రూ.20 కోట్ల మరకతలింగం పట్టివేత
Andhra Pradesh Telugu | Suryaa Desk | Published : Sat, Oct 07, 2017, 11:00 AM
కారులో అక్రమంగా తరలిస్తున్న రూ.20 కోట్ల విలువైన మరకతలింగాన్ని పోలీసులు స్వాధీనం చేసుకున్నారు. దీనికి సంబంధించి నలుగురిని శుక్రవారం అరెస్టు చేశారు. పోలీసుల కథనం మేరకు .... మదురై నుంచి చెన్నైకి బయలుదేరిన ఓ కారు మదురై-తిరుచ్చి జాతీయ రహదారికి చేరుకుంది. ఆ సమయంలో ఎదురుగా వచ్చిన ఓ ప్రభుత్వ బస్సు ఢీకొట్టడంతో కారు ముందు భాగం ధ్వంసమైంది. అందులోని ప్రయాణికులు నలుగురు గాయాలపాలయ్యారు. సమాచారం అందిన వెంటనే విరాలిమలై పోలీసులు విచారణ చేపట్టారు. క్షతగాత్రులను చికిత్స నిమిత్తం తిరుచ్చి ప్రైవేటు వైద్యశాలకు తరలించారు. అనంతరం కారులో పరిశీలించగా రూ.20 కోట్ల విలువైన మరకతలింగం ఉండడాన్ని గుర్తించారు. కారు సహా దానిని స్వాధీనం చేసుకున్నారు. లింగం సుమారు ఎనిమిది కిలోల బరువు ఉందని పోలీసులు తెలిపారు. కారు ప్రయాణికులు మదురై నుంచి ఈ విగ్రహాన్ని తరలించినట్లు గుర్తించారు. నలుగురిని అరెస్టు చేశారు. కేసు దర్యాప్తులో ఉంది.
|
|