ఫిట్‌గా లేని ఫిట్ మెంట్

గత కొంత కాలంగా ఆంధ్ర రాష్ట్ర ప్రభుత్వ ఉద్యోగులను ఊరిస్తున్న పిఆర్ సి పై జనవరి 7 2022న జరిగిన ఉద్యోగ సంఘాల భేటీలో ముఖ్యమంత్రి జగన్ మోహన్ రెడ్డి ఎట్టకేలకు ప్రకటించారు. జనవరి 6న జరిగిన సమావేశంలో రాష్ట్ర ఆర్థిక పరిస్థితులను, ఉద్యోగ సంఘాల విజ్ఞప్తులను పరిశీలించి రెండింటి మధ్య ఎక్కువ బేధాభిప్రాయం ఉండటంతో రెండు రోజుల్లో ప్రకటిస్తానని చెప్పిన నేపథ్యంలో అకస్మాత్తుగా ఉద్యోగ సంఘాలను పిలిచి వారి సమక్షంలో స్వయంగా సీఎం పిఆర్ సి ప్రకటించారు. ఫిట్ మెంట్ 23 శాతంగా జూలై 1, 2018 నుంచి అమలు తేదీని ప్రకటించారు. ఆర్థిక ప్రయోజనం తేదీ ఏప్రిల్ 1, 2020 అలాగే పెంచిన జీతాలు జనవరి 1, 2022 నుండి (ఫిబ్రవరిలో చెల్లిస్తారు). పెండింగ్ లో ఉన్న అన్ని డి.ఏలను జనవరి జీతంతో చెల్లింపు. ఈహెచ్ఎస్, ఎంప్లాయిస్ హెల్త్ స్కీం కు సంబంధించిన సమస్యలు పరిష్కరించడానికి చీఫ్ సెక్రటరీ అధ్యక్షతన ఒక కమిటీని ఏర్పాటుచేసి రెండు వారాల్లో సమస్యలు పరిష్కరించాలని ఆదేశాలు ఇచ్చారు.

ఈ కమిటీ ఉద్యోగుల ప్రతినిధులతో మాట్లాడి, వారి సూచనలు, సలహాల ప్రకారం మంచి పాలసీ చేయనుంది. సొంత ఇల్లు లేని ఉద్యోగులకు జగనన్న స్మార్ట్ టౌన్ షిప్లలో నియోజకవర్గం యూనిట్ గా 10 శాతం కేటాయింపు చేసి, అలాగే స్థలం కొనుగోలులో కూడా 20శాతం రాయితీ ప్రకటించారు. హెచ్ ఆర్ ఎ గురించి ఊసేలేదు. గ్రామ, వార్డు సచివాలయాల్లో పనిచేస్తున్న ఉద్యోగులందరికీ కూడా జూన్ 30 తారీఖులోగా ప్రొబేషన్ పూర్తి చేయాలని, పెంచిన జీతాలను జూలై 1,2022 నుంచి చెల్లింపు చేయనున్నారు. ఉద్యోగుల పి.ఎఫ్, జి. ఎల్.ఐ . లీవు జీతం చెల్లింపులు అన్నీ ఏప్రిల్ నాటికి క్లియర్ చేయాలన్నారు.

కాంట్రాక్టు, ఔట్సోర్సింగ్ ఉద్యోగులకు కూడా 2022 జనవరి 1 నుంచి పెంచిన జీతాలను చెల్లిస్తారు. సీఎస్ తో కూడిన అధికారుల కమిటీ 2022 అక్టోబరు నుంచి కొత్త పీఆర్సీ ప్రకారం మానిటరీ బెనిఫిట్స్ ఇవ్వాలని చెప్పినప్పటికీ పది నెలల ముందు అంటే జనవరి 2022 నుంచే మానిటరీ బెనిఫిట్స్ ఇవ్వాలని నిర్ణయించారు. ఇకపై రాష్ట్రంలో సెంట్రల్ పే రివిజన్ కమిషన్ ప్రతిపాదనలనే యధాతథంగా తీసుకుని ఇప్పటికే అనేక రాష్ట్రాలు అమలు చేస్తున్న తరహాలోనే రాష్ట్ర ప్రభుత్వం కూడా పయనించాలని నిర్ణయం తీసుకున్నారు. ఎవరు ఊహించని విధంగా ఉద్యోగుల రిటైర్మెంట్ వయస్సును 60 నుంచి 62 ఏళ్లకు పెంచుతూ ప్రకటన చేశారు.