పిల్లల్ని కనండ్ర బాబు...మొత్తుకొంటున్న చైనా

ఏ జనాభా పెరుగుదలపై ఆందోళన వ్యక్తంచేసిందో చైనా నేడు అదే జనాభా కోసం పరితప్పిస్తోంది. కాకపోతే యువత రూపంలో జనాభా అధికంగా ఉండాలని చైనా భావిస్తోంది. దేశంలో జననాల రేటు పెంచడానికి చైనా ప్రభుత్వం ఎన్నో కసరత్తులు చేస్తోంది. ఒప్పుడు చైనాలో జనాభాను తగ్గించడానికి ఎక్కువమంది పిల్లల్ని కనొద్దని చెప్పిన ప్రభుత్వమే ఇప్పుడు లోన్లు ఇచ్చి మరీ పిల్లల్ని కనమని చెబుతోంది. ఎక్కువమందిని కంటే ఎన్నో రాయితీలు ఇస్తానంటుంది. అయినా ప్రయోజనం ఉండడం లేదు. అనుకున్న స్థాయిలో జననాలు పెరగడం లేదు సరికదా 2021 సంవత్సరానికి అక్కడ జననాల రేటు అత్యల్ప స్థాయికి పడిపోయింది. అయితే చైనాలో బర్త్ రేట్ తగ్గిపోవడంపై ఆసక్తికరమైన విషయాలు వెలుగులోకి వచ్చాయి. ఓ మీడియా కథనం ప్రకారం చైనాలో వివాహ రిజిస్ట్రేషన్ల సంఖ్య గణనీయంగా పడిపోవడం, వయస్సు పైబడిన వారు పెళ్లిళ్లు చేసుకోవడం వల్ల పిల్లలు పుట్టడం కష్టతరంగా మారింది. 2019 సంవత్సరంతో పోలిస్తే 2020లో చైనాలో 17.5 శాతం పెళ్లిళ్లు తగ్గిపోయాయి. అలాగే జియాంగ్సు ప్రావిన్స్‌లో వివాహాల నమోదు క్రమంగా పడిపోతుంది. ఝెజియాంగ్ రాజధాని హాంగ్జౌలో 2011తో పోలిస్తే 2021లో 80 శాతం వివాహాల రిజిస్ట్రేషన్లు తగ్గిపోయాయి. అదికాక వయస్సు మీద పడ్డాక కొంతమంది పెళ్లి చేసుకుంటున్నారు. అంటే పెళ్లి చేసుకుంటున్న వారిలో 46.5 శాతం మంది వయసు 30 ఏళ్లకుపైగా ఉంది. దీంతో బర్త్ రేట్ పెరగడం లేదు. పైగా చైనాలో ఎన్నో ఏళ్లుగా వన్‌చైల్డ్ పాలసీ కొనసాగింది. ఈ కారణాల వల్ల బర్త్ రేటు కనిష్టానికి పడిపోయింది. నేషనల్ బ్యూరో ఆఫ్ స్టాటిస్టిక్స్ ఆఫ్ చైనా డేటా ప్రకారం 2021లో చైనా జననాల రేటు 7.52కి క్షీణించింది. చైనాలో జనాభా నియంత్రణ కోసం అక్కడి కమ్యూనిస్ట్ పాలకులు వన్ చైల్డ్ పాలసీని చాలా కఠినంగా అమలు చేశారు. దాంతో జననాలు పూర్తిగా తగ్గిపోయాయి. ఒక సర్వే ప్రకారం చైనాలో యువత తగ్గిపోయి… వృద్ధుల సంఖ్య పెరుగుతుంది. దాంతో ఈ పరిస్థితి నుంచి బయటపడ్డానికి చైనా ఎన్నో ప్రయత్నాలు చేస్తోంది. బిడ్డలను కనమని తల్లిదండ్రులకు సూచిస్తుంది. వారికి లోన్లు ఇవ్వడమే కాకుండా.. రకరకాల ఇన్సూరేన్స్ పాలసీలను అందిస్తోంది. వారు చేసే వ్యాపారాల్లో సబ్సిడీలను కూడా అందిస్తుంది. కానీ అవేమి ఫలించడం లేదు. పైగా రోజురోజుకు జననాల రేటు పడిపోతుంది.