మంగళగిరి వాసి డాక్టర్ హరితకు ఎయిమ్స్ గోల్డ్ మెడల్

మంగళగిరి పట్టణానికి చెందిన డాక్టర్ దామర్ల హరిత న్యూఢిల్లీలోని ప్రతిష్ఠాత్మక ఎయిమ్స్ లో ఎండీ అనస్థీషియాలజీలో గోల్డ్ మెడల్ సాధించారు. న్యూఢిల్లీ ఎయిమ్స్ 2016లో నిర్వహించిన పీజీ వైద్య ప్రవేశ పరీక్షలో తొలి ప్రయత్నంలోనే ఓబీసీ కేటగిరీలో 61వ ర్యాంకు సాధించిన హరిత ఎండీ అనస్థీషియాలజీ కోర్సులో చేరారు.
పీజీలో అత్యంత ప్రతిభాపాఠవాలు కనబరిచి ఇటీవల విడుదల చేసిన పరీక్షా ఫలితాల్లో తన బ్యాచ్ లో టాపర్ గా నిలిచి, గోల్డ్ మెడల్ అందుకోనున్నారు. చిన్ననాటి నుంచి చదువులో చురుగ్గా వుండే హరిత తాడేపల్లి మండలం కుంచనపల్లిలోని అరవింద హైస్కూల్ లో పదోతరగతి, విజయవాడలోని శ్రీ చైతన్య కళాశాలలో ఇంటర్మీడియట్ చదివారు.
ఉమ్మడి రాష్ట్రంలో 2010 సంవత్సరంలో నిర్వహించిన ఎంసెట్ ఫలితాల్లో 64వ ర్యాంకు సాధించి, హైదరాబాద్ ఉస్మానియా వైద్యకళాశాలలో ఎంబీబీఎస్ సీటు సాధించారు. ఎంబీబీఎస్ లోనూ డిస్టింక్షన్ లో ఉత్తీర్ణురాలైన హరిత న్యూఢిల్లీలోని ఎయిమ్స్ లో పీజీ ప్రవేశ పరీక్ష రాసి ఎండీ అనస్థీషియాలజీలో చేరారు. పీజీ కోర్సు తన బ్యాచ్ లో టాపర్ గా నిలిచారు.
లండన్ లోని హెల్త్ యూనివర్సిటీలో పేపరు ప్రజెంటేషన్ ఇచ్చేందుకు ఎయిమ్స్ నుంచి ఎంపికై వచ్చే జనవరి 5వ తేదీన డాక్టర్ హరిత అక్కడకు వెళ్ళనుండడం విశేషం. డాక్టర్ హరిత తండ్రి దామర్ల వీరాంజనేయులు పట్టణంలోని వీటీజేఎం, ఐవీటీ ఆర్ డిగ్రీ కళాశాలలో అధ్యాపకేతర ఉద్యోగి కాగా, తల్లి ఝాన్సీరాణి మందడం జడ్పీ ఉన్నత పాఠశాలలో హిందీ పండిట్ గా పనిచేస్తున్నారు. తమ్ముడు భరత్ బీటెక్, ఎంబీఏ చేసి ముంబయిలోని షాపూర్జీ, పల్లోంజీ సంస్థ ప్రధానకార్యాలయంలో ప్రాజెక్టు మేనేజరుగా పనిచేస్తున్నారు.
డాక్టర్ హరిత పీజీలో గోల్డ్ మెడల్ సాధించడంపై డిగ్రీ కళాశాల సెక్రటరీ అండ్ కరస్పాండెంట్ డాక్టర్ గోలి రామ్మోహనరావు, పట్టణంలోని పలువురు ప్రముఖులు హర్షం వ్యక్తం చేసి అభినందనలు తెలిపారు. మంగళగిరిలో రూపుదిద్దుకుంటున్న ఎయిమ్స్ లో వైద్యసేవలు అందించాలనేది లక్ష్యంగా పెట్టుకున్నారు డాక్టర్ హరిత. స్వస్థలంలో ప్రతిష్ఠాత్మకమైన ఎయిమ్స్ లో స్థానికురాలైన డాక్టర్ హరితకు ఇక్కడినుంచే వైద్యసేవలు అందించాలనే ఆకాంక్ష ఉండడం అభినందనీయం.