అదిరిపోయే గిఫ్ట్.. ఉద్యోగులకు రూ. 1.5 కోట్ల విలువైన ఫ్లాట్లు ఇస్తున్న టెక్ కంపెనీ

సాధారణంగా కంపెనీలు తమ ఉద్యోగులు బాగా పని చేస్తే ఇంక్రిమెంట్లు ఇస్తాయి. మహా అయితే విదేశీ పర్యటనలు లేదా కార్లను బహుమతిగా ఇస్తాయి. కానీ చైనాకు చెందిన ఒక ప్రముఖ ఆటోమోటివ్ టెక్నాలజీ సంస్థ మాత్రం అందరినీ ఆశ్చర్యపరిచే నిర్ణయం తీసుకుంది. తమ సంస్థలో అంకితభావంతో పని చేస్తున్న ఉద్యోగులకు ఏకంగా రూ. 1.5 కోట్ల విలువైన లగ్జరీ ఫ్లాట్లను ఉచితంగా పంపిణీ చేస్తోంది. వినడానికి నమ్మశక్యంగా లేకపోయినా.. ఈ అద్భుతమైన ఆఫర్‌ను 'జెజియాంగ్ గుషెంగ్ ఆటోమోటివ్ టెక్నాలజీ' సంస్థ అమల్లోకి తెచ్చింది.

ఎందుకు ఈ నిర్ణయం?

చాలా కంపెనీలు నైపుణ్యం కలిగిన ఉద్యోగులు తమ కంపెనీలను వదిలి వెళ్లకుండా ఉండటం కోసం రకరకాల ప్రయత్నాలు చేస్తుంటాయి. అయితే ఈ కంపెనీ జనరల్ మేనేజర్ వాంగ్ జియాయువాన్ ఒక విభిన్నమైన సమస్యను గుర్తించారు. తమ సంస్థలో సుమారు 450 మందికి పైగా ఉద్యోగులు ఉండగా.. వారిలో అత్యంత ప్రతిభావంతులైన చాలా మందికి సొంత ఇల్లు లేదని గమనించారు. కంపెనీకి సమీపంలో నివసించాలంటే ఇంటి అద్దెలు భారంగా మారడం, సరైన నివాసం లేక వలస కార్మికులు తమ సొంత ప్రాంతాలకు తిరిగి వెళ్లిపోతుండటంతో కంపెనీ మేనేజ్‌మెంట్ ఈ వినూత్న పథకాన్ని రూపొందించింది.

సౌత్ చైనా మార్నింగ్ పోస్ట్ నివేదిక ప్రకారం.. ఈ కంపెనీ మొత్తం 18 రెసిడెన్షియల్ ఫ్లాట్లను తన ఉద్యోగులకు కానుకగా ఇవ్వాలని నిర్ణయించింది. ఇందులో ఒక్కో ఫ్లాట్ విలువ సుమారు రూ. 1.3 కోట్ల నుంచి రూ. 1.5 కోట్ల వరకు ఉంటుంది. ఇప్పటికే ఈ ఏడాది ఐదుగురు ఉద్యోగులకు ఫ్లాట్లను అందజేయగా.. వచ్చే ఏడాది మరో ఎనిమిది మందికి ఇవ్వాలని లక్ష్యంగా పెట్టుకున్నారు. రాబోయే మూడేళ్లలో మొత్తం 18 మంది అదృష్టవంతులకు ఈ కోట్లు విలువ చేసే ఇళ్లు అందనున్నాయి.

అర్హతలు ఏంటి?

ఈ ఖరీదైన ఇళ్లను కంపెనీ అందరికీ ఇవ్వడం లేదు. దీనికి కొన్ని ప్రత్యేక నిబంధనలను విధించింది. ముఖ్యంగా కంపెనీలో చాలా కాలంగా, నమ్మకంగా పని చేస్తున్న, సంస్థ అభివృద్ధిలో కీలక పాత్ర పోషించిన వారికి ప్రాధాన్యత ఇవ్వనున్నారు. "మంచి నైపుణ్యం కలిగిన ఉద్యోగులను గౌరవించడం మా బాధ్యత. వారు ఆర్థిక ఇబ్బందుల వల్ల సంస్థను వదిలి వెళ్లకూడదనే ఉద్దేశంతోనే ఈ ఫ్లాట్ అలోకేషన్ పథకాన్ని ప్రారంభించాం" అని వాంగ్ జియాయువాన్ వివరించారు. ఈ వార్త ప్రస్తుతం అంతర్జాతీయ టెక్ రంగంలో హాట్ టాపిక్‌గా మారింది. ఇలాంటి కంపెనీలో పనిచేస్తే లైఫ్ సెటిల్ అయిపోతుందని నెటిజన్లు కామెంట్స్ చేస్తున్నారు.