కశ్మీర్ ఫైల్స్ సినిమాకు ఉత్తరాఖండ్ ప్రభుత్వం ప్రోత్సహం
national | Suryaa Desk | Published : Wed, Mar 16, 2022, 09:48 PM
కశ్మీర్ ఫైల్స్ చిత్రం దేశ వ్యాప్తంగా చర్చకు దారితీసింది. ఇది ఓ అభూతకల్పనగా, విద్వేషాలు రెచ్చగొట్టే చర్యగా కొందరు మేధావులు ఆందోళన వ్యక్తంచేస్తుండగా కొన్ని వర్గాలు దీనికి మద్దతుగా నిలుస్తున్నాయి. వివేక్ అగ్నిహోత్రి రూపొందించిన బ్లాక్ బస్టర్ మూవీ ‘కశ్మీర్ ఫైల్స్’కు తాజాగా ఉత్తరాఖండ్ సర్కారు మద్దతు పలికింది. ఈ సినిమాను చూసేలా ప్రజలను ప్రోత్సహించేందుకు పన్ను నుంచి మినహాయింపునివ్వాలని ప్రభుత్వం నిర్ణయించింది. ఈ విషయాన్ని ముఖ్యమంత్రి పుష్కర్ సింగ్ ధామి ప్రకటించారు. 1990లలో జరిగిన కశ్మీరీ పండిట్ల ఊచకోత అంశంతో తెరకెక్కించిన ఈ సినిమాకు దేశవ్యాప్తంగా ఆదరణ పెరుగుతోంది. ఈ సినిమాను ప్రధాని మోదీ సైతం మెచ్చుకున్నారు. ప్రతి ఒక్కరూ ఈ సినిమాను చూడాలంటూ బీజేపీ ఎంపీలకు ఆయన సూచించడం తెలిసిందే. మరోవైపు సినిమా బాక్సాఫీసు వద్ద సంచలనాలు సృష్టిస్తోంది. ఐదో రోజు మరింత పెద్ద మొత్తంలో వసూళ్లను సాధించింది. గత శుక్రవారం ఈ సినిమా ప్రేక్షకుల ముందుకు వచ్చింది. తొలి రోజు రూ.3.55 కోట్లు, శనివారం రూ.8.50 కోట్లు, ఆదివారం రూ.15.10 కోట్లు, సోమవారం రూ.15.05 కోట్ల చొప్పున రాబట్టుకుంది. ఇక తొలి నాలుగు రోజుల స్థాయిని దాటేసి మంగళవారం ఐదో రోజు రూ.18 కోట్లు రాబట్టింది. దీంతో మొత్తం వసూళ్లు రూ.60 కోట్లు దాటిపోయాయి.
|
|