రూ.366 కోట్ల భారీ కుంభకోణం,,,,తమిళనాడు మంత్రిపై ఈడీ ఆరోపణలు

తమిళనాడు రాజకీయాల్లో ఉద్యోగాల కుంభకోణం సంచలనం సృష్టిస్తోంది. తమిళనాడు మున్సిపల్ అడ్మినిస్ట్రేషన్ అండ్ వాటర్ సప్లై శాఖ అవినీతి కేసులో ఎన్‌ఫోర్స్‌మెంట్ డైరెక్టరేట్ (ఈడీ) దూకుడు పెంచింది. ఈ నేపథ్యంలోనే తమిళనాడు మున్సిపల్ శాఖ మంత్రి కెఎన్ నెహ్రూ, ఆయన అనుచరులకు సంబంధించి దాదాపు రూ.366 కోట్ల మనీలాండరింగ్, అవినీతికి సంబంధించిన తాజా ఆధారాలను ఈడీ అధికారులు వెల్లడించారు. తమిళనాడు మున్సిపల్ అడ్మినిస్ట్రేషన్, పట్టణాభివృద్ధి, నీటి సరఫరా శాఖలో ఉద్యోగుల బదిలీలు, నియామకాల పేరుతో భారీ వసూళ్లు జరిగినట్లు ఈడీ నిర్ధారించింది. ఈ వ్యవహారంలో మంత్రి కెఎన్ నెహ్రూ ప్రమేయం ఉన్నట్లు పేర్కొంటూ ఆయనపై ఎఫ్ఐఆర్ నమోదు చేయాలని కోరుతూ తమిళనాడు ప్రభుత్వ ప్రధాన కార్యదర్శికి, అవినీతి నిరోధక శాఖకు ఈడీ లేఖ రాసింది.

కీలక ఆధారాలుగా వాట్సాప్ చాట్‌లు, ఫోటోలు

ఈ కేసు దర్యాప్తులో భాగంగా ఈడీ అధికారులు కీలకమైన వాట్సాప్ చాట్లు, ఫోటోలు, పత్రాలను సేకరించారు. దాదాపు 340 మంది అధికారుల బదిలీలు, పోస్టింగ్‌ల కోసం ఒక్కొక్కరి దగ్గరి నుంచి రూ.7 లక్షల నుంచి రూ.1 కోటి వరకు లంచాలు వసూలు చేసినట్లు ఈ ఆధారాలు చెబుతున్నాయి. ఇది కేవలం కొంత కాలానికి సంబంధించిన సమాచారం మాత్రమేనని.. అసలు కుంభకోణం ఇంకా పెద్దదే ఉంటుందని ఈడీ అధికారులు అనుమానం వ్యక్తం చేస్తున్నారు.

 వసూలు చేసిన రూ.365.87 కోట్ల సొమ్మును రియల్ ఎస్టేట్ వ్యాపారం, విదేశీ ఆస్తులు, బంగారం, విలాసవంతమైన ఖర్చుల కోసం మళ్లించినట్లు ఈడీ అధికారులు గుర్తించారు. గతేడాది అక్టోబర్, డిసెంబర్ నెలల్లో కూడా తమిళనాడు మున్సిపల్ అడ్మినిస్ట్రేషన్ అండ్ వాటర్ సప్లై శాఖ టెండర్లు, రిక్రూట్‌మెంట్ల అక్రమాలపై ఈడీ.. ఆ రాష్ట్ర ప్రభుత్వానికి లేఖలు రాసింది. అందులో సుమారు రూ.1,020 కోట్ల టెండర్ల అవినీతి జరిగినట్లు పేర్కొంది.

ప్రస్తుతం లభించిన తాజా సమాచారంతో ఈడీ రంగంలోకి దిగడం.. తమిళనాడు ప్రభుత్వంలో కలకలం రేపుతోంది. మరికొన్ని రోజుల్లో తమిళనాడు అసెంబ్లీ ఎన్నికలు జరగనున్న తరుణంలో ఇప్పుడు ఈ వ్యవహారం వెలుగులోకి రావడంతో.. రాజకీయంగా తీవ్ర దుమారం రేపుతోంది. కేంద్ర దర్యాప్తు సంస్థల ద్వారా రాజకీయ కక్ష సాధింపు జరుగుతోందని అధికార డీఎంకే పార్టీ వర్గాలు ఆరోపిస్తుండగా.. ఆధారాలతో సహా దొరికిన నిందితులపై చర్యలు తీసుకోవాలని విపక్షాలు డిమాండ్ చేస్తున్నాయి.