పతనం తప్పదు: డబ్ల్యూహెచ్ ఓ హెచ్చరిక

వివిధ దేశాలలో కరోనా కొత్త వేరియంట్‌ ఒమిక్రాన్ దూకుడు ప్రదర్శించడంపై డబ్ల్యూహెచ్ఓ ఆందోళన వ్యక్తం చేస్తోంది. డిసెంబర్‌ 20-26 మధ్య ప్రపంచవ్యాప్తంగా దాదాపు 50 లక్షల మంది కొత్తగా కోవిడ్ బారినపడ్డారని ప్రపంచ ఆరోగ్య సంస్థ (WHO)వెల్లడించింది. అంతకుముందు వారంతో పోలిస్తే పాజిటివ్ కేసుల్లో 11శాతం పెరుగుదల నమోదయ్యిందని పేర్కొంది. ఓమిక్రాన్, డెల్టా వేరియంట్ కోవిడ్-19 కేసుల సునామీ ఇప్పటికే వాటి పరిమితి దాటి ఆరోగ్య వ్యవస్థలపై ఒత్తిడిని పెంచుతున్నాయని ఆందోళన వ్యక్తం చేసింది. పరిస్థితి అదుపులోకి రాకపోతే చెయ్యి దాటే పరిస్థితి వస్తుందని ఆందోళన వ్యక్తం చేసింది.

డెల్టా, ఓమిక్రాన్ వేరియంట్‌లు జంట ముప్పుగా మారి కొత్త కేసులను రికార్డు స్థాయికి తీసుకువెళ్లడంతో ఆసుపత్రిలో చేరడం, మరణాల పెరుగుదలకు దారితీసిందని డబ్ల్యూహెచ్ఓ డైరెక్టర్ జనరల్ టెడ్రోస్ అధ్నామ్ ఘ్యాబ్రియోసిస్ ఆందోళన వ్యక్తం చేశారు. ‘డెల్టా, అదే సమయంలో ఎక్కువ వ్యాప్తి కలిగించే ఓమిక్రాన్ వల్ల కేసుల సునామీకి దారితీస్తోందని నేను చాలా ఆందోళన చెందుతున్నాను’ అని అన్నారు.

కరోనాతో గత రెండేళ్లుగా అలసిపోయిన ఆరోగ్య కార్యకర్తలు, పతనం అంచునకు చేరిన ఆరోగ్య వ్యవస్థలపై తీవ్ర ఒత్తిడిని పెంచుతూనే ఉంది.. ఆరోగ్య వ్యవస్థలపై కొత్త కరోనా వైరస్ రోగుల వల్ల ఒత్తిడి మాత్రమే కాకుండా పెద్ద సంఖ్యలో ఆరోగ్య కార్యకర్తలు కోవిడ్‌తో అనారోగ్యానికి గురవుతున్నారని ఆవేదన చెందారు. ముఖ్యంగా అమెరికాలో కేసులు భారీగా పెరిగాయని, అక్కడ అక్టోబర్‌ నుంచే వైరస్‌ విజృంభణ మరోసారి ప్రారంభమైందని డబ్ల్యూహెచ్‌ఓ తెలిపింది.

కొవిడ్‌ తీవ్రత ఎక్కువగా అమెరికా, ఐరోపా దేశాల్లో కనిపిస్తున్నట్లు ప్రపంచ ఆరోగ్య సంస్థ వెల్లడించింది. గడిచిన వారంలో నమోదైన మొత్తం 49.9లక్షల కేసుల్లో 28లక్షల కేసులు కేవలం యూరప్‌లోనే ఉన్నాయి. అంతకుముందు వారంతో పోలిస్తే అక్కడి పాజిటివ్‌ కేసుల్లో 3శాతం పెరుగుదల కనిపించింది. ప్రపంచంలో ఎక్కడా లేనివిధంగా యూరప్‌లోనే ఇన్‌ఫెక్షన్‌ రేటు అధికంగా ఉంది. ప్రతి లక్ష జనాభాలో పాజిటివ్‌ కేసుల సంఖ్య 304.6గా నమోదవుతుందని డబ్ల్యూహెచ్‌ఓ ఆందోళన వ్యక్తం చేసింది.