నవంబర్ 15తో ముగిసియనున్న పృథ్వీ షా నిషేధం...

నిషేధిత ఉత్ప్రేరకం వాడటంతో టీమిండియా యువ ఓపెనర్ పృథ్వీ షాపై ఈ ఏడాది మార్చిలో బీసీసీఐ ఎనిమిది నెలల నిషేధం విధించిన సంగతి తెలిసిందే. అయితే, ఈ నిషేధం నవంబర్ 15తో పూర్తి కావడంతో సయ్యద్ ముష్తాక్ అలీ ట్రోఫీ కోసం పృథ్వీ షాను తిరిగి ముంబై జట్టులోకి ఎంపిక చేయనున్నారు. సయ్యద్ ముస్తాక్ అలీ ట్రోఫీ కోసం పృథ్వీ షా ఎంపికపై ఖచ్చితంగా చర్చించనున్నట్లు రాష్ట్ర తాత్కాలిక ఎంపిక ప్యానెల్ చైర్మన్ మిలింద్ రీజ్ అన్నారు. ఈ సందర్భంగా ఆయన మాట్లాడుతూ "నవంబర్ 16 నుండి పృథ్వీ షా క్రికెట్ ఆడేందుకు అర్హుడు. కాబట్టి అతడిని సెలక్షన్‌కు పరిగణనలోకి తీసుకుంటాం. అతను ఖచ్చితంగా జట్టులో తిరిగి చోటు దక్కించుకుంటాడా? అనే దానిపై నేను కామెంట్ చేయను. అతడి ఎంపిక గురించి ఖచ్చితంగా చర్చిస్తాము" అని తెలిపాడు. ముస్తాక్ అలీ టోర్నీలో భాగంగా తొలి మూడు మ్యాచ్‌లకు మాత్రమే రీజ్ ప్యానెల్ ముంబై జట్టును ప్రకటించింది. ఎందుకంటే శ్రేయాస్ అయ్యర్, శార్దుల్ ఠాకూర్, శివం దుబే వంటి కీలక ఆటగాళ్ళు ప్రస్తుతం బంగ్లాదేశ్‌తో జరిగే టి20 సిరీస్ కోసం భారత జట్టులో ఆడుతున్నారు. మరోవైపు పృథ్వీ షా అర్హత సాధించడానికి ముందే ముంబై ఏడు గ్రూప్ మ్యాచ్‌ల్లో ఆరు ఆడుతుంది. ఈ ఏడాది ఫిబ్రవరి 22న ముస్తాక్‌ అలీ టీ20 టోర్నీ సందర్భంగా నిర్వహించిన డోప్‌ పరీక్షల్లో పృథ్వీ షా విఫలమయ్యాడు. అతడి మూత్ర నమూనాల్లో టెర్బుటలైన్‌ అనే నిషేధిత ఉత్ప్రేరకం ఉన్నట్లు తేలింది. ఇది సాధారణంగా దగ్గు మందుల్లో ఉంటుందని పేర్కొన్న బీసీసీఐ.. అంతర్జాతీయ డోపింగ్‌ నిరోధక సంస్థ (వాడా) నిబంధనల ప్రకారం మ్యాచ్‌లు ఆడేటపుడు లేదా బయట కూడా దీనిని ఉపయోగించకూడదు. అయితే, జులై 16నే పరీక్ష ఫలితాలు వచ్చిన తర్వాత వెంటనే బీసీసీఐ పృథ్వీ షాకి నోటీసులు జారీ చేసింది. దగ్గు మందు వినియోగం వల్లే నిషేధిత ఉత్ప్రేరకం తన ఒంట్లోకి వచ్చిందని పృథ్వీ ఇచ్చిన వివరణతో బీసీసీఐ సంతృప్తి చెందలేదు. దీంతో అతడిపై 8 నెలలు పాటు నిషేధం విధించింది. ఈ నిషేధం మార్చి 16 నుంచే అమల్లోకి వస్తుందని పేర్కొంది. దీంతో నవంబరు 15కే పృథ్వీ షాకి విధించిన శిక్ష పూర్తి కానుంది.