మార్కులు మన రాతను నిర్ణయించవు...పరిణితితో కూడిన విద్య అవసరం

మార్కులే ఆధారంగా విద్యాసంస్థలు  మొదలు  మన తల్లిదండ్రులు సైతం వారి తలరాతను నిర్ణయించేస్తారు. కానీ మార్కులే  ఉన్నత శిఖరాలకు చేరుకొనేందుకు మార్గం కాదు అన్నది ఎన్నోసార్లు నిరూపితమైంది. పరీక్షల్లో మార్కులు రాకపోతే ఇక జీవితమే లేదనే వాతావరణం సొసైటీలో ఇంకా ఉంది. అందుకే ఇప్పటికీ చాలామంది పిల్లలు పరీక్షల్లో ఫెయిల్ అయితే ఆత్మహత్యలు చేసుకుంటున్నారు. ఈ ఆలోచన ధోరణిని మార్చేందుకు ఓ ఐఏఎస్ అధికారి పదో తరగతి మార్కుల షీట్‌ను ట్విట్టర్‌లో షేర్ చేశారు. అది తెగ వైరల్ అవుతుంది. గుజరాత్‌లో భరూచ్చ్ జిల్లా కలెక్టర్ తుషార్ డి సుమేరా తన మార్కుల షీట్‌ను సోషల్ మీడియాలో పెట్టారు.

అయితే తుషార్ డీ పదో తరగతి బోర్డు ఫలితాల్లో కేవలం పాస్ మార్కులతో గట్టెక్కారు. ఇంగ్లీష్‌లో 35, లెక్కల్లో 36 మార్కులు మాత్రమే వచ్చాయి. ఆ మార్కులను చూసిన వారెవరైనా ఆయన కష్టపడి పదో తరగతిలో ఉత్తీర్ణత సాధించినట్టు అర్థమవుతుంది. కానీ ఎవరూ ఊహించని విధంగా ఆయన కలెక్టర్ అయ్యారు. ఛత్తీస్‌గఢ్ కేడర్‌కు చెందిన 2009 బ్యాచ్ ఐఏఎస్ అధికారి అవనీష్ శరణ్.. సుమేరా మార్కుల లిస్ట్‌తో‌ పాటు ఆయన ఫోటోను కూడా ట్విట్టర్‌లో షేర్ చేశారు. ఆయనలాంటి బ్యాక్ బెంచ్ విద్యార్థులకు, పాస్ మార్కులతో ఉత్తీర్ణత సాధించేవారికి ఆయన స్టోరీ ప్రేరణగా నిలవాలనే ఉద్దేశంతో... మార్క్స్ మెమోను షేర్ చేశారు.

ప్ర‌స్తుతం ఇది సోష‌ల్ మీడియాలో వైర‌ల్ అవుతోంది. అయితే తుషార్ సుమేరా 2012లో ఐఏఎస్ అధికారి అయ్యారు. అతను ఆర్ట్స్ స్ట్రీమ్‌లో గ్రాడ్యుయేషన్ పూర్తి చేశారు. యూపీఎస్సీ పరీక్షలో ఉత్తీర్ణత సాధించడానికి ముందు ఆయన పాఠశాల ఉపాధ్యాయుడిగా కూడా పనిచేశారు. దీంతో మార్కుల మాత్రమే జీవితాన్ని నిర్దేశించవనే విషయం అందరికి తెలుస్తుంది. త‌క్కువ‌గా మార్కులొచ్చాయ‌ని బాధపడే విద్యార్థులకు ఈ స్టోరీ ఎంతో ప్రేరణగా ఉంటుందని కలెక్టర్ అవనీష్ శరణ్‌ అభిప్రాయపడ్డారు. కాగా తన మార్కుల షీట్‌‌ను షేర్ చేసినందుకు తుషార్ సుమేరా మైక్రో-బ్లాగింగ్ సైట్‌లో మరో కలెక్టర్ అవనీష్ శరణ్‌కు ధన్యవాదాలు తెలియజేశారు.