పంచాయతీ ఎన్నికల్లో మాజీ ఎమ్మెల్యే ‘కేసీఆర్’.. సోషల్ మీడియాలో ఫుల్ క్రేజ్

హెడ్డింగ్ చూసి అదేంటి కేసీఆర్ మాజీ సీఎం కదా.. అలాంటి ఆయన సర్పంచ్ ఎన్నికల్లో పోటీ చేయడం ఏంటి అనుకుంటున్నారా.. అయినా సాధారణంగా రాజకీయాల్లో ముందు గ్రామ స్థాయిలో వార్డు మెంబర్, సర్పంచ్ ఆ తర్వాత ఎమ్మెల్యే, ఎంపీ కుదిరితే సీఎం స్థాయికి ఎదగాలని చూస్తారు. కానీ.. ఎమ్మెల్యేగా గెలిచిన వ్యక్తి.. మళ్లీ పంచాయతీ ఎన్నికల్లో పోటీ చేయడం ఏంటి.. అసలు ఈ వింత సంఘటన ఎక్కడ జరిగింది అని తెలుసుకోవాలనుకుంటున్నారా.. అయితే ఇది చదవండి.

మన మాజీ సీఎం కేసీఆర్‌కు ఎంత క్రేజ్ ఉందో.. కేరళకు చెందిన మాజీ ఎమ్మెల్యే కేసీఆర్‌కు ఆ రాష్ట్రంలో అంతే క్రేజ్ ఉంది. గతంలో ఎమ్మెల్యేగా చేసిన ఆయన ఇప్పుడు పంచాయతీ ఎన్నికల్లో తన అదృష్టాన్ని పరీక్షించుకునేందుకు రెడీ అవుతున్నారు. మాజీ ఎమ్మెల్యే అయిన ఆయన ఇలా సర్పంచ్ ఎన్నికల్లో పోటీ చేయడం ఏంటి.. ఎందుకు పోటీ చేస్తున్నారు అంటే..

కేరళలోని పథనంతిట్ట కేసీఆర్‌గా ప్రసిద్ధి పొందిన మాజీ ఎమ్మెల్యే కేసీ రాజగోపాలన్.. గతంలో ఎమ్మెల్యేగా పనిచేశారు. అలాంటి ఆయన ఇప్పుడు గ్రామ పంచాయతీ సభ్యుడిగా బరిలోకి దిగి ప్రతి ఒక్కరిని ఆశ్చర్యపరుస్తున్నారు. ఏమాత్రం గర్వం లేకుండా.. ప్రతి ఒక్కరిని తన మంచితనంతో ఆకట్టున్న కేసీ రాజగోపాలన్‌ను స్థానికులు ముద్దుగా కేసీఆర్ అని పిలుచుకుంటారు. మాజీ ఎమ్మెల్యే అయిన ఆయన ఇప్పుడు గ్రామ సర్పంచి ఎన్నికల్లో పోటీ చేయడంతో.. ఈ విషయం స్థానికంగా సంచలనంగా మారింది.

కేసీ రాజగోపాలన్.. మెజువేలి గ్రామ పంచాయతీలోని 8వ డివిజన్ నుంచి పంచాయతీ సభ్యుడిగా పోటీ చేస్తున్నారు. 75 ఏళ్ల కేసీఆర్ గత కొన్ని రోజులుగా రాజకీయాలకు దూరంగా ఉన్నారు. పెళ్లి చేసుకోకుండా ఒంటరిగా ఉంటున్న ఆయన్ని పంచాయతీ సభ్యుడిగా పోటీ చేయాలంటూ స్థానికులు కోరారు. అందుకు అంగీకరించిన ఆయన బరిలో నిలిచారు. ఇక ఈ ఎన్నికల్లో తాను కచ్చితంగా విజయం సాధిస్తానని ఆయన ధీమా వ్యక్తం చేస్తున్నారు.

మాజీ ఎమ్మెల్యే కేసీఆర్ మెజువేలి రోడ్డు మీద వెళ్తూ ప్రచారం చేసుకుంటూ వెళ్తుండగా.. ఆయనని చూసేందుకు జనాలు పెద్ద ఎత్తున తరలి వస్తున్నారు. ఆయనని చూసేందుకు స్థానికులు పెద్ద ఎత్తున తరలివస్తున్నారు. మాజీ ఎమ్మెల్యే అయిన కేసీఆర్.. పంచాయతీ ఎన్నికల్లో పోటీ చేస్తున్నారనే వార్త సోషల్ మీడియాలో వైరల్గా మారింది. చిన్నారుల నుంచి వృద్దుల వరకు ఆయనకు భారీ సంఖ్యలో అభిమానులున్నారు. ఇదిలా ఉంటే కేసీఆర్ పొలిటికల్ కెరీర్.. 1979లో జరిగిన పంచాయతీ ఎన్నికలతోనే మొదలైంది. ఆ ఎన్నికల్లో కేసీఆర్.. మెజువేలి గ్రామ పంచాయతీ ఉపాధ్యక్షుడిగా ఎన్నికయ్యారు. ఆ తర్వాత 1988లో మెజువేలి పంచాయతీ అధ్యక్షుడిగా.. ఆపై 2006లో జరిగిన కేరళ అసెంబ్లీ ఎన్నికల్లో అరణ్ముల నియోజకవర్గం నుంచి ఎమ్మెల్యేగా పోటీ చేసి విజయం సాధించారు.