సంక్రాంతికి ప్రత్యేక బస్సులు
Andhra Pradesh Telugu | Suryaa Desk | Published : Sun, Jan 02, 2022, 10:13 AM
సంక్రాంతి పండగకు సొంతూరికి వెళ్లి కుటుంబ సభ్యులందరితో కలిసి ఆనందోత్సాహాల నడుమ పండగ చేసుకోవడం ఆనవాయితీ. ఉద్యోగాలు, వివిధ వృత్తులు, వ్యాపారాలకు వివిధ రాష్ట్రాలు, పొరుగు జిల్లాలకు వెళ్లినవారు సంక్రాంతికి సొంతూరికి వస్తారు. ఈ నేపథ్యంలో ప్రయాణికుల రద్దీని దృష్టిలో ఉంచుకుని ఆర్టీసీ అదనపు సర్వీసులను నడపడానికి ప్రణాళిక రూపొందించింది.
పండగ ముందు, తర్వాత ఆయా మార్గాల్లో ప్రత్యేక సర్వీసులు నడుపుతారు. ప్రత్యేక బస్సుల్లో సాధారణ ఛార్జీకి అదనంగా 50 శాతం సొమ్ము వసూలు చేస్తారు. జిల్లా నుంచి హైదరాబాద్, బెంగళూరు, చెన్నై, విశాఖపట్టణం నగరాలకు నడపనున్నారు. ఇప్పటికే ప్రణాళిక రూపొందించిన బస్సులను ఆయా మార్గాల్లో నడపడంతోపాటు రద్దీకి అనుగుణంగా అప్పటికప్పుడు నిర్ణయం తీసుకుని నడపడానికి యంత్రాంగం సిద్ధంగా ఉంది.
జనవరి 7వ తేదీ నుంచి 17వ తేదీ వరకు ప్రత్యేక బస్సులు నడవనున్నాయి. ప్రత్యేక సర్వీసుల్లో సింహభాగం సూపర్ లగ్జరీ బస్సులు కాగా, కొన్ని అల్ట్రాడీలక్స్ బస్సులు తిప్పనున్నారు. ఇతర రాష్ట్రాలకు అదనంగా నడిపే బస్సులకు అనుమతి తీసుకొని నడపాల్సి ఉంది. రాష్ట్రంలో అవసరాలకు అనుగుణంగా ఆయా నగరాలు, పట్టణాలకు అప్పటికప్పుడు నిర్ణయం తీసుకుని ఏర్పాటుచేస్తారు. ప్రయాణికులు ఆర్టీసీ బస్సుల్లో ప్రయాణించి సురక్షితంగా గమ్యస్థానాలకు చేరాలని ఆర్టీసీ డిప్యూటీ సీటీఎం నర్రా శ్రీనివాసరావు కోరారు.
|
|