బీసీల కోసం పోరాడేందుకు జగన్ నాకు ఈ పదవి ఇచ్చారు: ఆర్‌.కృష్ణయ్య

బీసీల హక్కుల కోసం రాజ్యసభలో పోరాడాలని తనకు సీఎం జగన్ అవకాశం ఇచ్చారని బీసీ ఉద్యమ నేత, వైఎస్సార్‌ కాంగ్రెస్ పార్టీ రాజ్యసభ అభ్యర్థి ఆర్‌.కృష్ణయ్య అన్నారు. చంద్రబాబుకు బీసీల ఓట్లు కావాలని కానీ వాళ్లు ఎదిగితే ఓర్వలేరన్నారు. చంద్రబాబు ఏనాడైనా బీసీలకు ఇన్ని మంత్రి పదవులు, రాజ్యసభ సీట్లు ఇచ్చారా అని ప్రశ్నించారు. పార్లమెంటులో బీసీ బిల్లు పెట్టాలని ఎన్ని సార్లు అడిగినా చంద్రబాబు స్పందించలేదని విమర్శించారు. బీసీలంతా ఎప్పటికీ సీఎం జగన్‌ వెంటే ఉంటారని ఆర్‌.కృష్ణయ్య వ్యాఖ్యానించారు.

సీఎం జగన్ అన్ని రంగాల్లో బీసీలకు అధిక ప్రాధాన్యత ఇచ్చారని, ఆయనను విమర్శించే ముందు చంద్రబాబు అసలు బీసీలకు ఏం చేశారో చెప్పాలని ఆర్.కృష్ణయ్య డిమాండ్ చేశారు. గతంలో చంద్రబాబు ఇతర రాష్ట్రాలకు చెందిన సురేష్ ప్రభు, నిర్మలా సీతారామన్‌లను రాజ్యసభలకు పంపించారని, ఉమ్మడి రాష్ట్రాలకు చెందిన తనను రాజ్యసభకు పంపితే తప్పేముందని ఆర్.కృష్ణయ్య ప్రశ్నించారు.

తెలుగు దేశం పార్టీ అధినేత చంద్రబాబునాయుడు వెనకబడిన కులాల ద్రోహి అని ఆయన మండిపడ్డారు. ముఖ్యమంత్రి వైఎస్ జగన్మోహన్ రెడ్డి బీసీలను అభివృద్ధి చేస్తుంటే చంద్రబాబు ఓర్వలేకపోతున్నారని దుయ్యబట్టారు. ముఖ్యమంత్రి జగన్మోహన్ రెడ్డి వైసీపీ తరఫున ఆర్.కృష్ణయ్యకు రాజ్యసభ సీటు కేటాయించిన విషయం తెలిసిందే. ఈ నేపథ్యంలో మంగళవారం ఆర్.కృష్ణయ్య రెండో సెట్ నామినేషన్ పత్రాలు దాఖలు చేయటానికి అసెంబ్లీకి వచ్చారు. ఈ సందర్భంగా ఆర్.కృష్ణయ్య మీడియాతో మాట్లాడుతూ చంద్రబాబుపై తీవ్ర స్థాయిలో విమర్శలు గుప్పించారు. చంద్రబాబుకు సిగ్గుండాలని సీఎంగా పని చేసిన వ్యక్తి, తన స్థాయికి తగ్గట్లుగా మాట్లాడాలని హితవు పలికారు. ఈ దేశంలో బీసీలకు ఎవరూ సీఎం జగన్‌లా మేలు చేయలేదని 47 ఏళ్లలో బీసీలను ఇంతలా ప్రోత్సహించే ముఖ్యమంత్రిని చూడలేదన్నారు.