మరో భారతీయ అమెరికన్‌కు కీలక పదవి

అమెరికా అధ్యక్షుడు జో బైడెన్ యంత్రాంగంలో పలువురు భారతీయ సంతతి వ్యక్తులకు కీలక పదవులు దక్కిన విషయం తెలిసిందే. తాజాగా, మరో భారతీయ అమెరికన్‌ బైడెన్ బృందంలో చేరారు. వైట్‌హౌస్‌‌లో బైడెన్ సీనియ‌ర్ స‌ల‌హాదారుగా భార‌తీయ సంతతి మహిళ నీరా టాండ‌న్‌ నియ‌మితులయ్యారు. గ‌తంలో నీరాను వైట్‌హౌస్‌లో బ‌డ్జెట్ చీఫ్‌ పదవికి బైడెన్ ఎంపికచేయగా రిప‌బ్లిక‌న్లు సహా సొంత పార్టీ నేతలు తీవ్రంగా వ్య‌తిరేకించిన విషయం తెలిసిందే. ఈ నేప‌థ్యంలో ఆమెను సీనియ‌ర్ స‌ల‌హ‌దారుగా బైడెన్ నియ‌మించారు.

ఈ నియమానికి సెనెట్ ఆమోదం అవ‌స‌రం లేద‌ని అధికారులు తెలిపారు. ఆమె హెల్త్‌కేర్, ఇంట‌ర్నెట్ యాక్సెస్ అంశాల‌పై ఆమె దృష్టిసారించ‌నున్నారు. సెంట‌ర్ ఫ‌ర్ అమెరిక‌న్ ప్రోగ్రెస్ (సీఏపీ) అధ్య‌క్షురాలిగా ప‌నిచేస్తున్న టాండ‌న్‌.. మాజీ అధ్య‌క్షుడు బ‌రాక్ ఒబామా, మాజీ విదేశాంగ మంత్రి హిల్ల‌రీ క్లింట‌న్‌కు స‌ల‌హాదారుగా వ్య‌వ‌హ‌రించారు. బడ్జెట్‌ చీఫ్‌గా నీరా టాండన్‌ నియామకంపై సెనెట్‌తో పాటు సొంత పార్టీ నేతల నుంచి వ్యతిరేకత రావడంతో ఆయన అధ్య‌క్షుడు బైడెన తన నిర్ణయాన్ని ఉపసంహరించుకున్నారు.

నీరా టాండన్ గతంలో డెమొక్రాటిక్‌ నేతలతో సహా పలువురు చట్టసభ్యులను విమర్శిస్తూ ట్వీట్లు చేశారు. ఇవి కాస్తా వివాదాస్పదమవ్వడంతో బడ్జెట్ చీఫ్‌గా ఆమె నియామకాన్ని కేబినెట్‌ మంత్రులు, డెమొక్రాటిక్‌ చట్టసభ్యులు వ్యతిరేకించారు. ఆమె నియామకాన్ని ధ్రువీకరించేందుకు సెనెట్‌లో సరిపడా ఓట్లు వచ్చే అవకాశం లేకపోవడంతో నీరా తన నామినేషన్‌ను మార్చిలో ఉపసంహరించుకున్నారు.అయితే, ఆమె సాధించిన విజయాపై తనకు చాలా గౌరవం ఉందని, త్వరలోనే ఆమెకు తన యంత్రాంగంలో మరో పదవిలోకి తీసుకొనే అవకాశాలన్ని పరిశీలిస్తున్నామని బైడెన్‌ అప్పట్లోనే వెల్లడించారు. బైడెన్ సీనియర్ సలహాదారుగా నీరా టాండన్ నియామకంపై సెంటర్ ఫర్ అమెరికన్ ప్రోగ్రెస్ (సీపీసీ) హర్షం వ్యక్తం చేసింది.

ఈ సంస్థ వ్యవస్థాపకుడు జాన్ పొడేస్టా ఓ ప్రకటన వెలువరించారు. ‘‘నీరా తేలివితేటలు, చిత్తశుద్ధి, రాజకీయ అవగాహన బైడెన్ యంత్రాంగంలో అధ్యక్షుడి సీనియర్ సలహాదారుగా నియమించడానికి తోడ్పడ్డాయి.. మేము 2003లో కలిసి స్థాపించిన సెంటర్ ఫర్ అమెరికన్ ప్రోగ్రెస్‌లో ఆమె విధానపరమైన నైపుణ్యం, నాయకత్వ సేవలను కోల్పోతున్నందుకు మమ్మల్ని క్షమించాలి.. వైట్‌హౌస్, అమెరికన్లకు సేవలందించే కొత్త బాధ్యతలను ఆమె చేపట్టం చాలా ఆశ్చర్యంగా ఉంది’’ అన్నారు.