మహారాష్ట్రలో అటహాసంగా...గుడిపడ్వా వేడుక

గుడిపడ్వా వేడుకకు మహారాష్ట్రాలో ఎంతో ప్రాముఖ్యతవుంది. మరాఠాలు కొత్త సంవత్సరాన్ని గుడిపడ్వా (ఉగాది) పేరుతో అంగరంగ వైభవంగా జరుపుకుంటారు. కరోనా వైరస్ కారణంగా గత రెండేళ్లూ గుడిపడ్వా వేడుకలను ఇళ్లలోనే జరుపుకోవాల్సి వచ్చింది. ప్రస్తుతం మహమ్మారి తగ్గుముఖం పట్టడంతో ఆంక్షలను పూర్తిగా మహారాష్ట్ర ప్రభుత్వం ఎత్తివేసింది. దీంతో మరాఠాల ఉగాది సంబరాలు అంబరాన్నంటాయి. నాగ్పుర్, పుణే, ముంబయి, ఠాణె సహా వివిధ నగరాల్లో మహిళలు, చిన్నారుల సహా అందరూ ఉత్సాహాంగా వీధుల్లోకి వచ్చి వేడుకల్లో పాల్గొన్నారు. మరాఠా సంప్రదాయ చీరకట్టులో మహిళలు బైక్ ర్యాలీలతో ఆకట్టుకున్నారు. కత్తిసాము, కర్రసాము చేసి ఔరా అనిపించారు. కరోనా కారణంగా గత రెండేళ్లుగా సంబరాలకు దూరమైన మరాఠీలు ఈసారి రెట్టింపు ఉత్సాహంతో వేడుకలను జరుపుకున్నారు. ముంబయి సహా అనే నగరాల్లోని వీధులు ఉదయం నుంచే శోభాయాత్రలతో కోలాహలంగా మారాయి. వివాహిత మహిళలు సంప్రదాయబద్ధంగా దుస్తులు ధరించి నిర్వహించుకునే పండుగ ఇది. పంటలు చేతికొచ్చిన తర్వాత జరుపుకొనే ఈ పండుగకు అక్కడ విశిష్ట ప్రాధాన్యం ఉంది. ఈ సమయంలో మహారాష్ట్రలో మామిడి పండ్లు పెద్ద మొత్తంలో పక్వానికి వస్తాయి. కర్రల సాయంతో గుడిని ఏర్పాటు చేసి, దానిపై శాలువాను కప్పి వెండి విగ్రహాన్ని పెడతారు. దానికి పసుపు, కుంకుమ, పుష్పాలతో పూజించి, పరమాన్నాన్ని నైవేద్యంగా సమర్పిస్తారు. ఈ ప్రసాదాన్ని అందరూ ఇష్టంగా తింటారు. తెలుగువారు ఉగాది పచ్చడి చేసుకున్నట్లు.. మరాఠాలు చక్కెరన్నం వండుకుంటారన్నమాట. ముంబైలో గాలా ఉత్సవాలను మహిళలు అట్టహాసంగా నిర్వహించారు. గిర్గావ్ ప్రాంతంలో మహిళలు నిర్వహించిన బైక్ ర్యాలీ వేడుకల్లో ప్రత్యేక ఆకర్షణగా నిలిచింది. భారీ సంఖ్యలో పాల్గొన్న ఈ ర్యాలీలో 151 మంది మహిళలు బుల్లెట్ బండి నడిపి ఔరా అనిపించారు. పలు ప్రాంతాల్లో మహిళల నృత్యాలు ఆకట్టుకున్నాయి. హారాష్ట్రతో పాటు కర్ణాటక, తమిళనాడులోనూ నూతన సంవత్సర వేడుకలను జరుపుకున్నాయి. ఉగాది, చేటీ చాంద్, సాజిబు చెయ్రోబా మొదలైనవి ఇందులో భాగం. వివిధ రాష్ట్రాల్లోని కొత్త సంవత్సర వేడుకల సందర్భంగా ప్రధాని నరేంద్ర మోదీ ట్విట్టర్ ద్వారా శుభాకాంక్షలు తెలియజేశారు. ‘‘గుడిపడ్వా, నవ్రేహి, ఉగాది, చేటీ చాంద్, సజిబు చెయ్రోబా జరుపుకుంటున్న ప్రజలకు శుభాకాంక్షలు’’ అని వేర్వేరు ట్వీట్లు చేశారు. ఈ పండగ అందరి జీవితాల్లో కొత్త శక్తిని నింపుతుందని ఆశిస్తున్నట్లు తెలిపారు.