ఉమ్మడి చిత్తూరు జిల్లాలో నకిలీ సీఐ హల్‌చల్

మన పెద్దోళ్లు ఓ మాట చెప్తుంటారు.. ఏదైనా సరే.. హద్దుమీరనంత వరకే అని.. హద్దుమీరి అడ్డూ అదుపు లేకుండా ప్రవర్తిస్తే మొదటికే మోసం వస్తుంది.. తిరుపతి జిల్లాలోని ఓ వ్యక్తి పరిస్థితి కూడా సేమ్ టు సేమ్ అలాగే తయారైంది. మనోడి ఓవరాక్షనే కొంపముంచింది. అయ్యగారి అసలు స్వరూపం బయటకు వచ్చింది. దీంతో సీన్ మొత్తం రివర్స్ అయ్యింది. ఉమ్మడి చిత్తూరు జిల్లాలో జరిగిన ఈ ఘటనకు సంబంధించిన పూర్తి వివరాల్లోకి వెళ్తే..

ప్రదేశం.. భాకరాపేట పోలీస్ స్టేషన్.. సమయం.. బుధవారం ఉదయం.. పోలీస్ స్టేషన్‌లో ఫోన్ మోగింది. అక్కడే ఉన్న పోలీసులు హడావిడిగా ఫోన్ తీశారు. ఎవరో ఏం ఆపద వచ్చిందో అనే కంగారుగా ఫోన్ లిఫ్ట్ చేశారు. ఫోన్ ఎత్తగానే అవతలి వైపు నుంచి ఓ వ్యక్తి.. చాలా గంభీరంగా మాట్లాడుతున్నారు. నా పేరు శివకుమార్.. నేను తిరుపతిలోని రెడ్‌శ్యాండిల్స్ టాస్క్‌ఫోర్స్ సీఐను.. అని చాలా గంభీరంగా చెప్పడంతో.. భాకరాపేట పోలీసులు అప్రమత్తమయ్యారు. చెప్పండి సర్ అని అడిగారు. దీంతో అతను చెప్పడం మొదలుపెట్టాడు.

కేవీ పల్లె మండలం పెద్ద కమ్మపల్లెలో తమకు బంధువులు ఉన్నారని.. వారి అమ్మాయిని చిన్నగొట్టిగల్లు మండలంలోని ఓ యువకుడికి ఇచ్చి పెళ్లి చేశామని చెప్పాడు. అయితే ఆ వ్యక్తి వేరే మహిళతో ఎఫైర్ పెట్టుకుని తమ బంధువుల అమ్మాయిని ఇబ్బందిపెడుతున్నాడని చెప్పాడు. ఆ అమ్మాయిని తీసుకుని గురువారం తాను భాకరాపేట పోలీస్ స్టోషన్ వస్తున్నానని.. మీరు కూడా ఆ వ్యక్తి ఎఫైర్ పెట్టుకున్న మహిళను తీసుకురండి అని చెప్పాడు. గొంతు గంభీరంగా ఉండటం, పైగా తాను సీఐ అని చెప్పడంతో భాకరాపేట పోలీసులు కూడా నిజమేనని నమ్మశారు. అతను చెప్పినట్లుగానే గురువారం ఆ మహిళను స్టేషన్ వద్దకు తీసుకువచ్చారు.

ఇక మనోడు కూడాపోలీస్ యూనిఫామ్ వేసుకుని.. గురువారం భాకరాపేట స్టేషన్ చేరుకున్నాడు. వచ్చీరాగానే కుర్చీలో కూర్చొని.. హడావిడి చేశాడు. అయితే భాకరాపేట పోలీసులకు ఎందుకో మనోడి తీరుపై అనుమానం కలిగింది. దీంతో విచారణ చేస్తే. అతగాడి అసలు బాగోతం వెలుగుచూసింది. ఇతగాడి పేరు శివయ్య అని, నకిలీ సీఐ అని తేలింది.

దీనికి సంబంధించిన మరిన్ని వివరాలను తెలుసుకునేందుకు.. భాకరాపేట పోలీసులు శివయ్యపై మరింత సమాచారం కోసం తిరుపతి, కేవీ పల్లె పోలీసులను సంప్రదిస్తున్నారు. మరోవైపు శివయ్యపై కేవీపల్లె పోలీస్ స్టేషన్‌లో కేసు కూడా ఉన్నట్లు తెలుస్తోంది. మరోవైపు నకిలీ సీఐ విషయమై తమకు ఫిర్యాదు అందిందని.. భాకరాపేట ఎస్‌ఐ వెల్లడించారు. దీనిపై విచారణ జరుపుతున్నట్లు వివరించారు.