ఓపియం సాగుపై అప్ఘన్ లో నిషేధం
international | Suryaa Desk | Published : Tue, Apr 05, 2022, 01:53 PM
ఆఫ్ఘానిస్థాన్లో తాలిబన్లు మత్తు పానీయాలపై ఉక్కుపాదం మోపుతున్నారు. ఆ దేశంలో ఓపియం సాగుపై నిషేధం విధించారు. సాధారణంగా ఓపియంను మాదకద్రవ్యాల తయారీకి ముడిసరుకుగా ఉపయోగిస్తుంటారు. దేశంలో ఇక నుంచి ఒపియం సాగు చేసే రైతులకు జైలుకు వెళ్లడమే కాకుండా, వారి సాగుకు తగలబెడతామని తాలిబన్ ప్రభుత్వం ప్రకటించింది. దీంతోపాటు హెరాయిన్, హషిష్, మద్యం వ్యాపారాలపై కూడా బ్యాన్ విధించారు. ఈ మేరకు ఇస్లామిక్ ఎమిరేట్ ఆఫ్ ఆఫ్ఘనిస్తాన్ సుప్రీం లీడర్ హైబతుల్లా అఖుంద్జాదా ఉత్తర్వులు జారీ చేశారు. నిజానికి ఆప్ఘనిస్థాన్లో ఓపియం సాగుపై చాలామంది ఆధారపడి ఉన్నారు.
వేలాది మంది రైతులు సాగుపై ఆధారపడి బతుకుతున్నారు. ఈ సాగే ప్రధాన ఆదాయ మార్గంగా ఉంది. దేశంలో ఆగస్ట్ 2021 నుంచి తాలిబన్ పాలన మొదలైంది. వారి రాకతో దేశ ఆర్థిక వ్యవస్థ కుప్పకూలింది. అంతర్జాతీయ దాతలు నిధులను ఉపసంహరించుకోవడంతో ఈ పరిస్థితి తలెత్తింది. అంతర్జాతీయ మద్దతు లేకపోవడంతో ప్రభుత్వ, ప్రైవేట్ రంగాలలో ఉద్యోగాలు కరువయ్యాయి. ఈ నేపథ్యంలో ఓపియం సాగుపై బ్యాన్ విధించడం ఆందోళనలు కలిగిస్తుంది. ప్రపంచ వ్యాప్తంగా 80 శాతం కంటే ఓపియం ఉత్పత్తులను ఆప్ఘనిస్థానే సరఫరా చేస్తుంది. ఓపియం ఉత్పత్తుల ద్వారా దేశం 1.8 బిలియన్ డాలర్ల ఆదాయాన్ని సమకూర్చుకుంటుంది. ఈ క్రమంలో ఒపియం సాగుపై నిషేధం విధించడం గమనార్హం. కాగా 1994, 1995 సంవత్సరాల్లో కూడా తాలిబన్ ప్రభుత్వం నల్లమందు వ్యాపారంపై ఇదే విధమైన నిషేధాన్ని విధించింది. అయితే 2001లో తాలిబన్లు అధికారం నుంచి దిగిపోవడంతో నిషేధం రద్దు అయింది.
|
|