వారిలో కరోనా వ్యాప్తి తక్కువే?
national | Suryaa Desk | Published : Mon, Apr 26, 2021, 01:02 PM
శాకాహారుల్లో కరోనా వైరస్ వ్యాప్తి తక్కువగానే ఉంటోందని, అంతేకాకుండా ‘ఓ’ రకం బ్లడ్ గ్రూప్ ఉన్నవారు కూడా కరోనా బారినపడే అవకాశాలు తక్కువగా ఉన్నట్లు తాజా సర్వేలో తేలింది. కరోనా వైరస్ ను ఎదుర్కొనే యాంటీబాడీల స్థాయిని అంచనా వేసేందుకు కేంద్ర పరిశోధన సంస్థ సీఎస్ఐఆర్ చేసిన సర్వేలో ఆసక్తికర అంశాలు వెలుగులోకి వచ్చాయి.
కరోనాను ఎదుర్కొనే యాంటీబాడీలు, వైరస్ ను ఎదుర్కోవడంలో అవి ప్రతిస్పందించే సామర్థ్యాలను తెలుసుకునేందుకు కౌన్సిల్ ఆఫ్ సైంటిఫిక్ అండ్ ఇండస్ట్రియల్ రీసెర్చ్(సీఎస్ఐఆర్) దేశవ్యాప్తంగా సెరో సర్వే నిర్వహించింది. దేశంలో వివిధ ప్రాంతాలకు చెందిన 140 వైద్య నిపుణులు, శాస్త్రవేత్తల బృందం ఆధ్వర్యంలో ఈ సర్వే చేపట్టింది. మొత్తం 10,427 మంది సమాచారాన్ని వారు విశ్లేషించారు.
శాకాహారుల్లో వైరస్ వ్యాప్తి తక్కువగానే ఉన్నట్లు తాజా సర్వే గుర్తించింది. శాకాహారులు తినే ఆహారంలో అధిక మొత్తంలో ఉండే ఫైబర్ కరోనా వైరస్ ను ఎదుర్కోవడంలో కీలక పాత్ర పోషిస్తున్నట్లు తెలిపింది. ఇక ‘ఓ’ బ్లడ్ గ్రూప్ నకు చెందిన వారిలో కరోనా బారినపడే అవకాశాలు తక్కువగానే ఉన్నాయని తాజా సర్వే గుర్తించింది. B, AB రకం ఉన్నవారిలో వైరస్ బారిన పడే ప్రమాదం కాస్త ఎక్కువగానే ఉందని తెలిపింది. తాజా అధ్యయనం పరిశీలన(పీర్-రివ్యూ) కూడా పూర్తయ్యిందని అధ్యయనం సహ రచయిత శంతను సేన్ గుప్తా పేర్కొన్నారు.
|
|