పేలుడు పదార్థాలు ,,,, కారును స్వాదీనం చేసుకున్న పోలీసులు

కొత్త ఏడాది వేడుకలకు సిద్ధమవుతున్న వేళ.. దేశంలో భారీగా పేలుడు పదార్థాలు తరలిస్తున్న కారును పోలీసులు స్వాధీనం చేసుకోవడం కలకలం రేపుతోంది. ఈ ఘటన రాజస్థాన్‌లోని టోంక్‌లో బుధవారం చోటుచేసుకుంది. మారుతి సియాజ్ కారులో అక్రమంగా తరలిస్తున్న 150 కిలోల అమ్మోనియం నైట్రేట్, 2000 పేలుడు కాట్రిజ్‌లు, 1,100 మీటర్ల సేఫ్టీ ఫ్యూజ్ వైర్లను స్వాధీనం చేసుకున్నారు. పోలీసులు వెల్లడించిన వివరాల ప్రకారం.. బోండి నుంచి టోంక్‌ను పేలుడు పదార్థాలను తరలిస్తున్నారనే సమాచారంతో తనిఖీలు చేపట్టారు. ఈ క్రమంలో బరోని పోలీస్ స్టేషన్ పరిధిలో యూరియా బస్తాల మాటున అమ్మోనియం నైట్రేట్‌ను తరలిస్తున్న కారు పట్టుబడింది.

నిందితులను అరెస్ట్ చేసిన పోలీసులు.. వారిని సురేంద్ర మోచి, సురేంద్ర పట్వాగా గుర్తించారు. నిందితులను ప్రశ్నిస్తున్న పోలీసులు.. పేలుడు పదార్థాలు మైనింగ్ సహా చట్టవిరుద్ధ కార్యకలాపాల కోసం ఉద్దేశించిందా? అనే కోణంలో విచారిస్తున్నారు. రవాణా చేయడానికి ఉపయోగించిన కారును కూడా స్వాధీనం చేసుకున్నారు.

టోంక్ డీఎస్పీ మృత్యుంజయ్ మిశ్రా మాట్లాడుతూ.. ‘పేలుడు పదార్థాలను అక్రమంగా తరలిస్తున్నారనే నిఘా వర్గాల స్పష్టమైన సమాచారంతో భారీ ఆపరేషన్ చేపట్టి వాటిని తరలిస్తున్న వాహనాన్ని సీజ్ చేశాం.. ఇద్దరు నిందితులను అరెస్ట్ చేశాం.. దర్యాప్తు కొనసాగుతోంది. అన్ని కోణాల్లోనూ కేసును విచారిస్తున్నాం’ అని ఆయన చెప్పారు.

అమ్మోనియం నైట్రేట్ రసాయనాన్ని ఎరువుగా ఎక్కువగా వినియోగిస్తారు. అంతేకాదు, గతేడాది న్యూఢిల్లీలోని ఎర్రకోట వద్ద చోటుచేసుకున్న ఉగ్రదాడి ఘటన వంటి అధిక తీవ్రత కలిగిన పేలుళ్లకు ముష్కరులు ఉపయోగిస్తున్నారు. నవంబరు 10న ఢిల్లీలో చోటుచేసుకున్న ఘటనలో 15 మంది ప్రాణాలు కోల్పోగా.. మరో 30 మందికిపైగా గాయపడిన సంగతి తెలిసిందే. ఘటనా స్థలిని పరిశీలించిన ఫోరెన్సిక్ నిపుణులు.. ఆత్మాహుతి బాంబర్ ఉమర్ ఉన్ నబీ ఐఈడీని సరిగ్గా అమర్చకపోవడం వల్లే పేలుడు సంభవించి ఉండొచ్చని నిర్దారించారు.

ఢిల్లీ పేలుడు ఘటనకు ఒక్క రోజు ముందే హర్యానాలోని ఫరీదాబాద్‌లో అమ్మోనియం నైట్రేట్ సహా 2,900 కిలోల పేలుడు పదార్థాలు బయటపడ్డాయి. జమ్మూ కశ్మీర్‌కు చెందిన డాక్టర్లను ఈ కేసులో అరెస్ట్ చేశారు. తాజాగా, లభ్యమైన వాటిలో అమ్మోనియం నైట్రేట్ ఉండటంతో దీని వెనుక ఏదైనా కుట్ర ఉందా? అనే అనుమానాలు పోలీసులు వ్యక్తం చేస్తున్నారు.