల వ్యవధిలోనే మరోసారి దొంగతనం కేసులో చిక్కుకుని కటకటాల వెనక్కి వెళ్లారు. పోస్తా మార్కెట్ ప్రాంతంలో జరిగిన చోరీ కేసులో ఆమెను కోల్‌కతా పోలీసులు అరెస్ట్ చేశారు.

కోల్‌కతాలోని పోస్తా పోలీస్ స్టేషన్ పరిధిలోని ఆది బస్తాలా లేన్ ప్రాంతంలో ఒక మహిళ బ్యాగ్‌లో నుంచి నగదు, బంగారు ఆభరణాలు చోరీ అయ్యాయని పోలీసులకు ఫిర్యాదు అందింది. అక్టోబర్ 15వ తేదీన మధ్యాహ్నం 4:15 నుంచి 4:30 గంటల మధ్య పోస్తాలోని ఒక షాపు వద్ద ఈ దొంగతనం జరిగిందని బాధితురాలు ఫిర్యాదు చేసింది. బాధితురాలు దీపా అగర్వాల్ తన హ్యాండ్ బ్యాగ్‌లో సుమారు 2 తులాల బంగారు మంగళసూత్రం, 21 గ్రాముల వైష్ణో దేవి లాకెట్‌తో కూడిన గోల్డ్ చైన్, 13 గ్రాములు, 9 గ్రాముల బరువున్న రెండు బంగారు బ్రాస్‌లెట్‌లు, రూ. 4 వేల నగదు ఉన్నాయని.. వాటిని ఎవరో దొంగిలించినట్లు పోలీసులకు తెలిపింది.

వెంటనే ఆ ప్రాంతంలోని సీసీటీవీ ఫుటేజీలను పరిశీలించిన పోలీసులు.. టెక్నాలజీ, విశ్వసనీయ సమాచారం ఆధారంగా డిటెక్టివ్ డిపార్ట్‌మెంట్ బృందం బుధవారం రాత్రి బురబజార్ పోలీస్ స్టేషన్ పరిధిలోని నందారాం మార్కెట్ సమీపంలో రూప దత్తాను పట్టుకుని అరెస్ట్ చేశారు. ఈ కేసు దర్యాప్తులో భాగంగా నటి రూపా దత్తా గోర్చా రోడ్డులోని ఇంటి నుంచి దొంగిలించబడిన 63 గ్రాముల బంగారు ఆభరణాలను స్వాధీనం చేసుకున్నట్లు కోల్‌కతా జాయింట్ సీపీ (క్రైమ్ అండ్ ట్రాఫిక్) రూపేష్ కుమార్ తెలిపారు. విచారణలో ఆమె టీవీ నటి అని తెలిసినట్లు పేర్కొన్నారు.

గురువారం సాయంత్రం అరెస్ట్ అయిన రూప దత్తాను స్థానిక కోర్టులో హాజరుపరచగా.. కోర్టు ఆమెకు నవంబర్ 7వ తేదీ వరకు పోలీస్ కస్టడీకి పంపించింది. ఈ కేసులో తదుపరి విచారణకు సంబంధించిన సీసీటీవీ దృశ్యాలు కీలకం కానున్నాయని పోలీసులు తెలిపారు. అయితే ఇలా దొంగతనం కేసులో రూప దత్తా అరెస్ట్ కావడం ఇదేం మొదటిసారి కాదు. 2022లో కూడా ఆమె ఇలాంటి కేసులోనే అరెస్ట్ అయ్యారు. 2022లో కోల్‌కతా బుక్ ఫెయిర్‌లో జేబు దొంగతనం చేస్తూ ఆమె పట్టుబడింది.

చెత్తబుట్టలో వాలెట్‌ను పడేసి వెళ్లిపోతుండగా పోలీసులు ఆమెను అరెస్ట్ చేశారు. ఆ సమయంలో ఆమె బ్యాగ్‌లో రూ. 75 వేల నగదుతో పాటు అనేక పర్సులను స్వాధీనం చేసుకున్నారు. బెంగాలీ సినిమా పరిశ్రమలో సుపరిచితురాలైన రూప దత్తా.. హిందీ సీరియల్ ‘జై మా వైష్ణో దేవి’తో పాటు కొన్ని బెంగాలీ సినిమాల్లో కూడా నటించారు.