పాకిస్తాన్ లో కొత్త రకం పరువు హత్య

పాకిస్తాన్ లో కొత్త రకపు పరువు హత్య జరిగింది. డ్యాన్స్, మోడలింగ్‌ను కెరీర్‌గా ఎంచుకుని, తమ కుటుంబం పరువు తీసిందని భావించిన ఓ యువకుడు.. తన సోదరిని హత్య చేశాడు. ఈ దారుణ ఘటన పాకిస్థాన్‌లోని పంజాబ్‌ ప్రావిన్సుల్లో చోటుచేసుకుంది. రాజధాని లాహోర్‌కు 130 కి.మీల దూరంలోని రెనాలా ఖుర్ద్‌ ఒకారా ప్రాంతంలో జరిగిన ఈ పరువు హత్య గురించి పోలీసులు తెలిపిన వివరాల ప్రకారం.. సిద్రా అనే 21 ఏళ్ల యువతి మోడలింగ్, డ్యాన్స్‌ను ఇష్టపడి దానినే కెరీర్‌గా మలచుకుంది. ఓ స్థానిక క్లాతింగ్‌ బ్రాండ్‌కు మోడల్‌గా, ఫైసలాబాద్‌ నగరంలోని థియేటర్స్‌లో డ్యాన్సర్‌గా కొనసాగుతోంది.

అయితే, యువతి కుటుంబానికి మాత్రం ఇది నచ్చలేదు. ఆ వృత్తి కుటుంబ సంప్రదాయానికి విరుద్ధమని, ఆ రంగాన్ని వదిలేయామంటూ ఎంతగానో ఒత్తిడి చేశారు. కానీ, తాను ఎంతో ప్రేమగా ఎంచుకున్న వృత్తిని వదులుకొడానికి సిద్రా ససేమిరా అంది. ఈ క్రమంలో ఇటీవల తన కుటుంబ సభ్యులతో ఈద్ వేడుకలను జరుపుకొనేందుకు యువతి ఫైసలాబాద్‌ నుంచి స్వగ్రామానికి వచ్చింది. ఈ సందర్భంగా మరోసారి కుటుంబసభ్యులు ఆమె నిర్ణయం అభ్యంతరం తెలిపారు. వృత్తిలో మర్యాదకు సంబంధించిన విషయంలో తల్లిదండ్రులు, సోదరుడు హమ్జా ఆమెతో గురువారం గొడవపడ్డారు.

కెరీర్‌ను వదులుకోనని ఖరాఖండీగా చెప్పడంతో ఆమెను కొట్టినట్టు పోలీసులు తెలిపారు. ఆ తర్వాత హమ్జా కోపంతో తన సోదరిపై కాల్పులకు పాల్పడ్డాడని చెప్పారు. విచక్షణారహితంగా జరిపిన ఈ కాల్పుల్లో ఆమె అక్కడికక్కడే ప్రాణాలు కోల్పోయిందని పేర్కొన్నారు. ఘటన గురించి సమాచారం అందుకున్న పోలీసులు.. యువతి సోదరుడిని అదుపులోకి తీసుకున్నారు. అతడిపై హత్య కేసు నమోదు చేసి దర్యాప్తు చేపట్టారు. అయితే, నిందితుడ్ని అరెస్ట్ చేశామని, అతడు నేరం చేసినట్టు అంగీకరించాడని అన్నారు.

ఈ ఉదంతంపై ఫ్రాజ్‌ హమీద్‌ అనే అధికారి మాట్లాడుతూ.. ఎవరో బంధువులు తన సోదరి డ్యాన్స్‌ వీడియోను పంపడంతో చూసి ఆవేశానికి లోనయ్యాడన్నారు. ఆ కోపంతోనే తన సోదరిని కాల్చి చంపేసినట్టు హమ్జా కూడా వెల్లడించాడని వివరించారు. పాకిస్థాన్‌లో పరువు హత్యలు సర్వసాధారణంగా మారాయి. ముఖ్యంగా గిరిజనులు ఎక్కువగా ఉండే ఉత్తర, పశ్చిమ ప్రాంతాల్లో ఇవి నిత్యకృత్యంగా మారాయి.