ట్రెండింగ్
దాబా వాచ్ మెన్ పై కత్తితో దాడి
Andhra Pradesh Telugu | Suryaa Desk | Published : Sat, Mar 19, 2022, 08:39 AM
మంగళగిరి నగరంలోని జాతీయ రహదారి వద్ద జనసేన పార్టీ రాష్ట్ర కార్యాలయం ఎదుటనున్న నార్త్ మిశ్రా దాబాలో విధులు నిర్వహిస్తున్న వాచ్ మెన్ గాంధీరామ్ కత్తిపోట్లకు గురయ్యారు. పోలీసులు తెలిపిన కథనం ప్రకారం నలుగురు వ్యక్తులు గురువారం తెల్లవారుజామున 2: 30 గంటల ప్రాంతంలో దాబాకు వచ్చి తమకు తినేందుకు పుల్కాలు కావాలని అడిగారు. నిర్వాహకులు లేవనడంతో గొడవపడి వెళ్లిపోయారు. తిరిగి ఆర గంట తర్వాత వచ్చి దాబాలోని సామగ్రి, లైట్లు పగులగొట్టారు. అడ్డుకునేందుకు ప్రయత్నించిన వాచ్మెన్ గాంధీరామ్ పొట్టలో కత్తితో పొడిచి పారిపోయారు. సమాచారం అందుకున్న పోలీసులు అక్కడికి చేరుకొని క్షతగాత్రుడిని చికిత్స నిమితం ఎన్. ఆర్. ఐ. జనరల్ ఆస్పత్రిలో చేర్పించారు. ఘటనపై కేసు నమోదు చేసి నిందితులను గుర్తించే పనిలో ఉన్నామని ఎస్సై నారాయణ తెలిపారు.
|
|