ఇండియా మోస్ట్ వాంటెడ్ గ్యాంగ్‌స్టర్లు అమెరికాలో అరెస్ట్

భద్రతా బలగాలకు భారీ విజయం లభించింది. విదేశాల నుంచి కార్యకలాపాలు నిర్వహిస్తోన్న ఇద్దరు మోస్ట్ వాంటెడ్ గ్యాంగ్‌స్టర్ లు అమెరికాలో అరెస్టయ్యారు. గ్యాంగ్‌స్టర్ వెంకటేశ్ గార్గ్‌ను జార్జియాలోనూ.. కరుడగట్టిన లారెన్స్ బిష్ణోయ్ ముఠా సభ్యుడు భాను రాణాను అమెరికాలోనూ హర్యానా పోలీసులు సహా భద్రతా అధికారులు అరెస్ట్ చేశారు. గార్గ్, రాణాలను త్వరలోనే భారత్‌కు తీసుకురానున్నారు. ప్రస్తుతం భారత్‌కు చెందిన రెండు డజన్లకుపైగా గ్యాంగ్‌స్టర్లు విదేశాల్లో ఉంటూ రిక్రూట్‌మెంట్లు, క్రిమినల్ సిండికేట్లను నడుపుతూ తమ కార్యకలాపాలను సాగిస్తున్నారు.

బీఎస్పీ నేత హత్య కేసులో ఆరోపణలు ఎదుర్కొంటున్న వెంకటేశ్ గార్గ్‌‌ ప్రస్తుతం జార్జియాలో ఉన్నట్టు నిఘా వర్గాల ద్వారా సమాచారం అందింది. దీంతో అక్కడకు చేరుకున్న హర్యానా పోలీసులు సహా భద్రతా అధికారులు అదుపులోకి తీసుకున్నారు. గార్గ్ స్వస్థలం హర్యానాలోని నారాయణ్‌గఢ్. ప్రస్తుతం జార్జియాలో ఉంటోన్న అతడిపై దేశంలో పదికిపైగా క్రిమినల్ కేసులు ఉన్నాయి. హర్యానా, రాజస్థాన్, ఢిల్లీ సహా ఉత్తరాదిలో పలు రాష్ట్రాలకు చెందిన యువతను తమ ముఠా సభ్యులుగా చేర్చుకున్నాడు. గురుగ్రామ్‌లో బీఎస్పీ నేత హత్య అనంతరం గార్గ్ జార్జియాకు పారిపోయాడు. విదేశాల్లో ఉండే మరో గ్యాంగ్‌స్టర్ కపిల్ సాంగ్వన్‌తో కలిసి బెదిరింపుల సిండికేట్‌ను నడుపుతున్నాడు. ఈ ఏడాది అక్టోబరులో ఓ ఫామ్‌హౌస్‌లో బిల్డర్‌పై కాల్పుల కేసులో సాంగ్వన్‌ ముఠాకు చెందిన నలుగుర్ని ఢిల్లీ పోలీసులు అరెస్ట్ చేశారు.

ఇక, భాను రాణాకు లారెన్స్ బిష్ణోయ్ గ్యాంగ్‌తో సంబంధాలు ఉన్నాయి. అతడు కొన్నాళ్ల నుంచి అమెరికాలో ఉంటున్నాడు. హర్యానాలోకి కర్నాల్‌కు చెందిన రాణా చాలాకాలం నుంచి నేర ప్రపంచంలో చురుకుగా ఉన్నాడు. అతడిపై అనేక కేసులు నమోదయ్యాయి. హర్యానా, పంజాబ్, ఢిల్లీలకు అతడి నేర కార్యకలాపాలు విస్తరించాయి. పంజాబ్‌లో జరిగిన గ్రనేడ్ దాడి ఘటనపై విచారణ జరుగున్న సమయంలో రాణా పేరు బయటకు వచ్చింది. ఈ ఏడాది జూన్‌లో కర్నాల్ స్పెషల్ టాస్క్ ఫోర్స్ (ఎస్టీఎఫ్) ఇదే కేసులో ఇద్దర్ని అరెస్ట్ చేయగా.. వారు రాణా ఆదేశాలతో దాడిచేసినట్టు విచారణలో వెల్లడించారు.