రుణమాఫీపై పత్రిపక్షనేత చర్చకు సిద్ధమా? రాష్ట్ర వ్యవసాయ శాఖ మంత్రి

రాష్ట్రంలో వాతావరణ పరిస్థితులు వ్యవసాయానికి సానుకూలంగా ఉన్నాయని, అందుకనుగుణంగా వ్యవసాయ శాఖ సన్నద్ధమై ఉందని రాష్ట్ర వ్యవసాయ శాఖ మంత్రి కురసాల కన్నబాబు తెలిపారు. వెలగపూడి సచివాలయంలోని ప్రచార విభాగంలో మంత్రి మీడియాతో మాట్లాడుతూ రాష్ట్రవ్యాప్తంగా కురుస్తున్న వర్షాలతో రైతులు సంతోషంగా ఉన్నారన్నారు. వాతావరణానికి అనుగుణంగా వ్యవసాయానికి అవసరమైన ఎరువులు, విత్తనాల పంపిణీ సకాలంలో జరిగేలా వ్యవసాయశాఖ తరపున తాము సన్నద్ధమై ఉన్నామని వెల్లడించారు. ఒక్క అనంతపురం మినహా రాష్ట్ర వ్యాప్తంగా సాధారణ వర్షపాతం కన్నా మెరుగైన వర్షపాతం నమోదైందని పేర్కొన్నారు. రాష్ట్రంలో రిజర్వాయర్లనీ జలకళను సంతరించుకున్నాయని ఆనందాన్ని వ్యక్తం చేశారు. అనంతపురం జిల్లాలో వరదలు వచ్చాయని తెలిపారు. అయితే కర్నూలు, కృష్ణా, ఉభయ గోదావరి జిల్లాల్లో వచ్చిన వరదల వల్ల కొన్ని ప్రాంతాలు నష్టపోయాయని ఆవేదన వ్యక్తం చేశారు. ప్రస్తుతం సాగర్ కింద ఆయకట్టు పెరిగిందని మంత్రి వెల్లడించారు. ఇచ్చిన హామీలు, వాగ్ధానాలు నెరవేర్చే దిశగా తమ ప్రభుత్వం పని చేస్తుందని మంత్రి అన్నారు. కానీ కొందరు పనిగట్టుగొని ప్రభుత్వంపై బురదజల్లే విధంగా పత్రికల్లో తప్పుడు వార్తా కథనాలు వచ్చేలా ప్రేరేపిస్తున్నారని మంత్రి ఆవేదన వ్యక్తం చేశారు.2014 లో రైతుల రుణాలు, బంగారం, డ్వాక్రా రుణాలు మాఫీ చేస్తామని మోసం చేసింది గత ప్రభుత్వం కాదా అని ప్రశ్నించారు. ఎన్నికల నోటిఫికేషన్ వచ్చిన రోజే 4,5 విడతల రుణమాఫీ జీవో ఇచ్చి రైతులను దగా చేశారన్నారు. గత ప్రభుత్వానికి రైతులకు మేలు చేయాలనే ఉద్దేశమే ఉంటే ఓట్ ఆన్ అకౌంట్ బడ్జెట్‌లో రుణమాఫీకి నిధులను ఎందుకు కేటాయించలేదని ప్రశ్నించారు. కొంతైనా బడ్జెట్ లో రైతులకు నిధులు కేటాయించి ఉంటే చిత్తశుద్ధి ఉండేదన్నారు. ఎన్నికల కోడ్ సమయం లో ఎన్నికల కమిషన్ తో గొడవపడి కేబినెట్ సమావేశాలు పెట్టిన గత ప్రభుత్వం ఆ సమావేశంలో రైతులకు ఇవ్వాల్సిన నిధులపై ఎందుకు చర్చించలేదని నిలదీశారు. రైతు రుణమాఫీపై అబద్ధపు ఆరోపణలు చేస్తున్న ప్రతిపక్షనాయకుడు రుణమాఫీపై చర్చకు సిద్ధమా అని మంత్రి సవాల్ విసిరారు. ఏపీ ప్రజలకు గత ప్రభుత్వం చేయలేని మేలు ముఖ్యమంత్రి వైఎస్‌ జగన్‌మోహన్‌రెడ్డి చేస్తున్నారని..అందుకే ప్రతిపక్షనాయకుడికి ఆక్రోశం ఎక్కువయిందని విమర్శించారు. అందులో భాగంగానే రుణమాఫీ ఎత్తేస్తున్నామని దుష్ప్రచారం చేస్తున్నారు. ప్రతిపక్షం చేస్తున్న ఆరోపణలను ప్రజలు నమ్మొద్దని సూచించారు.

.