డబ్బుపై మోజుతో ట్రాక్ తప్పిన మహిళా టెకీ.. గంజాయి విక్రయం

ప్రభుత్వాలు ఎన్ని చర్యలు తీసుకుంటున్నా కూడా తెలుగు రాష్ట్రాల్లో గంజాయి వినియోగానికి అడ్డుకట్ట పడటం లేదు. ఒకప్పుడు ఇంజనీరింగ్ కాలేజీల వద్ద జరిగిన గంజాయి విక్రయాలు.. ఇప్పుడు బడి పిల్లల్ల చాక్లెట్ల రూపంలోకి కూడా మారిపోయాయి. ధనార్జనే ధ్యేయంగా భావితరం భవిష్యత్తుతో చెలగాటమాడుతున్నారు కొంతమంది కేటుగాళ్లు. మరోవైపు గంజాయి విక్రయాలు, అక్రమ రవాణా అంటే ఒకప్పుడు పేరుమోసిన నేరగాళ్లు, స్మగ్లర్లే గుర్తుకు వచ్చేవారు. ఇప్పుడు ఉన్నత చదువులు చదివి.. మంచి ఉద్యోగాలు చేస్తున్న వారు కూడా ఈ మహమ్మారి కోరలకు చిక్కుతున్నారు. డబ్బు సంపాదనే లక్ష్యంగా పక్క చూపులు చూస్తూ... పెడతోవ పడుతున్నారు.

అనకాపల్లి జిల్లా పోలీసులు శుక్రవారం ఓ గంజాయి ముఠాను అరెస్ట్ చేశారు. నాతవరం పోలీసులు చాకచక్యంగా వ్యవహరించి గంజాయి స్మగ్లింగ్ చేస్తున్న ముఠాను అరెస్ట్ చేశారు. నర్సీపట్నం డీఎస్పీ శ్రీనివాసరావు వెల్లడించిన వివరాల మేరకు.. అరెస్ట్ అయిన వారిలో ఓ మాజీ సాఫ్ట్‌వేర్ ఉద్యోగిని కూడా ఉన్నారు. విజయనగరం జిల్లా సంతకవిటి మండలంలోని మాడుగులపేటకు చెందిన రేణుక అనే యువతి బీటెక్ చదువుకున్నారు. కొన్ని రోజులు సాఫ్ట్‌వేర్ ఉద్యోగం కూడా చేశారు.

అయితే సాఫ్ట్‌వేర్ ఉద్యోగం మానేసిన రేణుక గంజాయి రవాణా చేయడం మొదలెట్టినట్లు పోలీసులు తెలిపారు. రేణుకతో పాటుగా తమిళనాడుకు చెందిన సూర్య, ముత్తు, కొత్తకోటకు చెందిన ప్రసాద్, గుత్తలతపుట్టుకు చెందిన రవికుమార్, లోతుగడ్డ జంక్షన్‌లో ఉండే లలిత కుమారి, పెదవలసకు చెందిన మణికుమారిలను పోలీసులు అదుపులోకి తీసుకున్నారు.

పక్కా సమాచారంతో తనిఖీలు నిర్వహించిన పోలీసులు.. ఈ ముఠాను అరెస్ట్ చేశారు. వీరి వద్ద నుంచి 74 కిలోలు గంజాయితో పాటుగా.. కారు, రెండు ద్విచక్రవాహనాలను నాతవరం పోలీసులు స్వాధీనం చేసుకున్నారు. వీటి విలువ రూ.33 లక్షలుగా ఉండొచ్చని అంచనా. మరోవైపు గంజాయి కట్టడికి ఏపీ ప్రభుత్వం అనేక చర్యలు చేపడుతోంది. ఈగల్ పేరుతో ప్రత్యేక వ్యవస్థను కూడా ఏర్పాటు చేసింది. అలాగే గంజాయి రవాణా, సాగు చేస్తూ పట్టుబడిన వారికి కఠిన శిక్షలు విధిస్తోంది. డ్రోన్ల ద్వారా శివారు ప్రాంతాల్లో గంజాయి విక్రయాలు, ఏజెన్సీ ప్రాంతాల్లో గంజాయి సాగును అడ్డుకునే ప్రయత్నం చేస్తోంది. అయినప్పటికీ అక్కడక్కడా గంజాయి విక్రయాలు జరుగుతూ ఉన్నాయి.