ధర్మారెడ్డి నియామకంపై హైకోర్టులో పిటిషన్

టీటీడీ వ్యవహారాలు గత కొంతకాలంగా గందరగోళంగా మారుతున్నాయి. ఇదిలావుంటే తాజాగా టీటీడీ అదనపు ఈవోగా ధర్మారెడ్డి నియామకం వ్యవహారం ఏపీ హైకోర్టుకు చేరింది. టీటీడీ ఈవోగా అదనపు బాధ్యతలు అప్పగించడాన్ని సవాల్‌ చేస్తూ తిరుపతికి చెందిన నవీన్‌కుమార్‌రెడ్డి పిటిషన్ దాఖలు చేశారు. దేవదాయ చట్టంలోని 107వ సెక్షన్‌ ప్రకారం.. జిల్లా కలెక్టర్‌, లేని పక్షంలో ఆ ర్యాంకుకు తగ్గని అధికారికి మాత్రమే ఈవోగా బాధ్యతలు చేపట్టేందుకు అర్హత ఉందన్నారు. ధర్మారెడ్డి ఈవోగా బాధ్యతలు నిర్వర్తించకుండా ఆదేశాలు ఇవ్వాలని కోర్టును కోరారు. కేంద్ర హోంశాఖ కార్యదర్శి, సిబ్బంది, శిక్షణ వ్యవహారాల మంత్రిత్వశాఖ కార్యదర్శి, ఏపీ సీఎస్‌, సాధారణ పరిపాలన, దేవాదాయ శాఖల ముఖ్య కార్యదర్శులు, టీటీడీ మేనేజ్‌మెంట్‌ కమిటీ, టీటీడీ ఇంఛార్జ్ ఈవో ధర్మారెడ్డిని ప్రతివాదులుగా చేర్చారు.

‘ధర్మారెడ్డి 1991లో ఇండియన్ డిఫెన్స్ అండ్ ఎస్టేట్ సర్వీస్ గ్రూప్-ఏ సర్వీసెస్ పోస్టులో యూపీపీఎస్సీ ద్వారా నియమితులయ్యారు. ఆయన్ను డిప్యుటేషన్‌పై ఆంధ్రకు కేటాయిస్తూ కేంద్ర సిబ్బంది-శిక్షణ వ్యవహారాల శాఖ 2019 జూలై 8న ఉత్తర్వులిచ్చింది. ఈ ఏడాది మే 14తో ఆ డిప్యుటేషన్‌ కాలపరిమితి ముగిసింది. సీనియర్‌ ఐఏఎస్‌ అధికారి కేఎస్‌ జవహర్‌రెడ్డి బదిలీ కావడంతో.. టీటీడీ ఈవో పోస్టు ఖాళీ కావడంతో ధర్మారెడ్డికి టీటీడీ ఈవోగా పూర్తి అదనపు బాధ్యతలు అప్పగించారు. ఏపీ ప్రభుత్వం మే 8న జీవో 813 జారీ చేయగా.. ఈ నియామకం నిబంధనలకు విరుద్ధం. ఐడీఈఎస్‌ అధికారి అయిన ధర్మారెడ్డికి జిల్లా కలెక్టర్‌ స్థాయి అర్హత లేదు. అందుచేత ప్రభుత్వ ఉత్తర్వులను నిలుపుదల చేయాలి. జిల్లా కలెక్టరు, ఆ హోదాకు సమాన అర్హతలున్న వ్యక్తిని ఈవోగా నియమించేలా ’చూడాలని పిటిషన్‌లో ప్రస్తావించారు.