తీగలాగితే డొంక కదలింది...రియల్ ఎస్టేట్ వ్యాపారి హత్యకేసు ఛేదించిన పోలీసులు

ఎంతటి నేరగాడైనా, ఎన్ని జాగ్రత్తలు తీసుకొన్నా ఎక్కడో ఒక చోట చట్టానికి లోంగాల్సిందే. అదే నిజం. ఢిల్లీలో కూడా ఇలాంటిదే జరిగింది. మొత్తం 300 సీసీటీవీ కెమెరాలు, మెట్రో స్మార్ట్ కార్డు, మెట్రోలోని సిబ్బంది సాయంతో ఓ హైప్రొఫైల్ హత్య కేసును ఢిల్లీ పోలీసులు చేధించారు. గతవారం ఉత్తర ఢిల్లీ సివిల్ లైన్ ప్రాంతంలోని ప్రముఖ రియల్ ఎస్టేట్ వ్యాపారి రామ్ కిశోర్ అగర్వాల్ (77) ను ఆయన ఇంటిలోనే గుర్తుతెలియని వ్యక్తులు హత్య చేశారు. ఆయనను కత్తితో పొడిచి, గొంతుకోసి హతమార్చి.. నోట్ల కట్టలున్న కొన్ని కార్డు బాక్సులు దుండుగులు ఎత్తుకెళ్లారు. బిల్డర్ హత్య వెనుక దోపిడీ ప్రధాన కారణమని ప్రాథమికంగా నిర్ధారణకు వచ్చిన పోలీసులు ఆ దిశగా దర్యాప్తు చేపట్టారు.

హంతకులు ఎటువంటి ఆధారాలు దొరక్కుండా జాగ్రత్త పడటంతో ఈ కేసును పోలీసుల ఛాలెంజ్‌గా తీసుకున్నారు. దీంతో అగర్వాల్ ఇంటి చుట్టుపక్కల ఉన్న సీసీటీవీ కెమెరాలను పరిశీలించినా నిందితుల ఆచూకీ లభించలేదు. చివరకు మెట్రో స్టేషన్‌ల వద్ద సీసీటీవీ కెమెరా దృశ్యాలను పరిశీలించారు. రాజీవ్ చౌక్ మెట్రో స్టేషన్ వద్ద సీసీటీవీ దృశ్యాల్లో క్లూ లభించింది. నిందితుల్లో ఒకరు అగర్వాల్ ఇంటిలో క్లీనర్‌గా పనిచేసిన వ్యక్తిగా గుర్తించారు. ఆ వ్యక్తి ఏడాదిన్నర కిందట అగర్వాల్ ఇంటిలో పని మానేశాడని పోలీసు వర్గాలు తెలిపాయి. గతంలో నిందితుడిపై పలు కేసులు ఉన్నాయని పేర్కొన్నారు.

నిందితుడ్ని అదుపులోకి తీసుకున్న పోలీసులు.. మిగతావారి కోసం గాలిస్తున్నారు. హత్య జరిగిన ముందురోజు రాత్రి నిందితుడు దొంగిలించిన ఓ బైక్‌తో అగర్వాల్ ఇంటికి చేరుకుని దానిని పార్క్ చేసినట్టు ప్రాథమిక విచారణలో తేలింది. తర్వాత నిందితుడు సివిల్ లైన్స్ మెట్రో స్టేషన్‌కు చేరుకుని అక్కడ నుంచి న్యూఢిల్లీ స్టేషన్.. తర్వాత సమయపురి బద్లీకి వెళ్లాడు. అక్కడ దిగిన తర్వాత ఓ ఆటో రిక్షాలో ఇంటికి చేరినట్టు విచారణలో వెల్లడించాడు.

మర్నాడు సివిల్ లైన్స్‌కు ఆటో రిక్షాలో మరో వ్యక్తితో కలిసి అగర్వాల్ ఇంటికి వచ్చి, హత్య తర్వాత అక్కడ పార్క్ చేసిన బైక్‌పై పారిపోయారని పోలీసు వర్గాలు తెలిపాయి. నిందితులను గుర్తించడానికి 300కిపైగా సీసీటీవీ కెమెరాలను పరిశీలించారు. నిందితులు తమను ఎవరూ గుర్తుపట్టకుండా మాస్క్‌లు వేసుకున్నారని పేర్కొన్నాయి.

మెట్రోలో నిందితుల కదలికలను ట్రాక్ చేసిన పోలీసులు అక్కడి అధికారులు, సెక్యూరిటీని అప్రమత్తం చేశారు. నిందితుడి మెట్రో స్మార్ట్ కార్డ్‌పై నిఘా ఉంచడంతో బుధవారం ఉదయం రాజీవ్ చౌక్ స్టేషన్ వద్ద ఉపయోగించినట్టు గుర్తించారు. వెంటనే మెట్రో ప్రత్యేక సిబ్బంది నిందితుడ్ని అదుపులోకి తీసుకున్నారు.