తగ్గిన పసిడి ధర
national | Suryaa Desk | Published : Tue, Oct 01, 2019, 10:31 PM
పసిడి ధర కాస్త కిందికి దిగింది. దేశీయ మార్కెట్లో మంగళవారం(అక్టోబర్1) గోల్డ్ ఫ్యూచర్స్ ధర 10 గ్రాములకు 0.3 శాతం క్షీణతతో రూ.36,811కు తగ్గింది. గత సెషన్లో బంగారం రూ.800 పడిపోయింది. మొత్తంగా రెండు రోజుల్లోనే బంగారం ధర 10 గ్రాములకు దాదాపు రూ.900 పడిపోయింది. అయితే బంగారం బాటలోనే వెండికూడా నడిచింది. ఎంసీఎక్స్ మార్కెట్లో వెండి ఫ్యూచర్స్ ధర కేజీకి రూ.44,056కు పడిపోయింది. వెండి సోమవారం దాదాపు 3 శాతం పడిపోయింది. బంగారం ధర తాజా తగ్గుదలతో కలుపుకుంటే గత నెల గరిష్ట స్థాయి రూ.39,885తో పోలిస్తే ఏకంగా రూ.3,000 దిగొచ్చింది. వెండి ధర కూడా గత నెల గరిష్ట స్థాయి రూ.51,489తో పోలిస్తే రూ.7,400 పతనమైంది.అంతర్జాతీయంగా బంగారం ధర దిగిరావడంతో దేశీ మార్కెట్లోనూ అదే ట్రెండ్ నడుస్తోంది. ఢిల్లీ స్పాట్ మార్కెట్లో 24 క్యారెట్ల బంగారం ధర 10 గ్రాములకు రూ.58 తగ్గుదలతో రూ.38,140కు తగ్గింది. వెండి ధర మాత్రం రూ.2,360 పెరుగుదలతో రూ.47,580కు చేరింది.గ్లోబల్ మార్కెట్లో బంగారం దర రెండు నెలల కనిష్ట స్థాయి వద్ద కదలాడుతోంది. సోమవారం బంగారం ధర 1.6 శాతం పడిపోయింది. ఈ రోజు కూడా బంగారం ధర 0.1 శాతం క్షీణతతో ఔన్స్తో 1,470 డాలర్ల స్థాయి వద్ద కదలాడుతోంది. డాలర్ బలపడటం, గ్లోబల్ ఈక్విటీ మార్కెట్లు రికవరీ చెందడం, ఇన్వెస్టర్ల ప్రాఫిట్ బుకింగ్ కారణంగా బంగారం ధర తగ్గుతూ వస్తోంది.
|
|