12 నెలల పాటు చాట్‌జీపీటీ గో సబ్‌స్క్రిప్షన్ ఉచితం

ప్రముఖ ఆర్టిఫిషియల్ ఇంటెలిజెన్స్ సంస్థ ఓపెన్‌ఏఐ భారత యూజర్లకు ఓ బంపర్ ఆఫర్ ప్రకటించింది. తన పాపులర్ ఏఐ టూల్ అయిన చాట్‌జీపీటీకి చెందిన 'చాట్‌జీపీటీ గో' సబ్‌స్క్రిప్షన్‌ను 12 నెలల పాటు పూర్తిగా ఉచితంగా అందించనున్నట్లు తెలిపింది. ఈ ప్రత్యేక ప్రమోషన్ నేటి  నుంచి ప్రారంభమవుతుంది. వేగంగా అభివృద్ధి చెందుతున్న భారత ఏఐ మార్కెట్‌ను లక్ష్యంగా చేసుకుని ఈ ఆఫర్‌ను తీసుకొచ్చింది.చాట్‌జీపీటీ గో అనేది ఉచిత ప్లాన్‌కు, ప్రీమియం 'ప్లస్' ప్లాన్‌కు మధ్య ఉండే ఒక మిడ్-రేంజ్ సబ్‌స్క్రిప్షన్. దీని ద్వారా యూజర్లు అత్యంత శక్తివంతమైన జీపీటీ-5 మోడల్‌ను యాక్సెస్ చేయవచ్చు. దీంతోపాటు, ఇమేజ్‌లను రూపొందించడం, డాక్యుమెంట్లు, స్ప్రెడ్‌షీట్ల వంటి ఫైల్స్‌ను అప్‌లోడ్ చేసి విశ్లేషించడం, అడ్వాన్స్‌డ్ డేటా అనాలిసిస్ టూల్స్ వంటి ఎన్నో ప్రీమియం ఫీచర్లు ఇందులో ఉన్నాయి. కస్టమ్ జీపీటీలను తయారుచేసుకునే సౌలభ్యం కూడా లభిస్తుంది. సాధారణంగా ఇవి పెయిడ్ ప్లాన్‌లలో మాత్రమే అందుబాటులో ఉంటాయి.భారత్‌లో నివసిస్తున్న కొత్త యూజర్లు, ఇప్పటికే ఉచిత ప్లాన్ వాడుతున్న వారు, ప్రస్తుతం 'గో' సబ్‌స్క్రిప్షన్‌లో ఉన్నవారు కూడా ఈ ఆఫర్‌కు అర్హులు. అయితే ప్లస్, ప్రో వంటి హై-ఎండ్ ప్లాన్లలో ఉన్నవారు తమ సబ్‌స్క్రిప్షన్‌ను రద్దు చేసుకుని, బిల్లింగ్ సైకిల్ ముగిసే వరకు వేచి ఉండాలి. ఆఫర్ పొందాలంటే క్రెడిట్ కార్డ్ లేదా యూపీఐ వివరాలను అందించాలి, కానీ 12 నెలల పాటు ఎలాంటి రుసుము వసూలు చేయరు. వెబ్, ఆండ్రాయిడ్ యాప్ ద్వారా ఈ ఆఫర్‌ను రీడీమ్ చేసుకోవచ్చు. ఐఓఎస్ యూజర్లకు రాబోయే వారంలో అందుబాటులోకి రానుంది.12 నెలల ఉచిత గడువు ముగిసిన తర్వాత, ప్రతి నెలా రూ.399 ఆటోమేటిక్‌గా ఛార్జ్ అవుతుంది. యూజర్లు కోరుకుంటే గడువు ముగిసేలోపు ఎప్పుడైనా సబ్‌స్క్రిప్షన్‌ను రద్దు చేసుకోవచ్చు. ఈ ఆఫర్ పరిమిత కాలం మాత్రమే అందుబాటులో ఉంటుందని, ఒక్కో ఖాతాకు ఒక్కసారి మాత్రమే వర్తిస్తుందని ఓపెన్‌ఏఐ స్పష్టం చేసింది.