ప్రాణం మీదకు తెచ్చిన గిఫ్ట్.. పెళ్లి కొడుకు చెయ్యి విరిగింది

పెళ్లిలో వచ్చిన బహుమతితో ఓ వ్యక్తికి ప్రాణం పోయేంత పని అయింది. పెళ్లి కానుకలో ఒకటి పేలడంతో కొత్త పెళ్లికొడుకుతో పాటు తన మూడేళ్ల మేనల్లుడు కూడా తీవ్రంగా గాయపడ్డాడు. ఈ ఘటనలో కొత్తగా పెళ్లైన యువకుడు తన చెయ్యిని కోల్పోయాడు. ఈ సంఘటన గుజరాత్‌లోని నవ్సారి జిల్లాలోని మింధబారి గ్రామంలో చోటుచేసుకుంది. దీనిపై కుటుంబ సభ్యులు వాన్‌స్డా పోలీస్ స్టేషన్‌లో ఫిర్యాదు చేశారు. వధూవరులు ఇద్దరూ కలసి తన వివాహానికి వచ్చిన బహుమతులను ఓపెన్ చేయగా ఒక దాంట్లో రీచార్జబుల్ టాయ్ ఉంది. దానిని ఛార్జింగ్ పెట్టే క్రమంలో సడన్‌గా పేలింది. 

మే 12వ తేదీన లతీఫ్ గవిత్, సల్మాలపెళ్లి జరిగింది. ఈ వివాహానికి బంధువులు, స్నేహితులు పాల్గొన్నారు. అందరితో పాటు సల్మా అక్క ఎక్స్‌బాయ్ ఫ్రెండ్‌ కూడా పెళ్లికి వచ్చి నూతన వధూవరులకు ఓ గిఫ్ట్‌ను కూడా అందజేశాడు. పెళ్లి తంతు ముగిసిన ఐదు రోజుల తర్వాత లతీఫ్ అతని మేనల్లుడు జియాన్‌‌ తమ ఇంట్లో  పెళ్లికి వచ్చిన బహుమతులను ఓపెన్ చేసే కార్యక్రమం పెట్టుకున్నారు. ఒక్కొక్కటి ఓపెన్ చేసి చూశారు. అలా ఒకదానిలో రీఛార్జ్‌బుల్ టాయ్ ఉంది. ఆ బొమ్మను తీసి రీఛార్జ్ పెట్టేందుకు ప్రయత్నించారు. ఆ క్రమంలో అది సడన్‌గా పేలింది. దీంతో ఇద్దరు తీవ్రంగా గాయపడ్డారు.

ఈ ఘటనలో కొత్త పెళ్లికొడుకు లతీఫ్ చేతులకు, తలకు, కళ్లకు తీవ్ర గాయాలయ్యాయి. దాంతో అతని కుడి మణికట్టు నుంచి చేతిని తొలగించాల్సి వచ్చింది. మేనల్లుడు జియాన్‌కు తల, కళ్లలో గాయాలయ్యాయి. దీంతో వీరిద్దరిని నవ్‌సారి ప్రభుత్వ ఆస్పత్రికి తరలించి చికిత్స అందిస్తున్నారు. అయితే దీనిపై కుటుంబ సభ్యులు మాట్లాడుకున్న తర్వాత ఆ గిఫ్ట్‌ని కోయంబాకు చెందిన రాజు పటేల్ బహుమతిగా ఇచ్చాడని తెలుసుకున్నారు. రాజు పటేల్‌కి పెళ్లి కూతురు సల్మా అక్కతో వివాహేతర సంబంధం ఉండేదని, కొంతకాలం క్రితం వీరిద్దరూ విడిపోయినట్టు తెలుస్తుంది.