కదిలిస్తున్న ఆదృశ్యాలు...ఎక్కడబడితే అక్కడ శవాల గుట్టలు

ఉక్రెయిన్ లో కొన్ని దృశ్యాలు  ప్రతి ఒక్కర్నీ కలిచివేస్తున్నాయి. ఆ దేశంలో ప్రధాన నగరాలలో ఎక్కడపడితే అక్కడ శవాల గుట్టలు పడివుండటం దర్శనమిస్తున్నాయి. ఉక్రెయిన్‌లో రష్యా సైన్యం దారుణాలు ఒక్కొక్కటిగా వెలుగులోకి వస్తున్నారు. కీవ్, దాని పరిసర ప్రాంతాల నుంచి రష్యా సేనలు వైదొలడంతో సహాయక చర్యలు చేపట్టిన ఉక్రెయిన్ సైన్యం, అత్యవసర బృందాలకు ఒళ్లు గగ్గుర్పాటుకు గురిచేసే దృశ్యాలు దర్శనమిస్తున్నాయి. కుప్పలు తెప్పలుగా సాధారణ పౌరుల శవాలు, సామూహిక ఖననాలు, చేతులను వెనక్కు కట్టి పాయింట్ బ్లాంక్‌లో పెట్టి కాల్చి చంపిన ఘటనలు కొకొల్లలుగా బయటపడుతున్నాయి. అంతేకాదు, మృతదేహాల కింద కూడా ల్యాండ్‌మైన్స్‌ అమర్చారు. మృతదేహాలను తొలగించే ప్రయత్నం చేస్తుంటే ల్యాండ్‌మైన్స్ పేలుతున్నాయని, దీంతో సహాయక చర్యలకు తీవ్ర ఆటంకం కలుగుతోందని ఉక్రెయిన్‌ వర్గాలు వాపోతున్నాయి. రష్యా సైన్యం అడుగుపెట్టిన చోటల్లా లూటీలకు తెగబడింది. మహిళలు, యువతులపై అత్యాచారాలకు పాల్పడింది. ఈ అరాచకాలను ఐరోపా దేశాలు, అమెరికా తీవ్ర ఖండించాయి. కీవ్‌కు వాయువ్యంగా ఉన్న బుచా పట్టణంలో 300 మృతదేహాలను సామూహికంగా ఖననం చేశారు. మరికొన్ని చోట్ల 120 మృతదేహాలు లభించాయని, పరిస్థితిని మాటల్లో చెప్పలేమని ఉక్రెయిన్ విదేశాంగ మంత్రి దిమిత్రీ కులేబా కన్నీటిపర్యంతమయ్యారు. బుచాలోని ఓ చర్చి ప్రాంగణంలో సామూహిక సమాధిని గుర్తించారు. 45 అడుగుల భారీ పొడవైన కందకం తవ్వినట్టు అమెరికాకు చెందిన మాక్సర్ టెక్నాలజీస్ ఉపగ్రహ చిత్రాలను బయటపెట్టింది. వీధుల్లో ఎటుచూసినా శవాలు గుట్టలుగా పడి ఉన్నట్టు రాయిటర్స్ ప్రతినిధులు తెలిపారు. ఒక చర్చి వద్ద పైన ఎర్రటి మట్టితో కప్పి ఉన్న సామూహిక సమాధి నుంచి కాళ్లు చేతులు బయటకు కనిపిస్తున్నాయని చెప్పారు. సెయింట్ ఆండ్రూ, పైర్వోజ్వాన్నోహో ఆల్ సెయింట్స్ చర్చిలో సామూహిక సమాధి కోసం తవ్విన సంకేతాలు మార్చి 10న మొదటిసారి కనిపించాయని మాక్సర్ తెలిపింది. ‘‘మార్చి 31న ఇటీవలి కవరేజ్ చర్చి ప్రాంగణంలోని నైరుతి విభాగంలో సుమారు 45 అడుగుల పొడవై కందకంతో సమాధి స్థలాన్ని చూపిస్తుంది’’ అని మాక్సర్ చెప్పారు. రష్యా దారుణాలపై అంతర్జాతీయ నేరాల న్యాయస్థానం (ఐసీసీ)కి ఉక్రెయిన్ లేఖ రాసింది. ఐసీసీ వెంటనే తమ ప్రతినిధులను పంపాలని కోరింది. అంతర్జాతీయ స్వచ్ఛంద, మానవ హక్కుల సంఘాలూ వీలైనంత త్వరగా ఉక్రెయిన్‌ను సందర్శించి, రష్యా అరాచకాలను గుర్తించాలని పేర్కొంది. ఆలస్యం జరిగితే ఆధారాలు కనుమరుగయ్యే ప్రమాదాలున్నాయని ఆందోళన వ్యక్తం చేసింది. అసోసియేటెడ్‌ ప్రెస్‌ కూడా తమ ప్రతినిధులు పంపిన ఫొటోలు, వీడియోలు రష్యా దారుణాలను కళ్లకు కడుతున్నాయని పేర్కొంది. బుచా నగరంలో చాలా మంది ప్రాణాలు కోల్పోయారని, రష్యా సేనలు చాలామందిని చేతులను వెనక్కి కట్టేసి, అత్యంత దగ్గరగా తలకు గురిపెట్టి కాల్చిన ఆనవాళ్లు ఉన్నాయని వెల్లడించింది.