ఆస్ట్రేలియాలో సిడ్నీలో కారు ప్రమాదం,,, భారతీయ గర్భిణి మృతి

ఆమె ఎనిమిది నెలల గర్భిణి. మరో నెల రోజులు గడిస్తే ఆమె చేతిలో పండంటి బిడ్డ ఉంటుంది. పుట్టబోయే బిడ్డను తలుచుకుని ఆమెతో పాటు కుటుంబ సభ్యులంతా సంతోషంగా గడుపుతున్నారు. రాబోయే చిన్నారి కోసం ఆత్రుతగా ఎదురు చూస్తున్నారు. చిన్నారి రాక కోసం సంతోషంగా రోజులు లెక్కబెట్టుకుంటున్నారు. ఇక నెల రోజుల్లో వారింట చిన్నారి కేరింతలు వినిపిస్తాయని భావిస్తే.. ఊహించని రీతిలో మృత్యు ఘంటికలు మోగాయి. మరో నెల రోజుల్లో పండంటి బిడ్డకు జన్మనివ్వాల్సిన మహిళ.. కడుపులో బిడ్డతో సహా కన్నుమూసింది. రోడ్డు ప్రమాదంలో ఆమె చనిపోయింది. ఆ వివరాలు..

ఈ దారుణం ఆస్ట్రేలియాలోని సిడ్నీలో వెలుగు చూసింది. భారత్‌కు చెందిన ఎనిమిది నెలల మహిళ ఒకరు రోడ్డు దాటుతుండగా అతివేగంగా వస్తున్న కారు ఆమెను ఢీకొట్టింది. ఈ ప్రమాదంలో సదరు మహిళ అక్కడికక్కడే మృతి చెందారు. మరో నెల రోజుల్లో బిడ్డకు జన్మనివ్వాల్సిన మహిళ.. ఇలా అర్ధాంతరంగా తనువు చాలించడంతో తీవ్ర విషాదం నెలకొంది. పోయిన వీకెండ్‌లో వెలుగు చూసిన ఈ దారుణం.. ఆలస్యంగా వెలుగులోకి వచ్చింది. పోలీసులు తెలిపిన వివరాల ప్రకారం..

భారత్‌కు చెందిన 33 ఏళ్ల సమన్విత ధారేశ్వర్‌ అనే మహిళ తన కుటుంబంతో కలిసి సిడ్నీలోని, హార్న్స్‌బై ప్రాంతంలో నివాసం ఉంటున్నారు. ఆమెకు మూడు నెలల కుమారుడు ఉన్నాడు. రెండో సారి గర్భం దాల్చిన ఆమె ఇప్పుడు 8 నెలల గర్భిణి. మరో నెలలో పండంటి బిడ్డకు జన్మనివ్వబోతున్నారు. ఈ క్రమంలో వీకెండ్ రోజున సమన్విత తన భర్త, మూడేళ్ల కొడుకుతో కలిసి ఇంటి దగ్గర ఉన్న పార్క్‌ వద్దకు వాకింగ్‌కు వెళ్లారు. ఈ క్రమంలో సమన్విత ఫుట్‌క్రాస్‌ వద్ద రోడ్డు దాటుతున్నారు. అయితే అదే సమయంలో వేగంగా వచ్చిన బీఎండబ్ల్యూ కారు ఆమెను బలంగా ఢీకొట్టింది.

ఈప్రమాదంలో సమన్విత తీవ్రంగా గాయపడ్డారు. సమన్విత భర్త ఆమెని వెంటనే సమీపంలోని ఆస్పత్రికి తీసుకెళ్లాడు. అయితే అప్పటికే ఆమె చనిపోయినట్లు వైద్యులు ప్రకటించారు. ఆమె గర్భంలో ఉన్న శిశువు కూడా లోకం చూడకముందే.. తల్లి కడుపులోనే ప్రాణాలు కోల్పియిందని తెలిపారు. మరికొన్ని వారాల్లో పండంటి బిడ్డతో సందడిగా ఉండాల్సిన తమ ఇల్లు.. భార్య, ఆమె కడుపులోని బిడ్డ మృతితో శ్మశాన నిశబ్దం అలముకుని.. విషాదాలకు పుట్టిల్లుగా మారిందని సమన్విత భర్త కన్నీరు మున్నీరు అవుతున్నాడు.

ఈ ప్రమాదానికి కారణమైన బీఎండబ్ల్యూ కారును నడిపిన వ్యక్తిని పోలీసులు అదుపులోకి తీసుకున్నారు. నిందితుడిని 19 ఏళ్ల ఆరోన్‌ పపాజోగ్లుగా గుర్తించారు. మరణించిన సమన్విత స్థానికంగా ఉన్న సాఫ్ట్‌వేర్‌ కంపెనీలో టెస్ట్‌ అనలిస్ట్‌గా పనిచేస్తుండేవారిన పోలీసులు తెలిపారు.