సూపర్ మార్కెట్‌లో భారీ పేలుడు.. 23 మంది దుర్మరణం

 నార్త్‌వెస్ట్ మెక్సికోలోని హెర్మోసిల్లో నగరంలో ఊహించని ఘోర విషాదం చోటుచేసుకుంది. నగరంలోని ప్రముఖ వాల్డోస్ సూపర్ మార్కెట్‌లో భారీ పేలుడు సంభవించింది. దీంతో ఒక్కసారిగా మంటలు చెలరేగాయి. క్షణాల్లోనే సూపర్ మార్కెట్ మొత్తం మంటలు వ్యాపించగా.. అందులో ఉన్న వారంతా తీవ్ర భయాందోళనకు గురయ్యారు. కొందరు బయటకు పరుగులు పెట్టి ప్రాణాలు కాపాడుకున్నా.. 23 మంది మాత్రం అందులోనే చిక్కుకుపోయి దుర్మరణం పాలయ్యారు. మృతుల్లో చిన్నారులు కూడా ఉన్నట్లు అక్కడి మీడియా సంస్థలు తెలియజేస్తున్నాయి.

ఈ ఘోర ప్రమాదం మధ్యాహ్నం 2 గంటల ప్రాంతంలో జరిగింది. పేలుడు సంభవించిన వెంటనే మంటలు వేగంగా వ్యాపించడంతో.. మార్కెట్ లోపల ఉన్న చాలామంది కస్టమర్‌లు అక్కడే చిక్కుకుపోయారు. మంటల ధాటికి వారు బయటకు రాలేకపోవడంతో విషాదం తీవ్రమైందని స్థానిక మీడియా నివేదించింది. అలాగే సహాయక చర్యల్లో సోనోరా రెడ్ క్రాస్‌కు చెందిన 40 మంది సిబ్బంది, 10 అంబులెన్స్‌లు చురుకుగా పాల్గొని.. క్షతగాత్రులను ఆసుపత్రులకు తరలించాయి. ప్రమాదం జరిగిన ప్రదేశం వద్ద పబ్లిక్‌ను తిరగకుండా పోలీసులు హెచ్చరికలు జారీ చేశారు. ప్రస్తుతం అధికారులు ఈ సంఘటనపై పూర్తి స్థాయిలో దర్యాప్తు చేస్తున్నారు.

మరోవైపు ఈ ఘటనపై స్పందించిన సోనోరా గవర్నర్ అల్ఫోన్సో దురాజో.. మృతుల సంఖ్యను 23గా ధృవీకరించారు. మరణించిన వారిలో 12 మంది మహిళలు, ఐదుగురు పురుషులు, నలుగురు బాలురు, ఇద్దరు బాలికలు ఉన్నట్లు తెలిపారు. మరణించిన వారిలో మైనర్లు కూడా ఉన్నారని.. ఇది విషాదకరమైన రోజు అని ఆయన ఎక్స్ వేదికగా తెలిపారు. అలాగే క్షతగాత్రులను సమీప ఆసుపత్రుల్లో చేర్చామని ప్రస్తుతం వారికి మెరుగైన చికిత్స అందుతోందని చెప్పారు. ఘటనపై పూర్తి స్థాయి దర్యాప్తు ప్రారంభించామన్నారు. పేలుడు తర్వాత అత్యవసర సేవా బృందాలు తక్షణమే స్పందించి మంటలను అదుపులోకి తెచ్చాయని గవర్నర్ పేర్కొన్నారు.

రాష్ట్ర అటార్నీ జనరల్ గుస్తావో సాలాస్ ప్రాథమిక నిర్ధారణ ప్రకారం.. ఈ విషాదానికి ప్రధాన కారణం పేలుడు తర్వాత వచ్చిన విషపూరిత వాయువులే అని.. వాటిని పీల్చడం వల్లే వీరంతా ప్రాణాలు కోల్పోయినట్లు స్పష్టం చేశారు. అయితే, ఈ అగ్నిప్రమాదానికి గల ఖచ్చితమైన కారణం ఇంకా తెలియరాలేదని నగర అగ్నిమాపక దళం పేర్కొంది. ఈ ఘటన వెనుక హింసాత్మక కోణం లేదని.. ఇది దాడి కాదని అధికారులు స్పష్టం చేశారు.

ఈ ఘోర ప్రమాదంపై మెక్సికో అధ్యక్షురాలు క్లాడియా షీన్‌బామ్ తీవ్ర సంతాపం వ్యక్తం చేశారు. మృతుల కుటుంబాలకు తన ప్రగాఢ సానుభూతిని తెలియజేస్తూ.. బాధిత కుటుంబాలకు అవసరమైన మద్దతు అందించడానికి గవర్నర్ దురాజోతో సంప్రదింపులు జరుపుతున్నట్లు తెలిపారు. అంతేకాకుండా బాధితులకు సహాయం అందించడానికి ఒక ప్రత్యేక బృందాన్ని పంపాలని అంతర్గత వ్యవహారాల కార్యదర్శిని ఆదేశించారు.