అమెరికాలో ఓ విధికి...ఏకంగా హిందూ దేవాలయం పేరు

మన దేశంలో ముస్లింల పేరు కనిపిస్తే చాలు  భగ్గుమంటున్నారు కొందరు. అంతేకాదు ఆ పేర్ల మార్పునకు శ్రీకారం కూడా చుట్టారు. కానీ అగ్రరాజ్యంలో భారతీయ సంస్కృతికి అరుదైన గౌరవం దక్కింది. హిందూ సమాజం గర్వపడే విధంగా అక్కడో వీధికి గణేష్ టెంపుల్ స్ట్రీట్ అని పేరు పెట్టారు. అక్కడ 1977లో ది హిందూ టెంపుల్ సొసైటీ ఆఫ్ నార్త్ అమెరికా ఆధ్వర్యంలో మహా వల్లభ గణపతి దేవస్థానాన్ని స్థాపించారు. దానిని గణేష్ టెంపుల్ అని పిలుస్తారు. ఇది ఉత్తర అమెరికాలోని పురాతన హిందూ దేవాలయంగా ప్రసిద్ధి చెందింది. అక్కడున్న తెలుగువారు ఆ ఆలయానికి వెళ్లి పూజలు, అర్చనలు జరపడం ఆనవాయితీగా మారింది. ఈ దేవాలయం న్యూయార్క్‌లో క్వీన్స్ కౌంటీలోని ఫ్లషింగ్‌లో ఉంది. ఆ గుడి బయట ఉన్న వీధికి బౌన్ స్ట్రీట్ అని పేరు పెట్టారు. మత స్వేచ్ఛ, బానిసత్వానికి వ్యతిరేకంగా ఉద్యమించిన ప్రముఖ అమెరికన్ మార్గదర్శకుడు జాన్ బౌన్ పేరు ఆ వీధికి పెట్టారు. అయితే ఈ ఇదే వీధికి గణపతి ఆలయం పేనును కూడా జత చేశారు. శనివారం జరిగిన ఒక ప్రత్యేక కార్యక్రమంలో గణేష్ ఆలయ గౌరవార్థం ఆ వీధికి గణేష్ టెంపుల్ స్ట్రీట్‌గా మారుస్తున్నట్టు అధికారికంగా ప్రకటించారు. దీంతో అక్కడి తెలుగు ప్రజల్లో ఆనందం నెలకొంది. పేరును మారుస్తూ దానికి సంబంధించిన ఓ చిహ్నాన్ని న్యూయార్క్‌లోని భారత కాన్సుల్ జనరల్ రణధీర్ జైస్వాల్, క్వీన్స్ బోరో ప్రెసిడెంట్ డోనోవన్ రిచర్డ్స్, న్యూయార్క్ నగర మేయర్ ఎరిక్ ఆడమ్స్ ఇతర అధికారుల ఆధ్వర్యంలో ఆవిష్కరించారు. ఈ సందర్భంగా వీధి పేరు మారడం వెనుక ఎన్నో ఏళ్ల కృషి ఉందని, దీంతో ఇండో అమెరికన్ కమ్యూనిటీ గొప్పదనం గురించి ఇంకా బాగా తెలుస్తుందని భారత కాన్సుల్ జనరల్ రణధీర్ జై స్వాల్ అన్నారు. గత ఏడాది డిసెంబర్‌లో న్యూయార్క్ సిటీ కౌన్సిల్ ఆధ్వర్యంలోని ఓ కమిటీ బౌన్ స్ట్రీట్‌కు గణేష్ టెంపుల్ స్ట్రీట్‌గా అనే పేరును కూడా పెట్టడానికి ఆమోదించిందని ఆలయ సోషల్ మీడియా పోస్ట్‌లో పేర్కొంది. ఈ సందర్భంగా భక్తులందరికీ ధన్యవాదాలు తెలిపింది.